ކްލަބް މޯލްޑިވްސް ފުޓްސަލް ސީޒަންގައި ހިމެނޭ "ކްލެސިކް 2026" ގައި ރޭ ކުޅުނު މެޗުތަކާއެކު ހުޅުމާލެ ހޮސްޕިޓަލް، އެޗްޕީއެސްއެން، ސީއާރުސީ، ބިނާރާއަށް މޮޅެއް ލިބިއްޖެއެވެ. ހުޅުމާލެ ރެހެންދި ފުޓްސަލް ދަނޑުގައި 19 ޓީމާއެކު ފޯރިއާއެކު ކުރިއަށްދާ މި މުބާރާތުގެ ފުރަތަމަ މެޗުގައި އެންމެ ފަހުގެ ޗެމްޕިއަން އެޗްޕީއެސްއެން އަތުން 6-2 އިން މޮޅުވި ހުޅުމާލެ ހޮސްޕިޓަލުން ވަނީ ޖެހިގެން އައި މެޗުގައި ކްލަބް އެވްސެކްއާ ވާދަކޮށް 2-1 އިން މެޗު ކާމިޔާބުކޮށްފައެވެ. މި މެޗުގެ ފުރަތަމަ ހާފުގައި އިބްރާހިމް ސޯލިހާއި ކެޕްޓަން އާދިލް ޢަބްދުލް ރަޙްމާން ލަނޑުތައް ޖަހައި ހުޅުމާލެ ހޮސްޕިޓަލަށް ލީޑު ހޯދައިދިންއިރު، އެވްސެކްގެ ތައުމީން ނޫހު ފަހުން ލަނޑެއް ޖެހި ނަމަވެސް މެޗުން އެ ޓީމު ސަލާމަތެއް ނުވިއެވެ. އޭގެ ފަހުން ކުޅުނު މެޗުގައި ހުޅުމާލެ ހޮސްޕިޓަލުން ވަނީ ބަންޑާރަ ކުލަބު އަތުން 7-0 ގެ ތަފާތު ބޮޑު ނަތީޖާއަކުން ފަސޭހަކަމާއެކު މޮޅުވެފައެވެ. މި މެޗުގައި އިބްރާހީމް ސޯލިހު، ހަސަން ނާއިފް އަދި އާދިލް އަބްދުލް ރަހްމާންގެ ތެރެއިން ކޮންމެ ކުޅުންތެރިއަކު ދެ ލަނޑު ޖެހިއިރު، އަނެއް ލަނޑު ކާމިޔާބުކޮށްދިނީ އަޙްމަދު ފަތީނެވެ. ކްލަބް މޯލްޑިވްސް ކްލެސިކުގައި ސީއާރުސީ ކުޅުނު މެޗުގެ ތެރެއިން-- މި ނަތީޖާތަކާއެކު ހުޅުމާލެ ހޮސްޕިޓަލް މިހާރު އޮތީ ކުޅުނު ތިން މެޗުންވެސް މޮޅުވެ، 9 ޕޮއިންޓާއެކު ގްރޫޕް އޭގެ އެއްވަނައިގައެވެ. ގްރޫޕް އޭގެ ދެވަނައިގައި 6 ޕޮއިންޓާއެކު އޮތީ އެންމެ ފަހުގެ ޗެމްޕިއަން އެޗްޕީއެސްއެންއެވެ. ފުރަތަމަ މެޗުން ބަލިވި ނަމަވެސް، އެ ޓީމުން ވަނީ ބަންޑާރަ ކުލަބު އަތުން 11-1 އިން ބޮޑު މޮޅެއް ހޯދުމަށްފަހު، ރޭ ކުޅުނު މެޗުގައި ރައްޔިތުންގެ މަޖިލިސް އިދާރާ (ޕެމާ) އާ ވާދަކޮށް 1-0 އިން ކުރި ހޯދާފައެވެ. މި މެޗުގައި ފެނިގެންދިޔަ ހަމައެކަނި ލަނޑު އެޗްޕީއެސްއެންއަށް ކާމިޔާބުކޮށްދިނީ މުޙައްމަދު ޝަހީމެވެ. މި ގްރޫޕުގެ ތިންވަނައިގައި ދެ މެޗުން 3 ޕޮއިންޓާއެކު އެވްސެކް އޮތްއިރު، ޕެމާ އަދި ބަންޑާރަ ކުލަބަށް އަދި ޕޮއިންޓެއް ލިބިފައެއް ނުވެއެވެ. ގްރޫޕް ބީގެ ކުރިމަގު ބައްޓަންވަމުންދާއިރު، ކްލަބް ޑީޖޭއޭއިން ވަނީ އެސްއެމްއީ ޑިޖިޓަލް އަތުން 6-0 އިން ބޮޑު މޮޅެއް ހޯދާފައެވެ. އަދި ކްރިމިނަލް ކޯޓު (ސީއާރްސީ) އިން ފުރަތަމަ މެޗުގައި އެމްއީޑީޓީޓީ އަތުން 1-0 އިން މޮޅުވުމަށްފަހު، ރޭ ކުޅުނު މެޗުގައި ހެލްތު ރެކްރިއޭޝަން ކުލަބު އަތުން ވަނީ 8-0 ގެ ތަފާތު ބޮޑު ނަތީޖާއަކުން މޮޅުވެފައެވެ. ސީއާރްސީގެ ޔައިޝް މުސްތަފާ މި މެޗުގައި ހެޓްރިކެއް ހެދިއިރު، އަލީ ޝާޒް ހިލްމީ ދެ ލަނޑު ޖެހިއެވެ. އަދި މުޙައްމަދު ހައްސާން، މުޙައްމަދު ޝަފްރާޒް އަދި މުޙައްމަދު ޝާއިފް ވެސް ލަނޑުތައް ކާމިޔާބުކުރިއެވެ. މި މޮޅާއެކު ސީއާރްސީ ގްރޫޕުގެ އެއްވަނައިގައި އޮތީ ތިން މެޗުން 7 ޕޮއިންޓް ހޯދައިގެންނެވެ. ދެވަނައިގައި އޮތް ޑީޖޭއޭއަށް ދެ މެޗުން 4 ޕޮއިންޓް ލިބިފައިވާއިރު، ތިންވަނައިގައި އޮތް ހެލްތަށް ލިބިފައިވަނީ 3 ޕޮއިންޓެވެ. އެމްއީޑީޓީޓީ އަދި އެސްއެމްއީ ޑިޖިޓަލަށް އަދި ޕޮއިންޓެއް ނުލިބެއެވެ. ފޯރިގަދަ ގްރޫޕް ސީގެ އެއްވަނައިގައި މިހާރު އޮތީ ތިން މެޗުން 7 ޕޮއިންޓް ހޯދާފައިވާ ކުލަބު ބިނާރާއެވެ. ބިނާރާއިން ފުރަތަމަ މެޗުގައި ވިޒިޓް މޯލްޑިވްސް 1-0 އިން ބަލިކުރުމަށްފަހު، ރޭ ކުޅުނު މެޗުގައި ތަޢުލީމީ ގުޅުން ބަލިކުރީ 5-1 ގެ ނަތީޖާއަކުންނެވެ. ބިނާރާގެ އަޙްމަދު ރުވާއު މި މެޗުގައި ހެޓްރިކެއް ހެދިއިރު، އިބްރާހީމް ނާމީ ދެ ލަނޑު ޖެހިއެވެ. ތަޢުލީމީ ގުޅުމުގެ ހަމައެކަނި ލަނޑު ޖަހައިދިނީ އުމަރު ފާރޫގެވެ. މި ގްރޫޕުގައި މީގެ ކުރިން އެމްއެމްއޭ ސޯޝަލް ކްލަބުން ޕީއެސްއެމްއާ ވާދަކޮށް 4-3 އިން މެޗު ކާމިޔާބުކޮށްފައިވާއިރު، މިހާރު ދެވަނައިގައި އޮތް އެމްއެމްއޭއަށް ދެ މެޗުން 4 ޕޮއިންޓް އަދި ތިންވަނައިގައި އޮތް ޕީއެސްއެމްއަށް ދެ މެޗުން 3 ޕޮއިންޓް ލިބިފައިވެއެވެ. ވިޒިޓް މޯލްޑިވްސްއާއި ތަޢުލީމީ ގުޅުމަށް އަދި ޕޮއިންޓެއް ލިބިފައެއް ނުވެއެވެ. ކޮންމެ ގްރޫޕަކުން ވެސް އެންމެ މޮޅު ދެ ޓީމު ކުއާޓާ ފައިނަލަށް ދަތުރުކުރާއިރު، މުބާރާތުގެ ފޯރިގަދަ މެޗުތަކެއް ކުރިއަށްހުރީ ތާވަލުކުރެވިފައެވެ. މުބާރާތުގެ ބްރޯޑްކާސްޓިން ޕާޓްނަރަކީ ސަން ސިޔާމް މީޑިއާއެވެ.