އިސްލާމް ދީނުގައި ޙަރާމްވެގެންވަނީ ވަރަށް މަދު ކަންކަމެވެ. އެހެންކަމުން ހަރާމްވެގެންވާ ކަންކަން ހުރިހާ މުސްލިމުންނަށްވެސް ރަނގަޅަށް އެނގޭނެއެވެ. އެއިން ކަމަކާއި ގުޅުންހުރި ވާހަކައެއް ދައްކާނަމަ އެކަންކުރަންވާނީ އެކަމުގެ މަޢުލޫމާތު ފުރިހަމައަށް އެނގިތިބެގެންނެވެ.  
ތިމާގެ ކިބައިގައި އެކަމުގެ ޢިލްމް ނެތްނަމަ، ނުވަތަ ހިތުގައި އެއްވެސް މިންވަރަކަށް ޝައްކެއް އޮތްނަމަ އިތުބާރުކުރެވޭ ޢިލްމްވެރިންގެ އަރިހުން އަހައި އޮޅުން ފިލުވައި ޞައްޙަ މަޢުލުމާތު ލިބިގަންނާށެވެ! މަޢުލޫމާތު ނުހޯދައި ފަތުރާ ވާހަކަތަކަށް އެމީހަކު ޒިންމާ އުފުލަންޖެހޭނެއެވެ.  
ދީނުގައި އޮތީ ޝައްކުގެ މައްޗަށް އެއްވެސް ކަމެއް ނުކުރުމަށެވެ. އެއިގެ ތެރޭގައި ޔަޤީންނުކުރެވޭ ކަންކަމުގެ ވާހަކަ ދެއްކުންވެސް ހިމެނެވެ. ވީމާ ދީނުގެ އެއްވެސް ކަމެއްގެ ވާހަކަ ދައްކާނަމަ ދައްކަންވާނީ ޔަޤީންކުރެވޭ ވާހަކަތަކެވެ.  
މިހާރަށް ބަލައިފިނަމަ ސޯޝަލް މީޑިއާއަކީ ކޮންމެ މީހަކަށްވެސް ވަރަށް ފަސޭހައިން ބޭނުންކުރެވެން އޮތް ވަސީލަތެކެވެ. މަދު މިނިޓްކޮޅެއްގެ ތެރޭގައި އެތައް މިލިއަން ބައަކަށް މަޢުލޫމާތު ފޯރުކޮށްދެވެން އޮތް ވަސީލަތެވެ. ވީމާ ޞައްޙަ ހެޔޮ މެސެޖްތައް ފޮނުވައިގެން ޘަވާބު ހޯދަން މަސައްކަތްކުރާށެވެ! ފާފަވެރިވާނެ މެސެޖްތައް ނުކުރާށެވެ!
- އިސްލާމީ ތިލަފަތުގެ ދަރުސަކުން 
ތިރީގައިވާ ލިޔުންވެސް ވިދާޅުވެލައްވާށެވެ!  
ބައެއް މީހުންނާ މެދު ސަހަރޯހީވެއެވެ. ދީނުގައި ކަންކަން އޮތްނެތްގޮތް ނޭނގި ތިބެމެ ކަންކަމާ މެދު ބަސްބުނާތީއެވެ. އާޚިރުގައި، ﷲގެ ދީނުގައި ޙަރާމްކުރައްވައިފައިވާ ކަންކަން "ނޯރމަލައިޒް"ކުރާން ވަކާލާތުކުރެވޭ އިރު ވެސް އެބަޔަކަށް ނޭނގޭތީއެވެ. އަދި އެ ކަންކަމާ ދެކޮޅު ހަދާ ބަޔަކާ އެ ބަޔަކު ވަރަށް ދެކޮޅުވެރިވެ ޒުވާބުދީ ހަދާތީއެވެ. 
މިއީ ވަރަށް ހިތާމަވެރިކަމެކެވެ. މުސްލިމް މުޖުތަމަޢެއް ފަސާދަކުރެވޭ އިރު ވެސް އެ ބަޔަކަށް ރޭކައެއް ނުލައެވެ.  
ﷲއަށް ޓަކައި ބުނަމެވެ. ކަންކަމާ މެދު ބަސްބުނާން އަވަސްއަރައި ނުގަންނާށެވެ. ވިސްނާށެވެ. ފުރަތަމަ ކަމަކަށް ދަންނަ މީހުން ކައިރިން އަހައި އޮޅުން ފިލުވާށެވެ. ނޭނގި ނަމަވެސް ﷲއަށް ދީނަށް ދެރައެއް ނުދޭށެވެ. އިސްލާމީ މުޖުތަމަޢެއް ހަލާކުގެ ތެރެއަށް އެއްލައިލުމަށް އެއްބާރުލުން ނުދޭށެވެ. މިއީ ޒިންމާތަކެކެވެ. މަސްއޫލިއްޔަތުތަކެކެވެ.
- ޝައިޚް ޝަފީޢު ޢަބްދުﷲ