ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހެއްގައި ބޭއްވުމަށް ފެންނަ ނުފެންނަ ވޯޓެއް ނެގުމަށް ހަމަޖެހިފައިވާއިރު، އެކަމުގައި ގޮތެއް ނިންމުމުގެ ބާރު އޮތީ ރައްޔިތުންގެ އަތުގައި ކަމަށް ރައްޔިތުންގެ މަޖިލީހުގެ ހެންވޭރު އުތުރު ދާއިރާގެ މެންބަރު އަހުމަދު އައިފާން ވިދާޅުވެއްޖެއެވެ.
ކޮންގްރެސް ޕާޓީގެ ހެންވޭރު އުތުރު ދާއިރާގެ ޖަގަހަ ހުޅުވުމަށް މިރޭ ބޭއްވި ޖަލްސާގައި ވާހަކަދައްކަވަމުން އައިފާން ވިދާޅުވީ ދެ އިންތިހާބު އެއްދުވަހެއްގައި ބޭއްވުމާ ގުޅޭ ގޮތުން އިދިކޮޅު މޯލްޑިވްސް ޑިމޮކްރެޓިކް ޕާޓީ (އެމްޑީޕީ) އިން ތަފާތު ގޮތް ގޮތަށް ވާހަކަ ދައްކަމުން އަންނަ ކަމަށެވެ. އެގޮތުން އެކަމުގައި ސަރުކާރުން މިހާރުވެސް ގޮތް ނިންމާފައިވާކަމަށް ދޭހަވާގޮތަށް އެމްޑީޕީް ވާހަކަދައްކަމުން އަންނަ އިރު، އެ ޕާޓީގެ މެންބަރުން ތިބީ ’ހަމައިގައިތޯ‘ ކަމާމެދު އައިފާން ވަނީ ސުވާލު އުފައްދަވާފައެވެ.
އައިފާން ވިދާޅުވީ ރައްޔިތުންނަށް މިހާރު މައުލޫމާތު ފޯރުކޮށްދޭން ޖެހޭނީ 90ގެ އަހަރުތަކުގައި މައުލޫމާތު ފޯރުކޮށްދިން ގޮތަކަށް ނޫން ކަމަށާއި، އަތުގައި އޮންނަ ފޯނުންވެސް ހޯދަން ބޭނުންވާ މައުލޫމާތު ވަރަށް ސާފުކޮށް ހޯދޭނެ ކަމަށެވެ. ނަމަވެސް ރައްޔިތުން ހޭލުންތެރި ނޫން ކަމަށާއި، ރައްޔިތުންނަށް ހަގީގަތް ސާފުނޫން ކަމަށް ދައްކަން އިދިކޮޅު ފަރާތްތަކުން ހަމަނުޖެހޭ ވާހަކަތައް ދައްކަމުން އަންނަ ކަމަށް އައިފާން ވިދާޅުވިއެވެ.
”ރައްޔިތުން އެ ދުވަހު ނުކުމެ، ރައްޔިތުން އަމިއްލައަށް ވޯޓު ލައިގެން މި ނިންމަނީ އިންތިހާބު އެއްކޮށްލަން ވިޔަސް، ނުކުރަން ވިޔަސް. އެހެންވީމާ މީގައި އެއްވެސް ހާލެއްގައި އިދިކޮޅު ފަރާތްތަކުން މި ދައްކާ، ރައްޔިތުންނަށް އޮޅުވާލައިގެން ދައުރު ދަންމާލުމޭ މި ދައްކާ ވާހަކައަކީ ހަގީގަތުގައި އަޅުގަނޑު ގަބޫލުކުރާ ގޮތުގައި، އެބޭފުޅުން ސިޔާސީ ޕާޓީއަކަށްވެ ހުރެ ދައްކާ ވަރަށް ހަމަނުޖެހޭ، ދެކޮޅު ނުޖެހޭ ވާހަކައެކޭ.. ޒިންމާދާރު ކުޑަ ވާހަކައެއްގެ ގޮތުގައި އަޅުގަނޑު މި ސިފަކުރަނީ.“ އައިފާން ވިދާޅުވިއެވެ.
އައިފާން ވިދާޅުވީ މިފަދަ ދޯހަޅި ވާހަކަތައް ދެއްކުން ހުއްޓާލާއި، ގައުމުގައި ހުރި މައްސަލަތަކަށް ސަރުކާރާއި ބައިވެރިވެގެން ހައްލު ހޯދަން މަސައްކަތް ކުރުމަށް އެ ޕާޓީއަށް ގޮވާލައްވާ ކަމަށެވެ. ނަމަވެސް ދިވެހި ރައްޔިތުންނަށް ހިދުމަތް ކުރުމުގެ އެއްވެސް ނިޔަތެއް އެ ޕާޓީގައި ނެތް ކަމަށް އައިފާން ވިދާޅުވިއެވެ.
އައިފާން ވިދާޅުވީ ސަރުކާރު ޖަވާބުދާރީ ކުރެވޭނީ އެމްޑީޕީގެ ކެންޑިޑޭޓުންނަށް ވޯޓު ދީގެން ކަމަށް އިދިކޮޅު ޕާޓީން ބުނަމުން އަންނަ ކަމަށެވެ. އެ ވާހަކަތަކާ ގުޅޭގޮތުން އެމްޑީޕީއަށް ރައްދު ދެއްވަމުން އައިފާން ވަނީ ލާމަރުކަޒީ ގާނޫނުގައި އޮތީ ކޯއްޗެއްތޯ އެމްޑީޕީއަށް ސާފުވާކަމާމެދު ސުވާލު އުފައްދަވާފައެވެ.
އައިފާން ވިދާޅުވީ ސަރުކާރު ޖަވާބުދާރީ ކުރުވާފަދަ އެއްވެސް ވާހަކައެއް ލާމަރުކަޒީ ގާނޫނުގައި ނޯންނަ ކަމަށެވެ. އަދި ގާނޫނުގައި ބަޔާންކޮށްފައިވަނީ ކައުންސިލްތަކަށް އިންތިހާބުވާ ފަރާތްތަކުން އަދާކުރަންޖެހޭ ޒިންމާތައް ކަމަށް އައިފާން ވިދާޅުވިއެވެ.
އައިފާން ވިދާޅުވީ ކައުންސިލްތަކަށް އިންތިހާބުވާ މެންބަރުން ވާން ޖެހޭނީ ސަރުކާރާ ތޮޅެން ނުކުންނަ ބަޔަކަށް ނޫން ކަމަށާއި، އެއީ ރައްޔިތުންނަށް ދިމާވާ އަސާސީ މައްސަލަތަކާއި މުނިސިޕަލް މައްސަލަތަކުގެ އިތުރުން، ސަރުކާރާއި ގުޅިގެން ރައްޔިތުން ބޭނުންވާ ގޮތަށް ތަރައްގީ ގެނައުމަށް މަސައްކަތް ކުރާ ބަޔަކަށް ވާން ޖެހޭ ކަމަށެވެ. އަދި މި ވިސްނުމުގައި ނުކުމެ ތިބި ކެންޑިޑޭޓުން ތިބީ ވެރިކަން ކުރާ ކޮންގްރެސް ޕާޓީގައި ކަމަށް އައިފާން ވިދާޅުވިއެވެ.