ގެއްލިގެން ހޯދަމުން ދިޔަތާ ދެ ދުވަސް ފަހުން މަރުވެފައި އޮއްވައި ފެނުނީ 24 އަހަރުގެ ބިދޭސީއެއް ކަމަށް ފުލުހުން މިއަދު ބުނެފިއެވެ. ފުލުހުން އިއްޔެ ހަވީރު ވަނީ ތިލަފުށިން, މިދިޔަ ހޯމަ ދުވަހުން ފެށިގެން ބިދޭސީއަކު ގެއްލިގެން ހޯދަމުން އަންނަ ކަމަށް ބުނެފައެވެ. އަދި ރޭ ފުލުހުން ވަނީ އެ ބިދޭސީ މީހާ މަރުވެފައި އޮއްވައި ފެނިފައިވާ ކަމަށް ބުނެފައެވެ. އެ މީހާގެ ވަނަވަރު ހާމަ ކުރަމުން ފުލުހުން މިއަދު ބުނީ, މަރުވެފައި އޮއްވާ ފެނިފައިވަނީ ބަންގްލަދޭޝްގެ ރައްޔިތެއް ކަމަށްވާ, އުމުރުން 24 އަހަރުގެ އަމީން މިއާ ކަމަށެވެ. https://www.sun.mv/217274 ފުލުހުން އިތުރަށް ބުނީ މިހާތަނަށް ބެލި ބެލުމުން، އަމީން މިއާ މަރުވުމުގެ ހާދިސާ ހިނގާފައިވަނީ އޭނާ ގެއްލުނު, މިދިޔަ ހޯމަ ދުވަހުކަން ވަނީ އެނގިފައި ކަމަށެވެ. "މި މައްސަލައިގެ ތަހުގީގު ކުރިއަށްދާ މިންވަރަކުން ހާމަކުރެވެންހުރި މައުލޫމާތު ހާމަކުރަމުންދާނެ ވާހަކަ ދަންނަވަން," ފުލުހުން ބުންޏެވެ. މި މަރުގައި ޝައްކު ކުރެވޭ ކަންތައްތަކެއް ވާކަމެއް ނުވަތަ ނޫން ކަމެއް ވެސް ފުލުހުން ނުބުނެއެވެ.