ހޯރްމޫޒް ކަނޑުއޮޅި ހުޅުވައި، ހަނގުރާމަ ހުއްޓާލަން އީރާނުން އާހުށަހެޅުމެއް ހުށަހަޅައިފި ކަމަށް މީޑިއާ ރިޕޯޓްތައް ބުނެފިއެވެ.
އެމެރިކާގެ އޮފިޝަލަކާއި މިކަމުގެ މައުލޫމާތު ހުރި ދެ މަސްދަރަކާ ހަވާލާދީ އެމެރިކާގެ ނޫސް އެޖެންސީއަކުން ބުނެފައިވަނީ، ހޯރްމޫޒް ކަނޑުއޮޅި ހުޅުވާލުމަށާއި ހަނގުރާމަ ނިމުމަކަށް ގެނައުމަށް އެއްބަސްވުމަކަށް އައުމަށް އީރާނުން އެމެރިކާއަށް އާ ހުށަހެޅުމެއް ހުށަހަޅާފައިވާ ކަމަށެވެ. މި ހުށަހެޅުމުގައި "ނިއުކްލިއާ މަޝްވަރާތައް ފަހުގެ މަރުހަލާއަކަށް ފަސްކުރުމަށް" ހިމަނާފައިވާ ކަމަށްވެސް މީޑިއާ ރިޕޯޓްތައް ބުނެފައިވެއެވެ.
އެމެރިކާގެ އެކްސިއޯސް އިން ރިޕޯޓްކޮށްފައިވާ ގޮތުގައި އީރާނުން މި ހުށަހެޅުން ހުށަހަޅާފައިވަނީ ޕާކިސްތާނުގެ މެދުވެރިން މެދުވެރިކޮށެވެ.
ނަމަވެސް، ހޯރްމޫޒް ކަނޑުއޮޅިއާ މެދު އެއްބަސްވުމަކަށް އައުމާއި އީރާނުގެ ބަނދަރުތަކަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތައް އުވާލުމުން، އީރާނުން ރައްކާކޮށްފައިވާ މުއްސަނދިކޮށްފައިވާ ޔުރޭނިއަމް ދޫކޮށްލުމަށާއި، މަދުވެގެން ދިހަ އަހަރު ދުވަހުގެ މުއްދަތަށް ޔުރޭނިއަމް މުއްސަނދިކުރުން ހުއްޓާލުމަށް ޓްރަމްޕަށް ބާރުފޯރުވޭނެ އެއްވެސް ވަސީލަތެއް ނޯންނާނެ ކަމަށް އެ ނޫހުން ބުނެފައިވެއެވެ.
މަޢުލޫމާތު އެނގޭ ދެ މަޞްދަރަކުން ބުނި ގޮތުގައި، ޕާކިސްތާންގެ އިސްލާމްއާބާދުގައި ބޭއްވި ބައްދަލުވުންތަކުގައި އީރާންގެ ފޮރިން މިނިސްޓަރ އަރަގްޗީ ވަނީ ނިއުކްލިއަރ މައްސަލަ ބާއްވާފައި އެހެން ކަންކަމަށް އިސްކަންދިނުމުގެ ހުށަހެޅުމެއް ހުށަހަޅާފައެވެ.
އެއް މަޞްދަރަކުން ބުނި ގޮތުގައި، އެމެރިކާގެ ހުށަހެޅުންތަކާ މެދު އަމަލުކުރާނެ ގޮތަކާ މެދު އީރާނުގެ ލީޑަރޝިޕްގެ މެދުގައި އެއްބަސްވުމަކަށް އާދެވިފައި ނުވާކަން، ހަފުތާ ބަންދުގައި ޕާކިސްތާން، މިޞްރު، ތުރުކީ އަދި ޤަޠަރުގެ މެދުވެރިންނަށް އަރަގްޗީ ވަނީ ސާފުކޮށްދީފައެވެ.
ޕާކިސްތާނުގެ މެދުވެރިން މެދުވެރިކޮށް އެމެރިކާއަށް ހުށަހެޅި އާ ހުށަހެޅުމުގައި ބޮޑަށް އިސްކަންދީފައިވަނީ ކަނޑުއޮޅީގެ މައްސަލައާއި އެމެރިކާއިން އަޅާފައިވާ ހުރަސްތަކުގެ މައްސަލަ ފުރަތަމަ ޙައްލުކުރުމަށެވެ. އޭގެ ބައެއްގެ ގޮތުގައި، ހަމަލާބަދަލުކުރުން ހުއްޓާލާފައި އޮތް އޮތުން ދިގު މުއްދަތަކަށް އިތުރުކުރުން ނުވަތަ ދާއިމީކޮށް ހަނގުރާމަ ހުއްޓާލުމަށް ދެ ފަރާތުން އެއްބަސްވާނެއެވެ. އެ ހުށަހެޅުމުގައިވާ ގޮތުން، ނިއުކްލިއަރ މަޝްވަރާތައް ފަށާނީ ކަނޑުއޮޅި ހުޅުވާލައި، އަޅާފައިވާ ހުރަސްތައް ނައްތާލުމަށްފަހު، ފަހުގެ މަރުޙަލާއެއްގައެވެ.
އެމެރިކާއަށް މި ހުށަހެޅުން ލިބިފައިވީ ނަމަވެސް، އެމެރިކާއިން މިކަމާ މެދު މަޝްވަރާކުރަން ބޭނުންވޭތޯ އަދި ސާފުނުވާކަމަށް މީޑިއާ ރިޕޯޓްތައް ބުނެއެވެ.
"މިއީ ނާޒުކު ޑިޕްލޮމެޓިކް މަޝްވަރާތަކެއް، އަދި އެމެރިކާއިން ނޫސްތައް މެދުވެރިކޮށް މަޝްވަރާއެއް ނުކުރާނެ. ރައީސް ވިދާޅުވެފައިވާ ފަދައިން، ކަންކަން ނިންމުމުގެ ބާރު އޮތީ އެމެރިކާ އަތުގައި. އެމެރިކާގެ ރައްޔިތުންގެ މަސްލަހަތު އިސްކުރާ އެއްބަސްވުމެއް ނޫނީ ގާއިމެއް ނުކުރާނެ، އަދި އީރާނަށް ނިއުކްލިއަރ ހަތިޔާރެއް ހޯދުމުގެ ފުރުސަތެއް ދުވަހަކުވެސް ނުދޭނެ،" ވައިޓް ހައުސްގެ ތަރުޖަމާނު އޮލިވިއާ ވޭލްސް އެކްސިއޯސްއަށް ވިދާޅުވިއެވެ.