ޔަމަނުގެ ކުރީގެ ރައީސް އަލީ އަބްދުﷲ ސާލިހް އުފަންވެވަޑައި ގެންފައިވަނީ 21 މާރޗް 1942 ވަނަ އަހަރު އުތުރު ޔަމަނަށެވެ. ސާލިހްއަކީ އުތުރު ޔަމަނުގެ ނުފޫޒުފަދަ ގަބީލާއެއް ކަމަށްވާ ހާޝިދަށް ނިސްބަތްވާ އާއިލާއެއްގެ މެމްބަރެކެވެ.
އަލީ އަބްދުﷲ ސާލިހް ސިފައިންގެ ޚިދުމަތާ ގުޅިވަޑައިގެންނެވީ 1962 ވަނަ އަހަރުއެވެ. އުތުރު ޔަމަނުގެ ވެރިކަމުގައި ތިބި ޒައީދީންނާ ދެކޮޅަށް ބަޣާވާތްކޮށް އަރަބި ނޭޝަނަލިސްޓް ދައުލަތެއް ގާއިމްކުރުމުގައި އެ އަހަރު ސާލިހްވެސް ބައިވެރިވެވަޑައިގެންނެވިއެވެ.
އުތުރު ޔަމަނުގެ ރައީސްކަމުގައި ހުންނެވި އަހްމަދު އަލްޣަޝްމީ އަވަހާރަ ކޮށްލުމާ ގުޅިގެން އުތުރު ޔަމަނުގެ ގާނޫނުހަދާ މަޖިލީހުން 1978 ވަނަ އަހަރު އަލީ އަބްދުﷲ ސާލިހް އުތުރު ޔަމަނުގެ ރައީސްކަމަށް އިންތިޚާބުކުރިއެވެ.
ކޮމިއުނިސްޓް ވެރިކަމެއް ކުރަމުންދިޔަ ޔަމަނުގެ ދެކުނާއި، އުތުރު ޔަމަނު އެއްކޮށްލުމަށް އަލީ އަބްދުﷲ ސާލިހް ކުރެއްވި މަސައްކަތް ކާމިޔާބު ކުރައްވައި 1990 ވަނަ އަހަރު އޭނާ ގުޅިފައިވާ ޔަމަނުގެ ފުރަތަމަ ރައީސަށް ވެވަޑައިގެންނެވިއެވެ.
ޔަމަނުގެ ދެކުނުގައި 1994 ވަނަ އަހަރު އަނެއްކާވެސް ފެށި ވަކިވެގަތުމުގެ މަސައްކަތްތައް ސާލިހް ފުނޑުފުނޑުކޮށްލެއްވިއެވެ.