ހުކުރު ދުވަހު ބާއްވާ އެމްޑީޕީގެ ރައްޔިތުން މަޖިލީހުގެ ޕްރައިމަރީގައި ދިއްދޫ ދާއިރާ އަށް ވާދަކުރައްވާ އެ ދާއިރާގެ މިހާރުގެ މެމްބަރު އަހްމަދު ސަމީރު އޭނާގެ ނަން މިއަދު އަނބުރާ ނަންގަވައިފި އެވެ. އެކަމާ ގުޅޭ ގޮތުން ސަމީރުގެ އަމިއްލަ ވެބްސައިޓްގައި ވިދާޅުވެފައިވަނީ ނަން އަނބުރާ ނަންގަވަން ބޭނުންވީ އިންތިހާބު ކާމިޔާބު ނުވެދާނެތީ ނޫން ކަމަށާއި އެ ދާއިރާގެ އެމްޑީޕީގެ ބައެއް މެމްބަރުން ޒާތީ ގޮތުން އެންޓި ކެމްޕޭންކޮށް، ވަކި ކެންޑިޑޭޓަކު ނޫން ބޭފުޅަކު ޕްރައިމަރީ ކާމިޔާބުކުރެއްވި ނަމަވެސް މަޖިލީހުގެ އިންތިހާބުގައި ތާއީދުނުކުރާނެ ކަމަށް ބުނަމުންދާތީ ކަމަށެވެ. "[އެހެންވެ] ޕްރައިމަރީ ކާމިޔާބުކުރުމުގެ ބޭނުން ހާސިލް ނުވާނެތީވެ، އެ ފަދަ ހާލަތެއްގައި އެކަންކުރުމުގެ އެއްވެސް ބޭނުމެއް އޮތް ކަމަކަށް އަޅުގަނޑާއި އަޅުގަނޑަށް ތާއީދުކުރާ އެންމެހާ ފަރާތްތައް ނުދެކެމެވެ،" ހާއްސަ މަޖިލީހުގެ ހއ. މެމްބަރުކަން ވެސް ކުރެއްވި ސަމީރު ވިދާޅުވި އެވެ. "އެތެރޭގެ އިންތިޚާބުގައި ވާދަކުރުމުގެ އެންމެ ބޮޑު ބޭނުމަކީ ޕާޓީ އަށް މަޖިލީހުގެ ގޮނޑި ކާމިޔާބުކޮށްދެވޭނެ މީހަކު ހޮވުމެވެ. އެއްގޮތަކަށް ވެސް ޕްރައިމަރީ ނިމިދާއިރު ނުވަތަ ޕްރައިމަރީގެ ކުރިން ޕާޓީގެ މެންބަރުން ޒާތީ ގޮތުން އެންޓި ކެންޕޭންކުރުމެއް ކަމަކަށް ޤަބޫލެއް ނުކުރެވެ އެވެ. އަދި ތިމާ ތާއީދުކުރާ ކެންޑިޑޭޓަކަށް އިންތިޚާބުގެ ރޫހާ އެއްގޮތަށް ކެމްޕޭން ކުރުމަކީ އެއްވެސް މައްސަލައެއް ނޫނެވެ." އެމްޑީޕީގެ ޓިކެޓްގައި މަޖިލީހުގެ އިންތިހާބަށް ވާދަ ނުކުރެއްވި ނަމަވެސް، އެ ދާއިރާ އަށް ވާދަކުރައްވާނެ ކަމަށް ސަމީރު ވިދާޅުވި އެވެ. ނަމަވެސް ވާދަކުރައްވާނީ އަމިއްލަ ގޮތުން ކަމެއް ނުވަތަ އެހެން ޕާޓީއެއްގެ ޓިކެޓެއްގައި ކަމެއް ވިދާޅެއްނުވެ އެވެ. ސަމީރު ނަން އަނބުރާ ގެންދެވުމުން އެމްޑީޕީ ޕްރައިމަރީގައި ދިއްދޫ ދާއިރާ އަށް ވާދަކުރައްވާނީ ކުރީގެ ސްޓޭޓް މިނިސްޓަރު އާދަމް ނަސީރާއި ޕޮލިޓެކްނިކްގެ ކުރީގެ ސީއީއޯ މުހައްމަދު ހާޝިމެވެ. ނަން އަނބުރާ ނެންގެވީ ކުރީގެ ރައީސް މުހައްމަދު ނަޝީދާއި އެމްޑީޕީއާ މެދު އެއްވެސް މައްސަލައެއް އޮވެގެން ނޫން ކަމަށް ސަމީރު ވިދާޅުވެ އެވެ. އޭނާ އަދި އެމްޑީޕީން ވަކިވެވަޑައެއް ނުގަންނަވަ އެވެ. ސަމީރަކީ އެމްޑީޕީގެ ޕާލިމެންޓްރީ ގްރޫޕްގެ ޑެޕިއުޓީ ލީޑަރުކަން ކުރައްވާފައިވާ ބޭފުޅެކެވެ. އަދި މަޖިލީހުގެ މިނިވަން މުއައްސަސާތަކާބެހޭ ކޮމިޓީގެ މުގައްރިރަކީ ވެސް އޭނާ އެވެ.