އަންނަ އަހަރުގެ ހޫނު މޫސުމަށް ތައްޔާރުވުމުގެ ގޮތުން ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން މާލެ ސަރަޙައްދުގެ ކަރަންޓު ވިއުގަ އަޕްގްރޭޑް ކުރުމުގެ މަސައްކަތް ފަށައިފިއެވެ.
ސްޓެލްކޯގެ ފަރާތުން ބުނެފައިވަނީ، މާލޭގައި އިތުރުވަމުންދާ ކަރަންޓުގެ ބޭނުންތެރިކަމާ އެއްހަމައެއްގައި، ދެމެހެއްޓެނިވި ގޮތެއްގައި ޚިދުމަތް ފޯރުކޮށްދިނުމަށް މަސައްކަތްކުރަމުންދާ ކަމަށެވެ. މި މަސައްކަތުގެ ތެރެއިން، މަޖީދީމަގާއި ސޯސަންމަގު ގުޅޭ ހިސާބުގައި ޤާއިމުކޮށްފައިވާ ސަބްސްޓޭޝަންގެ ޤާބިލުކަން އިތުރުކުރުމުގެ މަސައްކަތް ވަނީ ފެށިފައެވެ.
އިތުރު ތަފްސީލު ދެމުން ސްޓެލްކޯއިން ހާމަކުރި ގޮތުގައި، ކުރިން އެ ސަބްސްޓޭޝަންގައި ބޭނުންކުރަމުން ދިޔަ 630 ކޭވީއޭގެ ޓްރާންސްފޯމަރު ނަގައި، އޭގެ ބަދަލުގައި 1,500 ކޭވީއޭގެ ޓްރާންސްފޯމަރެއް ބަހައްޓާފައިވެއެވެ. މީގެ އިތުރުން، މި އަހަރުގެ ތެރޭގައި ޑިސްޓްރިބިއުޝަން ވިއުގައިގެ ޤާބިލުކަން އިތުރުކުރުމަށް އިތުރު މަސައްކަތްތަކެއް ކުރުމަށް ވަނީ ރޭވިފައެވެ.
ދިގު މުއްދަތުގެ ޕްލޭންތަކުގެ ތެރެއިން، ސްޓެލްކޯއިން ވަނީ ގުޅީފަޅުގައި 150 މެގަވޮޓްގެ ޑުއަލް ފިއުލް އިންޖީނުގެއެއް ޤާއިމުކުރުމަށާއި، މާލެ، ވިލިމާލެ، ގުޅިފަޅު، އަދި ތިލަފުށި ގުޅުވައިދޭ މަތީ ޤާބިލުކަން ހުރި ޓްރާންސްމިޝަން ލައިނެއް ޤާއިމުކުރުމުގެ މަސައްކަތްތަކަށް މަގުފަހިކޮށްފައެވެ. މި މަޝްރޫޢުގެ ދިރާސާތައް ކުރުމަށާއި އަމަލީ މަސައްކަތްތައް ފެށުމަށްޓަކައި ޗައިނާގެ ޓީބީއީއޭ ގްރޫޕް ކޯ ލިމިޓެޑާއެކު މި މަހުގެ 16 ވަނަ ދުވަހު އެއްބަސްވުމެއްގައި ސޮއިކޮށްފައިވެއެވެ.
https://x.com/STELCOMALDIVES/status/1847243595247698253
މި މަސައްކަތްތަކަކީ މާލެ ސަރަޙައްދުގައި އިތުރުވަމުންދާ ކަރަންޓުގެ ބޭނުންތެރިކަމަށް އަމާޒުކޮށް، ދެމެހެއްޓެނިވި ގޮތެއްގައި ކަރަންޓުގެ ޚިދުމަތް ފޯރުކޮށްދިނުމަށް ސްޓެލްކޯއިން ކުރަމުންދާ މަސައްކަތްތަކުގެ ތެރެއިން ބައެކެވެ.
Thiladhun © 2019 – 2023| Made with ❤️ in #Thiladhunmathi
Thiladhun © 2019 – 2022
Made with ❤️ in #Thiladhunmathi