'އަލް އަބްރާރު ޕްރައިވެޓް ލިމިޓެޑް' ގްރޫޕުން 110 މީހަކު އުމްރާއަށް ގެންދަން އިންތިޒާމުކުރި ދަތުރު، ފަހު ވަގުތު ކެންސަލްކުރި މައްސަލައިގައި އޭގެ ތެރެއިން ބައެއް މީހުންނަށް ސައުދީ އަރަބިއްޔާއަށް ދިޔުމުގެ އިންތިޒާމު ހައްޖު ކޯޕަރޭޝަނުން މިއަދު ހަމަޖައްސައިދީފިއެވެ. އެ މައްސަލައާ ގުޅޭ ގޮތުން 'ސަން'އާ ވާހަކަދެއްކި މީހަކު ބުނި ގޮތުގައި އެ ގްރޫޕާ އެކު 110 މީހުން އުމްރާއަށް ފުރަން ހަމަޖެހިފައި އޮތީ ރޭގައެވެ. އެ ދަތުރަށް ކޮންމެ މީހަކު ގާތްގަނޑަކަށް 45،000 ރުފިޔާ ދައްކައިފައިވަނިކޮށް، ފުރުން ކުއްލިއަކަށް ކެންސަލްކުރީ ކަމަށް އޭނާ ބުންޏެވެ. އެ މައްސަލަ އިސްލާމިކް މިނިސްޓްރީއާއި ފުލުހުން ވެސް ގެންދަނީ ބަލަމުންނެވެ. https://sun.mv/218689 އެ މައްސަލައާ ގުޅޭ ގޮތުން ހައްޖު ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލް މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ގެއްލުން ލިބުނު ގިނަ އަދަދެއްގެ މީހުން އެހީއަށް އެދިފައިވާ ކަމަށެވެ. އޭގެ ތެރެއިން ހައްޖު ކޯޕަރޭޝަނަށް މިހާރު އިންތިޒާމުތައް ހަމަޖެއްސެން އޮތީ 28 މީހުންނަށް ކަމުން އެ މީހުންނަށް އުމްރާ ކުރުމުގެ އިންތިޒާމު ހަމަޖައްސައިދީފައިވާ ކަމަށް އޭނާ ވިދާޅުވިއެވެ. އެގޮތުން، 28 މީހުންނަށް ވިސާ ޖަހައި މައްކާ އަދި މަދީނާއިން އެކޮމޮޑޭޝަން ހަމަޖައްސައިދީ، ކެއިންބުއިމާއި ދަތުރުފަތުރުގެ އެންމެހާ އިންތިޒާމުތައް ހަމަޖައްސައިފައިވާ ކަމަށް އޭނާ ވިދާޅުވިއެވެ. https://x.com/schakyyl/status/2029085565938020531 "މިއަދު ހެނދުނު މޯލްޑިވިއަންގެ ފްލައިޓަކުން މި 28 މީހުން ސައުދީ ޢަރަބިއްޔާއަށް ޢުމްރާގެ އަޅުކަމަށް ވަނީ ފުރާފައި،" ޝަކީލް ވިދާޅުވިއެވެ. ހައްޖު ކޯޕަރޭޝަންގެ ފަރާތުން "ސަން"އަށް މައުލޫމާތު ދިން ގޮތުގައި، މި ވަގުތު ހައްޖު ކޯޕަރޭޝަންގެ ހަވާލުގައި ޖުމުލަ 600 އާ ގާތްކުރާ އަދަދަކަށް އުމްރާވެރިން ވަނީ ރޯދަ އުމްރާއަށް ސައުދީއަށް ގޮސްފައެވެ. އެހެންވެ، މި ވަގުތު އެ ކޯޕަަރޭޝަންގެ ހޮޓެލްގައި ބައިތިއްބަން ޖާގަ އޮތީ 28 މީހަކަށްކަން އެ ކުންފުނިން މައުލޫމާތު ދިނެވެ. 'އަލް އަބްރާރު ޕްރައިވެޓް ލިމިޓެޑް' ގްރޫޕުން ދަތުރު އިންތިޒާމުކުރި ގޮތާ ގުޅޭ ގޮތުން މި ނޫހަށް މައުލޫމާތު ދިން މީހާ ބުނި ގޮތުގައި، އޭނާގެ އާއިލާގެ މީހުން އުމްރާއަށް ފުރާތީ އެ ކަންތައްތައް ހަމަޖައްސަން އޭނާ އިސްކޮށް އުޅުނެވެ. އެ ގޮތުން، އިއްޔެ ހެނދުނު 10:00 އާއި 11:00 އާ ދޭތެރޭ އެއާޕޯޓަށް ފޮށިތައް ގެންދިޔުމަށް އެދުނު ކަމަށާއި ފުރަން ދާން ތިބި އެންމެން ހޯމަ ދުވަހުގެ ރޭ ޕެކްކޮށް ވެސް ނިންމި ކަމަށް އެ މީހާ ކިޔައިދިނެވެ. ކަން އެހެން އޮއްވައި ކުއްލިއަކަށް ގުޅައި، ރޭ ފުރަން ދާއިރު ފޮށިތައް ގެންދަން އެދުނު ކަމަށް އޭނާ ބުންޏެވެ. https://sun.mv/218688 އެ ފަހުން އިއްޔެގެ މެންދުރު ދޭއް ޖަހަނިކޮށް ގުޅައި، މީޓިންއެއް އޮތްކަން އަންގައި، އުމްރާއަށްދާ އެންމެން އެ މީޓިންއަށް ހާޒިރުވާން އެންގި ކަމަށް އޭނާ ބުންޏެވެ. ފުރުން ކެންސަލްކުރިކަން އެނގުނީ ވެސް އެ މީޓިންއަށް ދިޔުމުން ކަމަށް އެ މީހާ ބުންޏެވެ. އަލް އަބްރާރު ގްރޫޕުން މައުލޫމާތު ދިނީ، މިހާރު މެދުއިރުމަތީގައި ހިނގާ ހަނގުރާމައާ ހެދި ފުރުން ކެންސަލްވީ ކަމަށް ކަމުގައި އޭނާ ބުންޏެވެ. އުމްރާއަށްދާން ފައިސާ ދެއްކި ބައެއްގެ އާއިލާ މެންބަރަކު މިއަދު "ސަން"އަށް ބުނިގޮތުގައި ރޭ އަލް އަބްރާރު ގުރޫޕުން ވަނީ ރިފަންޑު ދޭން ފަށައިފައެވެ. އެ ގޮތުން، ޓިކެޓަށްވާ 15,000 ރުފިޔާ ކެނޑުމަށް ފަހުގައި, އެ މީހަކު ދެއްކި އަދަދަކަށް ބަލައި ބާކީ ފައިސާ ރޭ ޖަމާކުރަން ފަށާފައިވާ ކަމަށް އޭނާ ބުންޏެވެ. އަދި، ޓިކެޓް ފައިސާ ވެސް ފަހުން ޖަމާކޮށްދޭނެކަމުގެ ޔަގީންކަން ދޭ ކަމަށް ބުންޏެވެ.