އިރާނާ ދެކޮޅަށް އެމެރިކާ އަދި އިޒްރޭލުން ކުރަމުންދާ ހަނގުރާމައަކީ މުގަައްދަސް ހަނގުރާމައެއް ކަމަށް ސިފައިންނަށް ވިސްނައިދޭން ފަށައިފި އެވެ.
ސިފައިންގެ ދީނީ މިނިވަންކަން މޮނީޓާ ކުރާ ޖަމިއްޔާތަކުން ބުނީ، އިރާނާ ދެކޮޅަށް އެމެރިކާއިން ކުރަމުންދަނީ މުގައްދަސް ހަނގުރާމައެއް ކަމަށް ސިފައިންގެ ކޮމާންޑަރުން ހުރިހާ އަސްކަރީ ޔުނިޓުތަކަކަށް އަންގަމުންދާ ކަމަށެވެ.
"މި ހަނގުރާމައިގެ ތެރެއިން އީސާގެފާނު ފައުޅުވެ، އެމެރިކާ ސިފައިންނާއެކު ހަނގުރާމަ ކުރައްވާނެ ކަމަށް ކޮމާންޑަރުން ދަނީ ބުނަމުން. އަދި އެމެރިކާގެ ރައީސް ޑޮނަލްޑް ޓްރަމްޕަކީ ނަސާރާއިންނަށް ކާމިޔާބު ހޯދައިދޭން އިސްކުރެވުނު ބޭފުޅެއް ކަމަށް ވެސް ކޮމާންޑަރުން ދަނީ ވިސްނައިދެމުން،" އެމެރިކާގެ މިލިޓަރީ ރިލިޖަސް ފްރީޑަމް ފައުންޑޭޝަނުން ބުނެފައިވެ އެވެ.
މިލިޓަރީ ރިލިޖަސް ފައުންޑޭޝަނުން ބުނީ، 30 ސަރަހައްދެއްގައި ގާއިމްކޮށްފައިވާ 40 އަސްކަރީ ޔުނިޓައް "މުގައްދަސް ހަނގުރާމައިގެ ވާހަކަ" ކިޔައިދީފައިވާ ކަމަށެވެ. އެމެރިކާގެ އަސްކަރިއްޔާއި ނަސާރާއިންގެ އިތުރުން މުސްލިމުންނާއި ޔަހޫދީން އަދި ދީނެއް ގަބޫލު ނުކުރާ ވަރަށް ގިނަ ސިފައިން ވެސް ހަރަކާތްތެރިވެ އެވެ.
ސުލްހައިގެ މަޝްވަރާތައް ކުރިއަށް ދަނިކޮށް އެމެރިކާ އާއި އިޒްރޭލުން ގުޅިގެން އިރާނަށް ހަމަލާދޭން ފެށީ މިދިޔަ ހޮނިހިރު ދުވަހެވެ. އޭގެ ފަހުން އިރާނުގެ ސުޕްރީމް ލީޑަރު އަލީ ހާމަނާއީ ވަނީ އަވަހާރަކޮށްލައިފަ އެވެ.
އެމެރިކާ އާއި އިޒްރޭލުން ވަނީ އިރާނުގެ އަންހެން ކުދިން ކިޔަވައި ސްކޫލަކަށް ވެސް ބޮން އަޅައިފަ އެވެ. އެ ހަމަލާގައި މަރުވި ކުޑަކުދިންނާއި މީހުންގެ އަދަދު 165 އަށް މިހާރު އަރައިފި އެވެ. އަދި އިރާނުގެ އެހެނިހެން މަދަނީ އިންފްރާސްޓްރަކްޗާތަކަށް ވެސް އެމެރިކާ އާއި އިޒްރޭލުން ދަނީ ބޮން އަޅަމުންނެވެ.
އެމެރިކާ އާއި އިޒްރޭލަށް ރައްދު ދިނުމުގެ ގޮތުން އިރާނުން ވެސް ދަނީ ހަމަލާތަކެއް ދެމުންނެވެ. އެގޮތުން އިޒްރޭލަށް އަދި އެމެރިކާއިން އަސްކަރީ މަަރުކަޒުތައް އަޅައިގެން އުޅޭ ގައުމުތަކަށް އިރާނުން ވަނީ ހަމަލާތަކެއް ދީފަ އެވެ. އިރާނުން ހަމަލާ ދިން ގައުމުތަކުގެ ތެރޭގައި ސައުދީ އަރަބިއްޔާ، އޮމާން، އުރުދުން، ކުވެއިތު އަދި ޔޫއޭއީ ހިމެނެ އެވެ.