ވެރިކަން ހިންގާ ޕީޕަލްސް ނެޝަނަލް ކޮންގްރެސްގެ ޕާލަމެންޓަރީ ގްރޫޕުގެ ލީޑަރު އިބްރާހިމް ފަލާހުގެ ނަމުގައި ރ. އިންނަމާދޫގައި ހުންނަ ތިން ގޯތީގެ އިތުރުން ހަމަ އެ ރަށުން އިތުރު ތިން ގޯއްޗާއި ހުޅުމާލެއިން ވެސް ގޯއްޗެއް ގަނެފައިވާނެ ކަމަށް އޭނާ ވިދާޅުވެއްޖެ އެވެ.
ފަލާހުގެ ނަމުގައި މިވަގުތު ހަތަރު ބިމެއް އެބަ އޮތެވެ. އެއީ ރ. އިންނަމާދޫ ފަލަކް، ފަތް، އަސުރުހިޔާ އަދި މާލެއިން ގަނެފައިވާ މ. އަސުރުކުރި އެވެ. މާލެއިން އޭނާ ގޯތި ގަތީ ހަތަރު މިލިއަން ރުފިޔާއަށް ކަމަށް ފަލާހު ބުނެ އެވެ. އިންނަމާދޫއިން ގަތް ގޯތީގެ އަގުތަކެއް އޭނާ ހާމައެއް ނުކުރެ އެވެ.
ފަލާހު ރައްޔިތުންގެ މަޖިލީހަށް ހުށަހެޅި މާލީ ބަޔާންތަކުގެ ވާހަކަ ބައެއް މީޑިއާތަކުގައި ރިޕޯޓު ކުރުމުން އޭނާ ވިދާޅުވީ، އޭނާގެ ނަމުގައި މިހާރު ހުރި ބިންތަކުގެ އިތުރުން އިންނަމާދޫއިން ތިން ބިމަކާއި ހުޅުމާލެއިން ބިމެއް ގަނެފައިވާނެ ކަމަށެވެ. ނަމަވެސް އެ ބިންތަކުގެ ރަޖިސްޓްރީ އޭނާގެ ނަމަށް ބަދަލުކޮށް އަދި ނުނިމޭ ކަމަށް ފަލާހު ވިދާޅުވި އެވެ.
"އަދި އިންނަމާދޫ އިން ގަނެފަ ރަޖިސްޓްރީ ބަދަލުވުމުގެ މަރްހަލާގައި ތިން ގޯތި އެބަ އުޅޭ އަދި ހުޅުމާލެ އިން ގަތް ގޯތި ވެސް އުޅެނީ ރަޖިސްޓްރީ ބަދަލުކުރުމުގެ މަރުހަލާގައި. ވަރަށް ބެލިން މިފަހަރުގެ މާލީ ބަޔާނަށް ލެވޭ ވަރަށް ނިންމާލެވޭތޯ ނަމަވެސް ވާގޮތެއް ނުވި،" އެކްސްގައި ކުރެއްވި ޕޯސްޓެއްގައި ފަލާހު ވިދާޅުވި އެވެ.
ފަލާހު އެކްސްގައި ކުރެއްވި ޕޯސްޓުގައި އޭނާ ވިދާޅުވީ އިންނަމާދޫއިން އަލުން ތިން ބިމާއި ހުޅުމާލެއިން ބިމެއް ގަތް ވާހަކަ އޭނާ ހިއްސާ ކުރީ އަންނަ އަހަރު މާލީ ބަޔާން ނެރޭއިރު ނޫސްވެރިން ހައިރާންވެދާނެތީ ކަމަށެވެ.
"މިވާހަކަތައް މިހާ ކުރިން ހިއްސާ މި ކޮށްލީ ފަހަރެއްގައި ﷲ ގެ ރަހްމަތްފުޅުން ދުނިޔޭގައި ހުރެ މިއަންނަ އަހަރު މާލީ ބަޔާން ނެރޭ އިރު ނޫސްވެރިއަކު ފަހަރެއްގައި އާޝޯހުވެގެން ކަނޑަށް ވެޓިދާނެތީ،" އޭނާ ވިދާޅުވެފައިވެ އެވެ.
ފަލާހުގެ މާލީ ބަޔާނުން އެނގޭ ގޮތުގައި އޭނާ މާލެއިން ބިން ގަތީ 2017 ވަނަ އަހަރެވެ. އިންނަމާދޫއިން އޭނާއަށް ލިބިފައިވާ ބަންޑާރަ ބިން ލިބުނީ 2004 ވަނަ އަހަރެވެ. އޭގެ އިތުރުން އިންނަމާދޫއިން މިވަގުތު އޭނާގެ ނަމުގައި ހުރި ދެ ބިން ގަތީ 2020 ވަނަ އަހަރާއި 2022 ވަނަ އަހަރުގަ އެވެ.
އާމްދަނީގެ ގޮތުގައި ފަލާހުއަށް ރައްޔިތުންގެ މަޖިލީހުން 900،000 ރުފިޔާ އަހަރެއްގެ ތެރޭގައި ލިބުނެ އެވެ. އަދި އޭނާގެ ކުންފުނިތަކުން ވެސް މުސާރައިގެ ގޮތުގައި އެ މުއްދަތުގެ ތެރޭގައި 900،000 ރުފިޔާ ލިބުނެވެ. އޭގެ އިތުރުން ގެދޮރު ކުއްޔަށް ދީގެން 3.2 މިލިއަން ރުފިޔާ ލިބުނު ކަމަށް ފަލާހު ބުނެ އެވެ. އާމުދަނީގެ ގޮތުގައި ޖުމުލަ 5،076،000 ރުފިޔާ ލިބުނެވެ.
ފަލާހުގެ ޝެއާ އޮންނަ ތިން ކުންފުންޏެއް އޮވެ އެވެ. އެއީ އޭނާގެ 90 ޕަސެންޓު ޝެއާ އޮންނަ މެރިން ޑިޒައިން މޯލްޑިވްސް ޕްރައިވެޓް ލިމިޓެޑް އާއި 90 ޕަސެންޓު ޝެއާ އޮންނަ ސަން ހޮލިޑޭސް ޕްރައިވެޓް ލިމިޓެޑް އާއި 80 ޕަސެންޓު ޝެއާ އޮންނަ އައިލެންޑް ޓްރޭޑް ޕްރައިވެޓް ލިމިޓެޑް އެވެ.
މެރިން ޑިޒައިން މޯލްޑިވްސް ޕްރައިވެޓް ލިމިޓެޑް
ސަން ހޮލިޑޭސް ޕްރައިވެޓް ލިމިޓެޑް
އައިލެންޑް ޓްރޭޑް ޕްރައިވެޓް ލިމިޓެޑް
ފަލާހުގެ މާލީ ބަޔާންތަކުން އެނގޭ ގޮތުގައި އޭނާއަށް ލިބޭ އާމުދަނީއާ އަޅާބަލާއިރު ބޭންކު އެކައުންޓުތަކުގައި ހުރީ މަދު ފައިސާއެކެވެ. މާލީ ބަޔާނުގައި ބުނެފައި ވަނީ އޭނާގެ ހަތަރު ދިވެހި ރުފިޔާ އެކައުންޓެއްގައި ހުރީ އެންމެ 111،073 ރުފިޔާ ކަމަށެވެ. ޑޮލަރު ދެ އެކައުންޓެއްގައި ވެސް ހުރީ އެންމެ 300 ޑޮލަރެވެ.
މާލީ ބަޔާނުން އެނގޭ ގޮތުގައި ފަލާހު ވަނީ ފެބްރުއަރީ، 2025، ގައި ބޭންކް އޮފް މޯލްޑިވްސް އިން 15.7 މިލިއަން ރުފިޔާގެ ބޮޑު ދަރަންޏެއް ނަގައިފަ އެވެ. އެ ލޯނަށް އޭނާ ވަނީ މި އަހަރުގެ ތެރޭގައި 496،904 ރުފިޔާ ދައްކައިފަ އެވެ. ބާކީ ދައްކަންޖެހޭ އަދަދަކީ 15.2 މިލިއަން ރުފިޔާ އެވެ.
ފަލާހު ވަނީ ބޭންކް އޮފް މޯލްޑިވްސް އިން ވިސާ ގޯލްޑް ކާޑަކާއި އެމެކްސް ގޯލްޑް ކާޑެއް ނަންގަވައިފަ އެވެ. ނަމަވެސް މާލީ ބަޔާނުގައި ބުނެފައި ވަނީ އެ ކާޑުތަކުން އޭނާ އެއްވެސް ބޭނުމެއް ކޮށްފައިނުވާ ކަމަށެވެ. ވިސާ ގޯލްޑު ކާޑުގެ ކްރެޑިޓް ލިމިޓަކީ 9861 ޑޮލަރެވެ. އެމެކްސް ކާޑުގެ ކްރެޑިޓް ލިމިޓަކީ 150،000 ރުފިޔާ އެވެ.
މާލީ ބަޔާނުގައި ބުނެފައިވާ ގޮތުން ފަލާހުގެ ނަމުގައި ރަޖިސްޓްރީކޮށްފައި އޮންނަނީ އެންމެ އުޅަނދެކެވެ. އެއީ އޭނާ 2020 ވަނަ އަހަރު ގަތް ހޮންޑާ އެއާބްލޭޑް ސައިކަލެކެވެ. އެއީ 59،500 ރުފިޔާއަށް ގަތް ސައިކަލެއް ކަމަށް ފަލާހު ބުނެ އެވެ.