ވ. ފެލިދޫ ކައިރިން ދަތުރުކުރި ލޯންޗެއް ބަންޑުންޖަހާލައި، ކަނޑަށް ވެއްޓުނު މީހުންގެ ތެރެއިން ދެ މީހަކު ގެއްލިގެން ހޯދުމުގެ މަސައްކަތް ފުލުހުން ފަށައިފި އެވެ.ދިވެހި ފުލުހުން ވިދާޅުވީ، މި ހާދިސާގެ މައުލޫމާތު ފުލުހުންނަށް ރިޕޯޓުކޮށްފައިވަނީ މިމަހުގެ 19 ވަނަ ދުވަހުގެ ރޭ 01:15 އެހައިކަންހާއިރުކަމަށެވެ.މި ހާދިސާ ހިނގިއިރު އެ ލޯންޗުގައި 7 މީހުން ދަތުރުކުރަމުން ދިޔަކަމަށް ފުލުހުން ވިދާޅުވެ އެވެ. އަދި މި ހާދިސާގައި އަނިޔާވި 3 މީހަކަށް ވ. އަތޮޅު ހޮސްޕިޓަލުގައި ފަރުވާ ދެމުންދާކަމަށްވެސް ފުލުހުން ވަނީ ވިދާޅުވެފަ އެވެ. މި ޙާދިސާގައި ގެއްލިގެން ހޯދަމުންދާ 2 މީހުންނަކީ އިންޑިއާއަށް ނިސްބަތްވާ ދެ ފިރިހެނުންކަމަށް ފުލުހުން ވަނީ ހާމަކުރައްވާފަ އެވެ.