ދީނަށް ފުރައްސާރަ ކުރަމުންދާ ނ.ކުޑަފަރި، ހިޔަލީގެ ޙުސައިން ޔޫސުފް (44އ)  ފުލުހަށް ހާޒިރުވާން އަންގައިފި އެވެ.
ފުލުހުން ބުނީ އިސްލާމްދީނަށް ތައުހީނުކޮށް ފުރައްސާރަކުރުމާއި، ދިވެހި ރައްޔިތުންގެ އެއްބައިވަންތަކަން ނަގާލަން މަސައްކަތްކުރުމާއި، މީހުންގެ މެދުގައި ދީނީ ގޮތުން ބައިބައިވުން އުފެދޭ ބާވަތުގެ ވާހަަކައާއި އިސްލާމްދީނުގެ އަސްލުތަކާ ގުޅޭ ގޮތުން ދޮގު މަޢުލޫމާތު، ސޯސަލް މީޑިއާގެ ޕްލެޓްފޯމް ޓިކްޓޮކް މެދުވެރިކޮށް ފެތުރިކަމަށް ތުހުމަތު ކުރެވޭ މައްސަލައެއްގެ ތަހުގީގަށް ކި މީހާ ހާޒިރުކުރަން ބޭނުންވެ، އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓު ރައްދުކުރެވިފައި ނުވާ ކަމަށެވެ.
އެހެން ކަމުން ޖިނާއި މައްސަލަތައް ތަހުގީގުކުރުމުގައި ފުލުހުން އަމަލުކުރާނެ އިޖުރާއަތުގެ ގަވާއިދުގެ 27 ވަނަ މާއްދާގައިވާ ގޮތުގެމަތިން ތަހުގީގަށް ހާޒިރުވުމަށް އަންގައި އިއުލާނުކުރާ ކަމަށެވެ.
މި މީހާ ގެންދަނީ ޓިކްޓޮކްގައި އިސްލާމްދީނަށް ވަރަށް ބޮޑަށް ފުރައްސާރަ ކުރަމުންނެވެ. އޭނާއަށް ވަހީ އަންނަ ކަމަށް ވެސް ބުނެ ޖޯކު ޖަހާފައިވެ އެވެ. އޭނާގެ މައްސަލަ ބަލާ ފިޔަވަޅު އަޅަން ވަރަށް ގިނަ ބަޔަކު ދަނީ ގޮވާލަމުންނެވެ.
އޭނާ މިކަން ކުރަމުން ދަނީ ރާއްޖެއިން ބޭރުގައި ހުރެގެންނެވެ.