އީރާނުގެ އަންހެން ކުދިންނަށް ކިޔަވައިދޭ ސްކޫލަކަށް ދިން ނުރައްކާތެރި ހަމަލާއާ ގުޅިގެން، އެކަމުގެ ފުރިހަމަ ތަހުގީގެއް ހިންގުމަށް އދ.ގެ އިންސާނީ ހައްގުތަކާ ބެހޭ އޮފީހުން އިއްޔެ ގޮވާލައިފި އެވެ.
މި ހަމަލާގެ ޒިންމާ އުފުލަންޖެހޭ ފަރާތްތަކުން އެކަން ހިނގައިދިޔަ ގޮތުގެ ތަފްސީލު ހާމަކުރުމަށް ވެސް އެ އިދާރާއިން ވަނީ ބާރުއަޅާފަ އެވެ.
އދ.ގެ ހިއުމަން ރައިޓްސް ހައި ކޮމިޝަނަރު ފޯލްކާ ތާކް، މި ހާދިސާގެ އަވަސް، މިނިވަން އަދި ފުރިހަމަ ތަހުގީގެއް ހިންގުމަށް އެދިވަޑައިގެންފައިވާ ކަމަށް އެ އޮފީހުގެ ތަރުޖަމާނު ރަވީނާ ޝަމްދަސާނީ ވިދާޅުވި އެވެ. ޖެނީވާގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އޭނާ ވިދާޅުވީ، މި ހަމަލާއަކީ އިންތިހާއަށް ބިރުވެރި އަމަލެއް ކަމަށާއި މިކަން ތަހުގީގު ކުރުމުގެ ޒިންމާ އޮތީ ހަމަލާދިން ފަރާތްތަކަށް ކަމަާށެވެ.
ހަމަލާދިން ސަރަހައްދުން ފެންނަން ހުރި މަންޒަރުތަކުން، މި ހަނގުރާމައިގެ ސަބަބުން ކުރިމަތިވެފައިވާ ބިރުވެރިކަމާއި މާޔޫސްކަމާ އަދި އިހާނެތިކަން ހާމަވާ ކަމަށް އޭނާ ވިދާޅުވި އެވެ. މީގެ އިތުރުން، ހުރިހާ ފަރާތްތަކަކުން ވެސް ކެތްތެރިކަން އިސްކޮށް، އަލުން މަޝްވަރާގެ މޭޒަށް އެނބުރި އައުމަށް އޭނާ ވަނީ ގޮވާލާފަ އެވެ.
އީރާނުން ބުނާ ގޮތުގައި، އެ ގައުމުގެ ދެކުނުގެ ސްކޫލަކަށް މި ހަމަލާ އަމާޒުވީ އެމެރިކާ އާއި އިޒްރޭލުން ދޭން ފެށި ހަމަލާތަކުގެ ފުރަތަމަ ދުވަހު އެވެ. މި ހަމަލާގައި ގާތްގަނޑަކަށް 150 ދަރިވަރުން މަރުވެފައިވާއިރު، އީރާނުން ވަނީ މިއީ އެއްވެސް އުޒުރެއް ދެއްކެން ނެތް ޖިނާއީ އަމަލެއްގެ ގޮތުގައި ސިފަކޮށްފަ އެވެ.
ނަމަވެސް، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވީ، އެމެރިކާގެ ސިފައިން ގަސްތުގައި ސްކޫލަކަށް ހަމަލާ ނުދޭނެ ކަމަށެވެ. އަދި އިޒްރޭލުން ބުނީ އެ ހާދިސާ ބަލަމުންދާ ކަމަށެވެ.
އދ.ގެ އިންސާނީ ހައްގުތަކާ ބެހޭ އޮފީހުން ބުނި ގޮތުގައި، މި ހަމަލާއަކީ ހަނގުރާމައިގެ ކުށެއް ކަމަށް ކަނޑައެޅުމަށް ބޭނުންވާ ފުރިހަމަ މައުލޫމާތު އަދި ލިބިފައެއް ނުވެ އެވެ.