ޣައްޒާގެ އެކި ސަރަޙައްދުތަކަށް އިސްރާއީލުގެ ހަތިޔާރުއެޅި ފައުޖުތަކުން ދިން ވަރުގަދަ ހަމަލާތަކެއްގައި ފަލަސްތީނުގެ އިތުރު 14 ރައްޔިތަކު ޝަހީދުވެއްޖެއެވެ. ޝަހީދުވި މީހުންގެ ތެރޭގައި ޖަނާޒާއެއްގައި ބައިވެރިވަމުން ދިޔަ ބަޔަކުވެސް ހިމެނެއެވެ.
ނުސެއިރާތު ރެފިއުޖީ ކޭމްޕުގެ އަލް-ބަލާތާ މާރުކޭޓު ސަރަޙައްދުގައި ހުންނަ އަހުމަދު ޔާސީން މިސްކިތް ކައިރީގައި، މީގެ ކުރިން އިސްރާއީލުގެ ހަމަލާއެއްގައި ޝަހީދުވި މީހެއްގެ ޖަނާޒާއަށް އެއްވެ ތިބި އާންމުންނަށް އަމާޒުކޮށް އިސްރާއީލުން ވަނީ ޑްރޯން ހަމަލާއެއް ދީފައެވެ. މި ހަމަލާގައި 8 މީހަކު ޝަހީދުވެ 20 މީހަކަށް އެކިވަރުގެ އަނިޔާތައް ލިބިފައިވާކަމަށް ޣައްޒާގެ ސިވިލް ޑިފެންސް އެޖެންސީން ވަނީ ކަށަވަރުކޮށްދީފައެވެ.
އިސްރާއީލުގެ އަސްކަރިއްޔާއިން މި ހަމަލާ ދިންކަމަށް އިއުތިރާފުވެފައިވާއިރު، އެ ފަރާތުން ބުނެފައިވަނީ އަމާޒުކުރީ "ޓެރަރިސްޓް" ސެލްއަކަށް ކަމަށެވެ. އަދި އާންމު ރައްޔިތުންނަށް ގެއްލުންތަކެއް ލިބުނު ކަމަށް ބުނާ ވާހަކަތައް ބަލަމުންދާ ކަމަށް އެ ފަރާތުން ބުނެފައިވެއެވެ.
މީގެ އިތުރުން ޣައްޒާގެ އުތުރުގެ ބައިތު ލާހިޔާގައި 52 އަހަރުގެ އަންހެނަކު ޝަހީދުވެފައިވާއިރު، އަޒް-ޒަވާޔާދާ އާއި އަލް-ސަވާރްހާ އަދި ޣައްޒާ ސިޓީއަށް ދިން ހަމަލާތަކުގައިވެސް އިތުރު ބަޔަކު ވަނީ ޝަހީދުވެފައެވެ. މި ހަމަލާތަކުގައި ކުޑަކުދިންނަށްވެސް އަނިޔާތައް ލިބިފައިވާކަމަށް ރިޕޯޓުތައް ބުނެއެވެ.
ހަމާސް ޖަމާއަތުން ވަނީ މި ހަމަލާތައް ހަރުކަށި އިބާރާތުން ކުށްވެރިކޮށްފައެވެ. ހަމާސްއިން ބުނި ގޮތުގައި، އިސްރާއީލުން ހަދާފައިވާ "ސީޒްފަޔާ" (ހަނގުރާމަ މެދުކަނޑާލުން) އެއްބަސްވުމާ ޚިލާފުވެ، ބައިނަލްއަގްވާމީ މުޖުތަމައުގެ ލޯމަތީގައި އެ ފަރާތުން ދަނީ ކުށެއްނެތް ރައްޔިތުން މަރަމުންނެވެ.
އެމެރިކާގެ ރައީސް ޑޮނަލްޑް ޓްރަމްޕާއި، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާ ގުޅޭގޮތުން ސުވާލުތައް އުފެދިފައިވާއިރު، ހަނގުރާމަވެރި ޖަމިއްޔާތަކުން ފާހަގަކުރާ ގޮތުގައި އިސްރާއީލުގެ ހަމަލާތައް ވަނީ މޭ މަހަށް ފަހު އިތުރުވެފައެވެ. އަދި 2026 ވަނަ އަހަރުގެ މިހާތަނަށް ކޮންމެ ދުވަހަކު އެވްރެޖްކޮށް އެއް ކުއްޖަކު އިސްރާއީލުގެ ހަމަލާތަކުގައި ޝަހީދުވަމުންދާ ކަމަށް މީޑިއާ ރިޕޯޓުތަކުން ހާމަވެއެވެ.