ބޭންކް އޮފް މޯލްޑިވްސް (ބީއެމްއެލް) އިން ޖަމިއްޔާތައް ބާރުވެރިކުރުމަށާއި ރާއްޖޭގައި ދެމެހެއްޓެނެވި ތަރައްގީގެ މަޝްރޫއުތައް ކުރިއެރުވުމަށް އަމާޒުކޮށް ތައާރަފްކުރި 'ބޭންކް ފަންޑް' ގެ ފުރަތަމަ އަހަރުގެ ފަންޑިން ލިބޭ ފަރާތްތައް ހާމަކޮށްފިއެވެ. ބޭންކް ފަންޑަކީ ޖަމިއްޔާތައް ބާރުވެރިކޮށް ދެމެހެއްޓެނެވި ތަރައްގީއަށް ތައާރަފްކުރި ޕްރޮގްރާމެކެވެ.
މިއަހަރުގެ ބޭންކް ފަންޑް ކާމިޔާބުކުރި ފަސް ޖަމިއްޔާގެ ތެރޭގައި މުރަކަ ފާރމް، ޗިލްޑްރަން އޮފް މޯލްޑިވްސް، ދިއްގަރު އެކުވެރި ޒުވާނުންގެ ގުޅުން، ވޭމަންޑޫ ޒުވާނުންގެ ގުޅުން، އަދި ޔުނިޓީ ސްޕޯޓްސް އެކަޑަމީ ހިމެނެއެވެ.
މުރަކަ ފާރމްގެ މަޝްރޫއަކީ ބ. ދަރަވަންދޫގައި މުރަކަ އާލާކުރުމުގެ މަޝްރޫއެކެވެ. މި މަޝްރޫއުގެ މަޤްޞަދަކީ ކަނޑުގެ ދިރުންތައް ރައްކާތެރިކޮށް ދެމެހެއްޓެނިވި ގޮތެއްގައި ބެލެހެއްޓުމެވެ.
ޗިލްޑްރަން އޮފް މޯލްޑިވްސްގެ މަޝްރޫއަކީ ވިލިމާލޭގައި ލައިބްރަރީއެއް ގާއިމްކުރުމެވެ. މި މަޝްރޫއުގެ މަޤްޞަދަކީ ތިމާވެއްޓާމެދު ޝައުވެރިކަން އުފައްދައި، ހޭލުންތެރިކޮށް، އިލްމީ މައުލޫމާތު ފޯރުކޮށްދިނުމެވެ.
ދިއްގަރު އެކުވެރި ޒުވާނުންގެ ގުޅުމުގެ މަޝްރޫއަކީ ކާބޯތަކެތީގެ ރައްކާތެރިކަމާއި ދެމެހެއްޓެނިވި ދަނޑުވެރިކަމުގެ އާދަތަކާއެކު ހިންގާ ދަނޑުވެރިކަމުގެ މަޝްރޫއެކެވެ.
ވޭމަންޑޫ ޒުވާނުންގެ ގުޅުމުގެ މަޝްރޫއަކީ ތ. ވޭމަންޑޫ ސްކޫލުގައި ހާއްސަ އެހީއަށް ބޭނުންވާ ދަރިވަރުންނަށް ސެންސަރީ އަދި ވޮކޭޝަނަލް ތަމްރީނުތަކަށް ޓްރެއިނިންގ ރޫމެއް ގާއިމްކުރުމެވެ. މި މަޝްރޫއުގެ މަޤްޞަދަކީ ހަމަހަމަ ފުރުސަތު ހޯދައިދިނުމެވެ.
ޔުނިޓީ ސްޕޯޓްސް އެކަޑަމީގެ މަޝްރޫއަކީ ށ. ފުނަދޫ ސްކޫލުގައި މީޑިއާ އަދި ކުޅިވަރު ލެބްތަކެއް ތަރައްގީކުރުމެވެ. މި މަޝްރޫއުގެ މަޤްޞަދަކީ ޓެކްނޮލޮޖީ އަދި ކުޅިވަރުގެ ޒަރިއްޔާއިން ޒުވާނުން ބާރުވެރިކުރުމެވެ.
މިކަމާ ގުޅޭ ގޮތުން ބީއެމްއެލްގެ ޑެޕިއުޓީ ސީއީއޯ އަދި އިންޗާރޖް އޮފް ދަ ބޭންކް ޢާއިޝަތު ނޫރައްދީން ވިދާޅުވީ " ބޭންކް ފަންޑަކީ ރާއްޖޭގެ އެކި ކަންކޮޅުތަކުގައި ހެޔޮ ބަދަލުތަކެއް ގެނައުމަށްޓަކައި ޖަމިއްޔާތަކާއެކު މަސައްކަތްކުރުމަށް އަޅުގަނޑުމެން ކުރާ މަސައްކަތުގެ ވަރަށް ފުރިހަމަ މިސާލެއް. މި ފަސް ޕްރޮޖެކްޓުން އަޅުގަނޑުމެންގެ މުޖުތަމައުއަށް ދެމެހެއްޓެނިވި ގޮތެއްގައި ފައިދާ ކުރާނެ. އަދި ޕްރޮޖެކްޓްތަކަށް އެހީތެރިވެދެވޭކަމީ އަޅުގަނޑުމެންނަށް ލިބޭ ފަހުރެއް." 
ބޭންކް ފަންޑަކީ ކޮންމެ އަހަރަކު ފަސް މަޝްރޫއަކަށް 200،000 ރުފިޔާގެ ހިލޭ އެހީ ދިނުމަށް ހިންގާ ޕްރޮގްރާމެކެވެ. މުޖުތަމައުތައް ބާރުވެރިކުރުވައި، ދިވެހިރާއްޖޭގެ ތަރައްގީއަށް ކުރަމުންދާ މަސައްކަތްތަކަށް ބީއެމްއެލް އިން އަބަދުވެސް ނުހަނު ބޮޑު އަހުމިއްޔަތުކަމެއް ދެއެވެ.
ބޭންކް ފަންޑްގެ މި ފުރަތަމަ އަހަރުގެ ކާމިޔާބު ޖަމިއްޔާތްޔާތަކުގެ މަޝްރޫއުތަކުން ރާއްޖޭގެ އެކި ސަރަޙައްދުތަކުގައި ދެމެހެއްޓެނިވި ތަރައްގީއަށް މަގުފަހިވާނެކަމަށް ބީއެމްއެލްއިން އުންމީދުކުރެއެވެ.