އާ ނިއުކްލިއާ އެއްބަސްވުމަކާ ބެހޭ ގޮތުން މަޝްވަރާކުރުމަށް އީރާނަށް އޮތް ވަގުތު ކުޑަވަމުންދާ ކަމަށް ވިދާޅުވެ، އެމެރިކާގެ ރައީސް ޑޮނަލްޑް ޓްރަމްޕް އީރާނަށް އިއްޔެ އިންޒާރު ދެއްވައިފި އެވެ.
ވޮޝިންޓަނުން ވަނީ ގަލްފު ސަރަހައްދުގައި އެމެރިކާގެ އަސްކަރީ ހަރަކާތްތައް ވަރަށް ބޮޑަށް އިތުރުކޮށްފަ އެވެ. މީގެ ސަބަބުން ސަރަހައްދީ ފެންވަރުގައި ބޮޑު ކުރިމަތިލުމަކަށް ހިނގައިދާނެ ކަމުގެ ބިރު ވަނީ ބޮޑުވެފަ އެވެ.
ޓްރޫތު ސޯޝަލްގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، އެމެރިކާގެ ބިޔަ އަސްކަރީ ފައުޖެއް ވަރަށް ބާރުމިނުގައި، ފުރިހަމަ ގާބިލުކަމާއި އަޒުމާ އެކު އީރާނާ ދިމާލަށް ދަތުރުކުރަމުންދާ ކަމަށެވެ. އަދި އީރާނުން އަވަހަށް މަޝްވަރާގެ މޭޒަށް އައިސް، ނިއުކްލިއާ ހަތިޔާރު ނުހިމެނޭ، އިންސާފުވެރި އެއްބަސްވުމަކަށް އައުމަށް އޭނާ ގޮވާލެއްވި އެވެ.
މިކަމަށް ވަރަށް ހަރުކަށި ރައްދެއް ދެއްވަމުން އީރާނުގެ ހާރިޖީ ވަޒީރު އައްބާސް އަރަގްޗީ ވިދާޅުވީ، އެ ގައުމުގެ އަސްކަރިއްޔާ ވަނީ ތައްޔާރުވެފައި ކަމަށާއި، ކޮންމެ ހަމަލާއަކަށް ވަގުތުން ބާރުގަދަ ރައްދެއް ދޭނެ ކަމަށެވެ. އީރާނުގެ ނިއުކްލިއާ ޕްރޮގްރާމަކީ ސުލްހަވެރި ބޭނުންތަކަށް ކުރިއަށްގެންދާ ކަމެއްކަން ފާހަގަކުރައްވައި، އޭނާ ވިދާޅުވީ ބިރުދެއްކުމާއި މަޖުބޫރުކުރުމުގެ ތެރެއިން އެއްވެސް އެއްބަސްވުމެއް އެ ގައުމުން ގަބޫލުނުކުރާނެ ކަމަށެވެ.
ޓްރަމްޕް ވިދާޅުވީ، ބޭނުންވެއްޖެ ހާލަތެއްގައި އެމެރިކާގެ ފައުޖުތަކުން ވަރަށް ހަލުވިކަމާއި ބާރުގަދަ ހަމަލާތަކެއް ދިނުމަށް ތައްޔާރަށް ތިބި ކަމަށެވެ. ކުރިން އީރާނުގެ ނިއުކްލިއާ މަރުކަޒުތަކަށް ދީފައިވާ ހަމަލާތަކަށް ވުރެ، ކުރިއަށް އޮތް ހަމަލާތައް މާ ވަރުގަދަވާނެ ކަމަށް އޭނާ ވިދާޅުވި އެވެ.
މިދިޔަ ޖޫން މަހު އިޒްރޭލާ އެކު ހިނގި ހަމަނުޖެހުންތަކުގައި އެމެރިކާއިން ދިން ހަމަލާތަކަށް އިޝާރާތް ކުރައްވައި ޓްރަމްޕް ވިދާޅުވީ، ދެން ދޭ ހަމަލާ މާ ނުރައްކާތެރިވާނެ ކަމަށާއި އެފަދަ ހާލަތަކަށް ކަންކަން ދިޔަނުދިނުމަށެވެ.
އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ސެނެޓްގެ ފޮރިން ރިލޭޝަންސް ކޮމިޓީގައި ވިދާޅުވީ، އީރާނުގެ އިގްތިސާދު އިނދަޖެހި، ގައުމުގައި ހަމަނުޖެހުންތައް އިތުރުވުމުގެ ސަބަބުން އެ ގައުމުގެ ވެރިކަން މިހާރު އޮތީ ކުރިއަށްވުރެ ބޮޑަށް ބަލިކަށިވެފައި ކަމަށެވެ. އެ ސަރަހައްދަށް އެމެރިކާގެ އަސްކަރީ ވަސީލަތްތައް ޖަމާކުރަމުންދަނީ އެމެރިކާގެ މުވައްޒަފުންނަށް އީރާނުން ކުރިމަތިވެދާނެ ނުރައްކަލަކުން ދިފާއުވުމަށް ކަމަށް އޭނާ ވިދާޅުވި އެވެ.
ސެޓެލައިޓް ފޮޓޯތަކާއި ދަތުރުފަތުރުގެ ތަފާސްހިސާބުތަކުން ދައްކާ ގޮތުގައި، އުރުދުން، ގަތަރު، އަދި ޑިއޭގޯ ގާސިއާ ފަދަ ތަންތަނަށް އެމެރިކާގެ ހަނގުރާމަމަތީ މަތިންދާބޯޓުތައް ވަނީ އިތުރުކޮށްފަ އެވެ. މީގެ އިތުރުން، 'ޔޫއެސްއެސް އަބްރަހަމް ލިންކަން' މަތިންދާބޯޓު އުފުލާ މަނަވަރު އިސްވެ އޮވެ، ކަނޑުގެ ސިފައިންގެ ބޮޑު ފައުޖެއް ވެސް ދަނީ ހަރަކާތްތެރިވަމުންނެވެ.
ތަޖުރިބާކާރުން ބުނާ ގޮތުގައި، ވޭތުވެދިޔަ ދެ ހަފުތާގެ ތެރޭގައި އެމެރިކާއިން ވަނީ އެ ސަރަހައްދަށް ކަނޑާއި ވައިގެ އަސްކަރީ ބާރުތައް ވަރަށް ބޮޑަށް ޖަމާކޮށްފަ އެވެ.
މީގެ ރައްދުގައި އީރާނުން ވެސް ވަނީ އެ ގައުމުގެ އަސްކަރީ ތައްޔާރީތައް ވަރުގަދަކޮށްފަ އެވެ. ސެޓެލައިޓް ފޮޓޯތަކުން ފެންނަ ގޮތުގައި، އީރާނުން ވަނީ ޑްރޯން އުފުލާ މަނަވަރެއް ކަމަށްވާ 'އައިއާރުއައިއެސް ޝާހިދު ބާގެރީ' އެ ގައުމުގެ އައްސޭރިފަށަށް ނެރެފަ އެވެ.
މި ނުތަނަވަސްކަން އުފެދިފައި މިވަނީ، އީރާނުގެ ފައިސާގެ އަގު ވެއްޓުމާ ގުޅިގެން އެ ގައުމުގައި ވަރުގަދަ މުޒާހަރާތަކެއް ހިނގަމުންދާ ދަނޑިވަޅެއްގަ އެވެ. އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ބުނާ ގޮތުގައި މިދިޔަ މަހުގެ ފަހުކޮޅުން ފެށިގެން ހިނގަމުންދާ މި ހަމަނުޖެހުންތަކުގައި އެތައް ހާސް ބަޔަކު ވަނީ މަރުވެފަ އެވެ.
ނަމަވެސް އީރާނުގެ ކަމާ ބެހޭ ފަރާތްތަކުން މި އަދަދުތައް ކަށަވަރުކޮށްދީފައެއް ނުވެ އެވެ.
އީރާނުގެ ޑެޕިއުޓީ ފޮރިން މިނިސްޓަރު ކާޒިމް ގަރީބްއާބާދީ ވިދާޅުވީ، ދެ ގައުމުގެ ދެމެދުގައި މެސެޖުތައް ބަދަލުކުރެވުނު ނަމަވެސް، އެމެރިކާއާ އެކު ރަސްމީ އެއްވެސް މަޝްވަރާއެއް މިހާރު ކުރިއަށް ނުދާ ކަމަށެވެ.
މި މައްސަލައިގެ އަސްލަކީ 2015 ވަނަ އަހަރުގެ ނިއުކްލިއާ އެއްބަސްވުން އުވާލުމެވެ. އެގޮތުން، 2018 ވަނަ އަހަރު ޓްރަމްޕް އެ އެއްބަސްވުމުން ވަކިވެ، އީރާނުގެ އިގްތިސާދަށް ބޮޑެތި ގެއްލުންތަކެއް ލިބޭ ފަދަ ދަތިކުރުމުގެ ފިޔަވަޅުތައް އަލުން އެޅި އެވެ.
އޭގެ ފަހުން އީރާނުން ވަނީ ޔުރޭނިއަމް މުއްސަނދިކުރުމުގައި ކަނޑައަޅާފައިވާ މިންގަނޑުތަކާ ހިލާފުވެފަ އެވެ. އެމެރިކާގެ އޮފިޝަލުން ބުނާ ގޮތުގައި، އާ އެއްބަސްވުމެއްގައި ޔުރޭނިއަމް މުއްސަނދިކުރުން ހުއްޓާލުމާއި އީރާނުގެ މިސައިލް ޕްރޮގްރާމް ހަނިކުރުމާއި ސަރަހައްދީ ހަނގުރާމަވެރި ޖަމާއަތްތަކަށް އެހީތެރިވުން ހުއްޓާލުން ހިމަނަންޖެހެ އެވެ.