އަންހެނުން ފަނޑިޔާރުކަންކުރުމަކީ ދީނީ ގޮތުން ހުއްދަ ކަމެއްގެ ގޮތުގައި ކުރީގެ ރައީސް މައުމޫން އަބްދުލްގައްޔޫމް ވިދާޅުވީ ސަހާބީންގެ ބޮލުގައި ދޮގު އިލްޒާމް އެޅުއްވުމަށްފަހު ކަމަށް ވެރިކަންކުރާ ޕީއެންސީއަށް ނިސްބަތްވާ މައްޗަންގޮޅި އުތުރު ދާއިރާގެ މެންބަރު އިބްރާހިމް މުހައްމަދު (ޖަނާބު) ވިދާޅުވެއްޖެ އެވެ.
ސުޕްރީމް ކޯޓުގެ ފަނޑިޔާރުން ވަކިކުރަން ސަރުކާރުން ކުރަމުންދާ މަސައްކަތުގެ ތެރެއިން އަންހެނުން ފަނޑިޔާރުކަން ކުރުމާ މެދު ސަރުކާރަށް ތާއީދުކުރާ ގިނަ ބަޔަކު ދަނީ ސުވާލު އުފައްދަމުންނެވެ. އެކަމާ ގުޅޭގޮތުން މައުމޫން ވަނީ 'މިހާރު' ނޫހުގައި ލިޔުއްވާފަ އެވެ.
އެ ލިޔުއްވުން ހިއްސާކޮށް ޖަނާބުގެ ސޯޝަލް މީޑިއާ އެކައުންޓުން ކުރި ޕޯސްޓެއްގައި ވިދާޅުވީ، މައުމޫން ސަހާބީންނާމެދު ސުވާލު އުފައްދާ އެ ބޭބޭކަލުންގެ ބޮލުގައި ދޮގު އިލްޒާމް އަޅުވާފައިވާ ކަމަށެވެ.
"މިއީ އިސްލާމީ އުއްމަތް އެއީ ސައްހަ ކަމަށް ބަލައިގަނެފައިވާ ސަހީހު ބުހާރީގެ ހަދީސަކާމެދު ޝައްކު އުފެއްދުމާއި، މާތްވެގެންވާ ސަހާބީއެއްގެ މައްޗަށް ދޮގުއިލްޒާމް އަޅުވައި އިތުބާރު ވައްޓާލުމަށް މަސައްކަތްކޮށްފައިވާ، އިލްމީގޮތުން ބުރަދަނެއް ނެތް އޮޅުވާލުންތަކެއް،" ޖަނާބު ލިޔުއްވާފައިވެ އެވެ.
އޭނާ މިހެން ވިދާޅުވި ނަމަވެސް މައުމޫނުގެ ލިޔުމުގައި ބުހާރީއާމެދު ސުވާލު އުފައްދަވާފައެއް ނުވެ އެވެ. އެމަނިކުފާނު ވިދާޅުވެފައިވަނީ އެ ހަދީސް ރިވާކުރެއްވި އަބޫބަކުރުއަކީ އިތުބާރުކުރެވޭ ރާވީއެއް ނޫން ކަމަށެވެ.
އެކަން ދޭހަވަނީ ސަހާބީ ބޭކަލާ ގުޅޭގޮތުން އަބޫބަކުރު އިތުބާރު ނުހިފޭ ދޮގު ވާހަކަތަކެއް ދެއްކި މައްސަލައެއް ސާބިތުވެ އުމަރުގެފާނުގެ ހިލާފަތުގައި އަބޫބަކުރުގެ ގައިގަ ހައްދު ޖަހާފައިވުން ކަމަށް މައުމޫނުގެ ލިޔުމުގައި ވިދާޅުވެފައިވެ އެވެ.
މައުމޫނުގެ ލިޔުއްވުމުގައި އެމަނިކުފާނު ވަނީ ދީނީ އެކި އަސްލުތަކަށް ރިއާޔަތްކޮށް އަންހެނަކު ފަނޑިޔާރުކަން ކުރުމަކީ ދީން މަނާކުރާ ކަމެއް ނޫންކަމަށް ވިދާޅުވެފަ އެވެ. އެ ލިޔުން ގިނަ ބަޔަކު ހިއްސާކޮށްފައިވާއިރު މައުމޫނަށް ތައުރީފާއި ފާޑުކިޔުން އަމާޒުވެފައިވެ އެވެ.
މައުމޫން، އެމަނިކުފާނުގެ ލިޔުން ނިންމަވާލައްވާފައިވަނީ މިސްރާއި ޕާކިސްތާނު އަދި ބަންގްލަދޭޝް ފަދަ އިސްލާމީ ގައުމުތަކުގައި މިހާރުވެސް އަންހެން ފަނޑިޔާރުން ހިދުމަތް ކުރައްވާ ކަމަށާއި މެލޭޝިއާގެ އުއްތަމަ ފަނޑިޔާރަކީ އަންހެން ބޭފެޅުއްކަން ފާހަގަކުރައްވަމުންނެވެ.
ޖަނާބު މިފަދައިން މައުމޫނަށް ތުހުމަތުކޮށްފައިވާއިރު މީގެ ދެތިން ދުވަސްކުރިން އޭނާ ވަނީ ދޮގު ފެތުރުމަކީ ޖިނާއީ ކުށަކަށް ހަދަން ޖެހޭ ކަމަށް ވިދާޅުވެފަ އެވެ.