ކެނެޑާގެ ގައުމީ އެއާލައިން، އެއާ ކެނެޑާގެ ކުރީގެ ކެޕްޓަނަކު، ބޭނުންވާ ލައިސަންސް ނެތި 17 އަހަރު ވަންދެން މަތިންދާބޯޓު ދުއްވި މައްސަލައެއްގައި ހައްޔަރުކޮށްފިއެވެ. އުމުރުން 59 އަހަރުގެ ޖެފްރީ ވޯލް ނަމަކަށް ކިޔާ މި މީހާ ހައްޔަރުކޮށްފައިވަނީ، އޮންޓޭރިއޯގެ ޕީލް ރީޖަނަލް ފުލުހުން ހަތަރު މަސްދުވަހު ހިންގި ތަހުގީގަކަށްފަހު، މި މަހުގެ އެއްވަނަ ދުވަހެވެ. "ޕްރޮޖެކް އިކަރަސް" ގެ ނަމުގައި ފުލުހުން ހިންގި މި ހާއްސަ ތަހުގީގު ފަށާފައިވަނީ، މިއަހަރުގެ ޖެނުއަރީ މަހު ކެނެޑާގެ ޓްރާންސްޕޯޓް އޮތޯރިޓީން އޭނާގެ ލައިސަންސާ ގުޅޭ މައުލޫމާތުތައް މުރާޖައާކުރަން ފެށުމާ ގުޅިގެންނެވެ. އޭނާގެ މައްޗަށް ވަނީ މަކަރާއި ހީލަތް ހެދުމުގެ ދައުވާ އާއި އިތުރު ޖިނާއީ ދައުވާތަކެއް އުފުލާފައެވެ. ފުލުހުންގެ ތަހުގީގުން ހާމަވެފައިވާ ގޮތުގައި، 2009 ވަނަ އަހަރުން ފެށިގެން 2025 ވަނަ އަހަރު އޭނާ ރިޓަޔާކުރުމާ ހަމައަށް، ވޯލް ވަނީ ކެޕްޓަނެއްގެ ގޮތުގައި 900 އަށްވުރެ ގިނަ އެތެރޭގެ އަދި ބައިނަލްއަގުވާމީ ފްލައިޓްތައް ދުއްވާފައެވެ. އޭނާ ދުއްވާފައިވާ ބޯޓުތަކުގެ ތެރޭގައި ބޯއިންގް 767، 777 އަދި 787 މަރުކާގެ ބޮޑެތި މަތިންދާބޯޓުތައް ހިމެނެއެވެ. މި މުއްދަތުގެ ތެރޭގައި އޭނާ ވަނީ މުސާރައިގެ ގޮތުގައި 2.9 މިލިއަން ޑޮލަރަށްވުރެ ގިނައިން ހޯދާފައެވެ. ވޯލްގެ އަތުގައި ކޮމާޝަލް ޕައިލެޓް ލައިސަންސެއް (ސީޕީއެލް) އޮތް ނަމަވެސް، ބޮޑެތި ކޮމާޝަލް މަތިންދާބޯޓުތަކުގެ ކެޕްޓަނެއްގެ ގޮތުގައި މަސައްކަތްކުރުމަށް ބޭނުންވާ އެންމެ މަތީ ފަންތީގެ ލައިސަންސް ކަމަށްވާ 'އެއާލައިން ޓްރާންސްޕޯޓް ޕައިލެޓް ލައިސަންސް' (އޭޓީޕީއެލް) ނެތެވެ. ކޮމާޝަލް ލައިސަންސަކީ އުޖޫރައަށް ބޯޓު ދުއްވުމުގެ ހުއްދަދޭ ލައިސަންސެއް ނަމަވެސް، އެއާލައިންތަކުގެ ބޮޑެތި ބޯޓުތަކުގެ ކޮމާންޑް ނެގުމަށް އޭޓީޕީއެލް ލައިސަންސް އޮތުން ގާނޫނީ ގޮތުން ލާޒިމުކުރެއެވެ. މި ލައިސަންސް ހޯދުމަށް ޓަކައި އިތުރު އިމްތިހާނުތަކަކާއި ތަޖުރިބާތަކެއް ފުރިހަމަކުރަންޖެހެއެވެ. ފުލުހުން ބުނި ގޮތުގައި އޭނާ ވަނީ ސައްހަ ނޫން ލިޔެކިޔުންތަކެއް ބޭނުންކޮށްގެން އެއާ ކެނެޑާ އަދި ކެނެޑާގެ ސިވިލް އޭވިއޭޝަން އޮތޯރިޓީއަށް އޮޅުވާލާފައެވެ. މީގެ ސަބަބުން އޭނާގެ މައްޗަށް ވަނީ 5،000 ޑޮލަރަށްވުރެ މަތިން ޖޫރިމަނާކޮށް، މަކަރާއި ހީލަތް ހެދުމުގެ ދައުވާއަކާއި، ފޯޖުކޮށްފައިވާ ލިޔެކިޔުން ބޭނުންކުރުމުގެ ދެ ދައުވާއަކާއި، ކައުންޓަފީޓް މާކް ގެންގުޅުމުގެ ތިން ދައުވާގެ އިތުރުން އާންމު މަސްލަހަތު ނަގާލުމުގެ ދައުވާއެއް އުފުލާފައެވެ. މި މައްސަލައާ ގުޅިގެން ޕީލް ރީޖަނަލް ފުލުހުންގެ ވެރިޔާ ނިޝާން ދުރައިއައްޕާ ނެރުއްވި ބަޔާނެއްގައި ވިދާޅުވި ގޮތުގައި، މިއީ އާންމުންގެ އިތުބާރާއި ސަލާމަތަށް އޮތް ވަރަށް ބޮޑު ނުރައްކަލެކެވެ. އޭނާ ފާހަގަކުރެއްވި ގޮތުގައި، 900 އަށްވުރެ ގިނަ ފްލައިޓްގައި ދަތުރުކުރި އެތައް ލައްކަ ފަސިންޖަރުންނެއްގެ ފުރާނަ ނުރައްކަލުގެ ތެރެއަށް ވައްޓާލާފައިވާ ކަމަށް ތުހުމަތުކުރެވޭތީ، މިއީ ވަރަށް ކަންބޮޑުވާ މައްސަލައެކެވެ. ފުލުހުންގެ ޑެޕިއުޓީ ޗީފް ނިކް މިލިނޮވިޗް ވިދާޅުވި ގޮތުގައި، މިއީ ފެމިލީ ޑޮކްޓަރެއްގެ ލައިސަންސް އޮތް މީހަކު ސިކުނޑީގެ އޮޕަރޭޝަނެއް ކުރުން ފަދަ ކަމެކެވެ. ފާހަގަކޮށްލެވޭ ގޮތުގައި، ވޯލް ވަނީ 1998 ވަނަ އަހަރު އެއާ ކެނެޑާއާ ގުޅުމުގެ ކުރިން އަސްކަރިއްޔާގައިވެސް ހެލިކޮޕްޓަރު ޕައިލެޓެއްގެ ގޮތުގައި މަސައްކަތްކޮށްފައެވެ. އޭނާ ވަނީ އޭނާގެ ކެރިއަރުގައި އެއާ ކެނެޑާ ޕައިލެޓްސް އެސޯސިއޭޝަންގެ މާސްޓާ އެގްޒެކެޓިވް ކައުންސިލްގެ ޗެއާމަންކަން ފަދަ އިސް މަގާމުތައްވެސް ފުރާފައެވެ. އަދި ރިޓާޔާކުރުމަށްފަހު އޭނާ ދިޔައީ ޖޯޖިއަން ކޮލެޖުގައިވެސް މަސައްކަތްކުރަމުންނެވެ.