ކޮލަމްބިއާގެ ދައުލަތުގެ އެއާލައިން ކަމަށްވާ "ސަޓޭނާ" އިން ދަތުރުކުރި ކުޑަ ކޮމާޝަލް ބޯޓެއް އިއްޔެ ވެއްޓި، އޭގައި ތިބި ހުރިހާ އެންމެން މަރުވެއްޖެ ކަމަށް އެ ގައުމުގެ ކަމާބެހޭ އިދާރާތަކުން ކަށަވަރުކޮށްދީފިއެވެ.
މި ހާދިސާ ހިނގާފައިވަނީ ކޮލަމްބިއާގެ އިރުއުތުރު ޕްރޮވިންސެއް ކަމަށްވާ "ނޯޓޭ ޑި ސަންޓަންޑަރ" ގެ އެކަހެރި ސަރަހައްދަކަށެވެ.
ރަޖިސްޓްރީ ނަންބަރު އެޗް.ކޭ-4709 ގެ "ބީޗްކްރާފްޓް 1900" ނަމަކަށް ކިޔާ މި ބޯޓަކީ ކޫކޫޓާގެ ކަމީލޯ ޑާޒާ އިންޓަނޭޝަނަލް އެއާޕޯޓުން ފުރައިގެން އޮކާނާގެ އަގުއާސް ކްލާރަސް އެއާޕޯޓަށް ދަތުރުކުރި ފްލައިޓެކެވެ. އެ ގައުމުގެ ގަޑިން ހެނދުނު 11:42 ހާއިރު މި ބޯޓު ފުރާފައިވަނީ ވަރަށް ކުރު ދަތުރަކަށެވެ. ނަމަވެސް، ފުރިތާ ގާތްގަނޑަކަށް 12 މިނެޓު ފަހުން އެއާ ޓްރެފިކް ކޮންޓްރޯލާ ގުޅުން ކެނޑިފައިވާ ކަމަށާއި، ބޯޓުގެ އިމަޖެންސީ ލޮކޭޓާ ބީކަން ވެސް މަސައްކަތް ކޮށްފައިނުވާ ކަމަށް ސަޓޭނާ އެއާލައިނާއި އޭވިއޭޝަން އިދާރާތަކުން ހާމަކޮށްފައިވެއެވެ.
ބޯޓުގެ ހަބަރެއް ނުވާތާ އިރުގަނޑެއް ފަހުން، ވެނެޒުއޭލާ ބޯޑަރާ ކައިރީގައި އޮންނަ ފަރުބަދަަމަތީ ސަރަހައްދެއް ކަމަށްވާ "ލަ ޕްލާޔާ ޑި ބެލެން" ގެ ކިޔުރަސިކާ އަވަށުގެ ކައިރިން ބޯޓުގެ ބައިތައް ފެނިފައިވާ ކަމަށް އެ ސަރަހައްދުގެ މީހުންނާއި އޮފިޝަލުން ވަނީ ރިޕޯޓްކޮށްފައެވެ. ކޮލަމްބިއާގެ އެއަރޯސްޕޭސް ފޯސްއާއި ނޭޝަނަލް އާމީގެ ޓީމުތަކުން އެ ސަރަހައްދަށް ގޮސް ބެލިބެލުމުން، ބޯޓުގައި ތިބި 13 ފަސިންޖަރުންނާއި 2 ފަޅުވެރިންގެ ތެރެއިން އެކަކުވެސް ސަލާމަތްވެފައި ނުވާކަން ވަނީ ކަށަވަރުވެފައެވެ. ބޯޓު ވެއްޓުނު ސަރަހައްދަކީ ގަސް ބޯ، އުސް ފަރުބަދަތައް ގިނަ ތަނަކަށްވުމުން ސަލާމަތްކުރާ ފަރާތްތަކަށާއި ތަހުގީގު ޓީމުތަކަށް އެ ސަރަހައްދަށް ވަނުމަށް ބޮޑެތި ގޮންޖެހުންތަކަކާ ކުރިމަތިވިއެވެ.
ވެއްޓުނު މަތިންދާބޯޓިގެ ބައިތަކެއް-- ފޮޓޯ/ އެސް.ސީ.އެމް.ޕީ
މި ހާދިސާގައި މަރުވި މީހުންގެ ތެރޭގައި ކޮލަމްބިއާގެ ހައުސް އޮފް ރެޕްރެޒެންޓޭޓިވްސްގެ މެންބަރެއް ކަމަށްވާ، އުމުރުން 36 އަހަރުގެ ދިއޯޖެނިސް ކިއުންޓޭރޯ ހިމެނެއެވެ. އޭނާއަކީ އިންސާނީ ހައްގުތަކަށް މަސައްކަތްކުރާ މަޝްހޫރު ވަކީލެއްގެ އިތުރުން، 2016 ވަނަ އަހަރުގެ ސުލްހައިގެ އެއްބަސްވުމުގެ ދަށުން ދާޚިލީ ހަނގުރާމައިގެ ޝިކާރައަކަށްވީ މީހުން ތަމްސީލުކުރުމަށް ހާއްސަކޮށްފައިވާ ގޮނޑިއަކަށް އިންތިޚާބުވެފައިވާ ބޭފުޅެކެވެ. މީގެ އިތުރުން ކުރިއަށް އޮތް އިންތިޚާބުގައި ވާދަކުރައްވާ ކެންޑިޑޭޓެއް ކަމަށްވާ ކާލޯސް ސަލްސެޑޯއާއި ކިއުންޓޭރޯގެ ޓީމުގެ ބައެއް މެންބަރުން ވެސް މި ބޯޓުން ދަތުރުކުރިއެވެ. ކޮލަމްބިއާގެ ރައީސް ގުސްތާވޯ ޕެޓްރޯއާއި ގައުމުގެ އިސްވެރިން ވަނީ މި ހިތާމަވެރި ދަނޑިވަޅުގައި މަރުވި މީހުންގެ އާއިލާތަކަށް ތައުޒިޔާ ފޮނުއްވާފައެވެ.
ކޮލަމްބިއާގެ ސިވިލް އޭވިއޭޝަން އޮތޯރިޓީން މިހާރު ވަނީ ބޯޓު ވެއްޓެން ދިމާވި ސަބަބު ހޯދުމަށް ރަސްމީ ތަހުގީގެއް ފަށާފައެވެ. ބޯޓު ވެއްޓުނު ސީދާ ސަބަބެއް އަދި ކަށަވަރު ނުވި ނަމަވެސް، ރޭޑަރުން ބޯޓު ގެއްލުނު ސަރަހައްދަކީ މޫސުން ވަރަށް އަވަސް އަވަހަށް ބަދަލުވާ ފަރުބަދަަމަތީ ސަރަހައްދެއްކަން ފާހަގަކުރެވެއެވެ. މި ހާދިސާއާ ގުޅިގެން ކުރިއަށްދާ މަސައްކަތްތައް ވިލަރެސްކުރުމަށް ކޮމާންޑް ޕޯސްޓެއް ގާއިމުކޮށްފައިވާއިރު، ސަޓޭނާ އެއާލައިނުން ވަނީ މަރުވި މީހުންގެ އާއިލާތަކަށް ބޭނުންވާ އެހީތެރިކަން ފޯރުކޮށްދޭނެ ކަމަށް ބުނެފައެވެ.