ރާއްޖޭގައި ކުށްކުރުން އިތުރުވެ، މާރާމާރީތައް ގިނަވާތީ ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ)އިން ކަންބޮޑުވުން ފާޅުކޮށްފިއެވެ.
އެކަމާއި ކަންބޮޑުވުން ފާޅުކޮށް އެމްޑީޕީން އިއްޔެ ނެރުނު ބަޔާނެއްގައި ބުނީ، ދިވެހިރާއްޖޭގެ އަމާންކަން ގެއްލި، ރާއްޖޭގެ އެކި ކަންކޮޅުތަކުގައި ކުށްކުރުމާއި މާރާމާރީތައް އިތުރުވުމަކީ އެޕާޓީން ވަރަށް ކަންބޮޑުވާކަމެއް ކަމަށެވެ.
ދިރިއުޅޭ ހިޔާވަހީގެ ރައްކާތެރިކަމާއި، މަގުތަކުގެ އަމާންކަން ގައުމުގައި ގައިމު ނުކުރެވުމަކީ އެ ޕާޓީއަށް ބަލައިގަންނާނެ ކަމެއް ނޫންކަމަށާއި، އެ ޕާޓީން ވަކާލާތު ކުރާ އަބުރުވެރި ދިރިއުޅުމަކަށް ގެދޮރުގެ ހުރުމަތް ކޮންމެ ރައްޔިތަކަށްމެ ކަށަވަރުކޮށްދޭންޖެހޭނެކަމަށް އެމްޑީޕީން ބުނެފަވެއެވެ.
''އަމާން ރާއްޖެ އެއްގެ ހިޔާ ދަށުގައި، ފިކުރުބޮޑު ނުވާ ދިރިއުޅުމެއްގެ އުފާ ލިބެންވާނެއެވެ. މާޒީގައިވެސް، ޕީޕީއެމް-ޕީއެންސީގެ ވެރިކަން ބައްޓަން ކުރީ އެމްޑީޕީގެ އަސާސްތަކާއި ނުކިއްސަރުކޮށެވެ.'' އެމްޑީޕީން ބުނެފަވެއެވެ.
އެ ޕާޓީން ބުނެފައިނ ވަނީ، ޕީޕީއެމްގެ ފުރަތަމަ ސަރުކާރުގައި ވެސް މަގުތައް ނާމާންވެ، ގެދޮރުގެ ހަތަރު އިންފާރަކީ އަމިއްލަ ނަފްސުގެ ރައްކާތެރިކަން ކަށަވަރު ނުކުރެވޭ ތަންތަނަށް ވެގެންދިޔަ ކަމަށެވެ. އަދި މި ސަރުކާރުގެ ޢަމަލުތައް ވެސް ހުރީ އެމަގުން ކަމަށް ބަޔާނުގައި ބުނެފަވެއެވެ.
އެމްޑީޕީގެ ބަޔާނުގައި ވަނީ މިހާތަނަށް ފުލުހުންގެ ޚިދުމަތުގެ ވެރިއެއް (ކޮމިޝަނާ އޮފް ޕޮލިސް) ޢައްޔަނުކޮށްފައި ނުވާތީ ވެސް ކަންބޮޑުވުން ފާޅުކޮށްފައެވެ. އަދި އެއީ ފުލުހުންގެ ޒިންމާތައް އެންމެ ފުރިހަމައަށް އަދާކުރަން އޮތް ހުރަހެއް ކަމަށް ބުނެފަވެއެވެ.
އެމްޑީޕީން ވަނީ، ޕޮލިސް ބޯޑު މެދުވެރިކޮށް ޕޮލިސް ކޮމިޝަނަރަކު އައްޔަނު ކުރުން އަވަސްކުރުމަށް ވެސް ސަރުކާރަށް ގޮވައިލައިފައެވެ.
އެމްޑީޕީގެ ބަޔާނުގައި، ނިމިގެންދިޔަ ސަރުކާރަކީ ފާއިތުވި 15 އަހަރު ތެރޭގައިވެސް ދިވެހިރާއްޖޭގައި އެންމެ ކުށް މަދު ކުރެވުނު ފަސް އަހަރުކަމަށް ވެސް ބުނެފައެވެ.
އެމްޑީޕީން މިފަދަ ބަޔާނެއް ނެރުނުއިނު، އެމްޑީޕީއާ އިދިކޮޅު ބައެއް މީހުން ދަނީ މިހާރު އިތުރުވަމުންދާ ކުށްކުރުންތަކާއި، ރާއްޖޭގެ އަމާންކަން ގެއްލިގެން ދިޔުމުގެ ޒިންމާ ކުރީގެ ރައީސް އިބްރާޙީމް މުޙައްމަދު ޞާލިޙް ފުރިހަމައަށް ނަންގަވަންޖެހޭނެކަމަށް ބުނަމުންނެވެ. އެފަދަ މީހުން ބުނާގޮތުގައި މިހާލަތަށް އައީ އިންތިޚާބާއި ދިމާކޮށް ވޯޓުގެ ބޭނުމުގައި ބޮޑެތި ކުށްވެރިންތަކަށް މަޢާފުދީ ދޫކޮށްލާފައިވާތީއެވެ.