ކުރިއަށް އޮތް 4 އަހަރުތެރޭ ހުޅުމާލޭގައި 7 ނުވަތަ 10 ސްކޫލް ތަރައްޤީކުރެވޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. 
އިއްޔެ ބޭއްވުނު މާލެ ސިޓީ ކައުންސިލްގެ ޖަލްސާގައި ބައިވެރިވެވަޑައިގެން ވާހަކަފުޅު ދައްކަވަމުން ރައީސް ވިދާޅުވީ ހުޅުމާލޭގެ މުޅި ޕްލޭނަށް 22 ސްކޫލް ބޭނުންވާ ކަމަށާއި، މިއީ ވަރަށް ބޮޑު މަސައްކަތަކަށް ވާނެ ކަމަށެވެ. އަދި މިކަމަށް ވަރަށް ބޮޑު ބަޖެޓެއް ބޭނުންވާނެ ކަމަށްވެސް ވިދާޅުވިއެވެ."ކޮންމެ ސްކޫލެއްގައިވެސް 1500 އެއްހާ ކުދިންގެ ޖާގަ ހުންނަންޖެހޭނެ. 7 ނުވަތަ 10 ސްކޫލަކީ ވަރަށް ބޮޑު ކަމެއް. އެކަމަކު މިކަމަށް ބޭނުންވާ އިސްކަން ދޭނަން،" ރައީސް ވިދާޅުވިއެވެ.ހުޅުމާލޭގައި މި ސްކޫލްތައް އިމާރާތްކުރެވުމުން މާލޭގެ ޓްރެފިކްގެ ބާރުބޮޑުވުން ކުޑަވާނެ ކަމަށް ރައީސް ވިދާޅުވިއެވެ. އަދި މި ސްކޫލްތައް ތަރައްޤީކުރުމުގައި މާލެ ސިޓީ ކައުންސިލްގެ އެއްބާރުލުން ބޭނުންވާ ކަމަށްވެސް ވިދާޅުވިއެވެ.މިހާރު ހުޅުމާލެ ދެވަނަ ފިޔަވަހީގައި ގްރޭޑް 1 އިން ފެށިގެން ގްރޭޑް 10 އާ ހަމައަށް ކިޔަވައިދޭ އެންމެ ސްކޫލެއް އެކަނި ހުރިކަން ފާހަގަކޮށްލެވެއެވެ.