ދުބާއީން ރާއްޖެއަށް މުދާ އުފުލުމަށް ޓަކައި ފްލައިދުބާއީގެ ޚާއްސަ ކާގޯ ފްލައިޓްތަކެއް އަންނަ ބުރާސްފަތި ދުވަހުން ފެށިގެން ފަށަން ނިންމައިފިއެވެ. މިއީ ފްލައިދުބާއީން ވެލާނާ އިންޓަނޭޝަނަލް އެއާޕޯޓަށް "ކާގޯ-އިން-ކެބިން" ނުވަތަ ބޯޓުގެ ކޭބިންގައި މުދާ އުފުލާ ގޮތަށް ދަތުރުތައް ބާއްވާ ފުރަތަމަ ފަހަރެވެ. މިކަން ހާމަކުރެއްވީ ފްލައިދުބާއީގެ ރާއްޖޭގެ އެޖެންޓް، އޭސް އޭވިއޭޝަން ސާވިސަސް މޯލްޑިވްސްގެ މެނޭޖިން ޑިރެކްޓަރު މުޙައްމަދު ފިރާޤެވެ. އޭނާ ވިދާޅުވި ގޮތުގައި، ދުބާއީގެ އަލް މަކްތޫމް އިންޓަނޭޝަނަލް އެއާޕޯޓު (ޑީޑަބްލިއުސީ) އިން މާލެއަށް ކުރާ މި ދަތުރުތައް ފެށުމަށް މޯލްޑިވްސް ސިވިލް އޭވިއޭޝަން އޮތޯރިޓީން އިއްޔެ ވަނީ ހުއްދަ ދީފައެވެ. މިކަމާ ގުޅޭގޮތުން ފިރާޤު ވިދާޅުވީ، މެދުއިރުމަތީ ހަނގުރާމައިގެ މި ދަތި އުނދަގޫ ދަނޑިވަޅުގައި ފްލައިދުބާއީން އިސްނަގައިގެން މިފަދަ ދަތުރުތަކެއް ފެށުމަކީ ވަރަށް ބޮޑަށް ބަލައިގަންނަ ކަމެއް ކަމަށެވެ. އަދި މި ދަތުރުތައް ރޭވިފައިވާ ގޮތުގެ ޝެޑިއުލްއަށް ބަލާއިރު، ކެބިންގައި މުދާ އުފުލާ ފްލައިޓްތައް ބޭއްވުމަށް ހަމަޖެހިފައިވަނީ މި މަހުގެ 29 ގެ ނިޔަލަށް ކަމަށް ވެސް އޭނާ ފާހަގަކުރެއްވިއެވެ. މިއީ ރާއްޖެއަށް މުދާ އެތެރެކުރުމަށް ދިމާވެފައިވާ ދަތިތަކަށް ހައްލެއް ހޯދައިދިނުމުގެ ގޮތުން ފަށާ ދަތުރުތަކެކެވެ. އާންމުކޮށް ފަސިންޖަރުން އުފުލާ ބޯޓުފަހަރުގެ ކެބިންގައި މުދާ އުފުލުމަކީ، ދުނިޔޭގެ ވައިގެ ދަތުރުފަތުރަށް ބޮޑެތި ގޮންޖެހުންތަކެއް ކުރިމަތިވެފައިވާ ދަނޑިވަޅުގައި ގިނަ އެއާލައިންތަކަކުން އަމަލުކުރަމުން އަންނަ ގޮތެކެވެ. މީގެ ސަބަބުން ރާއްޖެއަށް ބޭނުންވާ ޒަރޫރީ މުދަލާއި ކާބޯތަކެތި މެދުކެނޑުމެއްނެތި ގެނައުމަށް މަގުފަހިވެގެންދާނެއެވެ. ފްލައިދުބާއީއަކީ ރާއްޖެއަށް ފުޅާ ދާއިރާއެއްގައި ދަތުރުތައް ކުރަމުން އަންނަ އެއާލައިނެކެވެ. އޭސް އޭވިއޭޝަން ސާވިސަސް މޯލްޑިވްސްއިން އަންނަނީ ރާއްޖޭގައި ފްލައިދުބާއީގެ އޮޕަރޭޝަންތައް ފުޅާކުރުމަށް ގިނަ މަސައްކަތްތަކެއް ކުރަމުންނެވެ. މިގޮތުން، ކާގޯ ދަތުރުތައް ފެށުމަކީ ދެ ގައުމުގެ ދެމެދުގައި އޮންނަ ވިޔަފާރީގެ ގުޅުން އިތުރަށް ހަރުދަނާވެގެންދާނެ ކަމެއް ކަމަށް އެ ކުންފުނިން ދެކެއެވެ.