ސިނަމާލެ ބުރިޖާ ގުޅިފައިވާ ހައިވޭގައި ބާރު ސްޕީޑުގައި ގަވާއިދާ ހިލާފަށް އޯވާ ޓޭކް ކުރި ސައިކަލެއް އެހެން ސައިކަލެއްގައި ޖެހި ހިނގި އެކްސިޑެންޓަށްފަހުގައި ފިލި މައްސަލައިގައި ދިވެހި ފިރިހެނަކު ހައްޔަރުކޮށްފިއެވެ.
ފުލުހުން ބުނީ އިއްޔެ މެންދުރުފަހު 2:43 ހާއިރު ހިނގި އެ އެކްސިޑެންޓުގައި ބާރު ސްޕީޑުގައި ދުއްވާފައި އައި ސައިކަލުގައި ތިބި ދެ މީހުންނަށް އަނިޔާވެގެން ހުޅުމާލެ ހޮސްޕިޓަލަށް ގެންދިޔަ ކަމަށެވެ.
އެއީ އަންހެނަކާއި ފިރިހެނެއް ކަމަށާއި އެތަނުން އަންހެން މީހާއަށް ހޮސްޕިޓަލުގައި އަދިވެސް ފަރުވާދެމުން އަންނައިރު، ފިރިހެން މީހާ ފަރުވާއަށްފަހު ދޫކޮށްލާފައިވާ ކަމަށް ބުންޏެވެ.
އެ އެކްސިޑެންޓާ ގުޅިގެން ފުލުހުން ހައްޔަރުކޮށްފައިވަނީ ބ. އޭދަފުށި/ ފަސްމީރުގެ، ޝުނާން މުހައްމަދެވެ. އޭނާގެ އުމުރުން 22 އަހަރެވެ.
ފުލުހުން ބުނީ އޭނާ ހައްޔަރުކޮށްފައި ވަނީ އެކްސިޑެންޓްވުމުންވެސް މަޑުނުކޮށް ދިޔުމުން ކަމަށެވެ.
އަދި އޭނާގެ ބަންދާމެދު ގޮތެއް ނިންމުމަށް ކޯޓަށް މިއަދު ހާޒިރު ކުރުމުން ބަންދަށް ފަސް ދުވަސް ޖަހާފައިވާ ކަމަށްވެސް ބުންޏެވެ.