އައްޑޫސިޓީއިން ކަރަންޓު ކެނޑޭ މައްސަލަ ބޮޑުވެފައިވަނިކޮށް ، ފެނަކައިގެ މެނޭޖިން ޑިރެކްޓަރު މުހައްމަދު ނަޖާހާއި ޑެޕިއުޓީ މެނޭޖިން ޑިރެކްޓަރު މުހައްމަދު އާރިފް ރޭ އައްޑުއަށް ވަޑައިގަތުމުން އެ ސިޓީގެ ބަޔަކު ނިކުމެ މުޒާހަރާކޮށްފިއެވެ.
މުޒާހަރާކޮށް އަޑުއުފުލި މީހުން ވަނީ ފެނަކައިގެ ވެރިން އައްޑޫއަށް ވަޑައިގަތް ވަގުތު އެއާޕޯޓު ދޮށަށް އެއްވެ، އެ މައްސަލައިގައި ހިތްހަމަ ނުޖެހުން ފާޅުކޮށްފައެވެ.
ރައްޔިތުން ވަނީ އަވަސް އަވަހަށް ކަރަންޓު ކެނޑޭ މައްސަލަ ހައްލުނުވާތީ އެކަމުގެ ކަންބޮޑުވުން ފާޅުކޮށް، އެ މައްސަލަ ހައްލުވާނީ ކޮން އިރަކުންތޯ ސުވާލުކޮށްފައެވެ. އަދި، އައްޑުއަށް ވަރަށް އަވަހަށް ގެންނާނެ ކަމަށް ބުނި އިންޖީނު ނުވަތަ ޖަނަރޭޓަރު ކޮބައިތޯ ވެސް ސުވާލުކޮށްފައި ވެއެވެ.
އައްޑޫ ސިޓީގެ އަވަށްތަކުން ކަރަންޓު ކެނޑޭ މައްސަލައަށް ހައްލެއް ނުލިބި ދިގުދެމިގެން ދާތީ އެ ކަމާ އިހުތިޖާޖުކުރަން ނިކުންނަން އެ ސިޓީގެ މޭޔަރު އަލީ ނިޒާރު އިއްޔެ ވަނީ ގޮވާލައްވަވާފައެވެ.
މެޔަރު ވިދާޅުވެފައިވަނީ އައްޑޫ ސިޓީގެ ރައްޔިތުން ކަރަންޓުގެ އަސާސީ ހައްގުން މަހުރޫމުކޮށް، އެ މައްސަލަ ހައްލު ކުރުމަށް ސަރުކާރު އިހުމާލުވެފައިވާ ކަމަށެވެ.
މި ރޯދަމަހު އެކި ގަޑިތަކުގައި ކަރަންޓު ކަނޑަމުންދާ މައްސަލައިގައި ރައްޔިތުން ކަންބޮޑުވުން ފާޅުކުރަމުން އަންނައިރު ފެނަކައިން ވަނީ އަންނަ ހަފުތާގައި އެ ސިޓީއަށް 1.8 މެގަވޯޓުގެ ޖަނެރޭޓަރެއް ފޮނުވަން މަސައްކަތް ކުރަމުން އަންނަ ކަމަށް ބުނެފައެވެ.
އައްޑޫއަށް ކަރަންޓު ފޯރުކޮށްދެނީ ފެނަކައިންނެވެ. އައްޑޫ ސިޓީގައި 1.8 މެގަވޯޓުގެ ޖެނަރޭޓަރު ސެޓެއް އިންސްޓޯލްކޮށް، އެ ސިޓީގެ ގުޅިފައިވާ ރަށްތަކަށް ދިމާވެފައިވާ ކަރަންޓު ކެނޑުމުގެ މައްސަލަ ހައްލުކޮށްފައިވަނީ މިދިޔަ ފެބުރުވަރީ މަހުގެ 21ވަނަ ދުވަހެވެ. ނަމަވެސް، އަނެއްކާ ވެސް މިވަނީ ކަރަންޓު ކެނޑުމުގެ މައްސަލަ ދިމާވެފައެވެ.