ރައްޔިތުންގެ މަޖިލީހުގެ ހޮޅުދޫ ދާއިރާގެ މެމްބަރު އަލީ މުހައްމަދު އެމްޑީޕީން ވަކިވެވަޑައިގެން ޕީޕީއެމްއާ ގުޅިވަޑައިގެންފި އެވެ.އޭނާ ޕީޕީއެމާ ގުޅިވަޑައިގެންނެވިކަން ކުރިން ހާމަ ކުރައްވާފައި ނެތަސް، އޭނާ ޕާޓީ ބަދަލުކުރައްވާފައިވާކަން ރައްޔިތުންގެ މަޖިލީހުގެ މިއަދުގެ ޖަލްސާގައި މަޖިލީހުގެ ރައީސް އަބްދުﷲ މަސީހު ވަނީ ހާމަ ކުރައްވާފަ އެވެ. މަޖިލީހުގެ މެމްބަރަކު ޕާޓީ ބަދަލުކުރައްވައިފި ނަމަ އެކަން މަޖިލީހަށް ހުށަހަޅައި، ރިޔާސަތުން ހާމަކުރައްވަން ޖެހެ އެވެ.އުވިދިޔަ ރައްޔިތުންގެ މަޖިލީހުގައި ވެލިދޫ ދާއިރާގެ މެމްބަރެއްގެ ގޮތުގައި ހުންނެވި އަލީ މުހައްމަދު ޑީއާރުޕީގައި ހުންނެވުމަށް ފަހު އެމްޑީޕީއާ ގުޅިވަޑައިގެންފައިވަނީ މިދިޔަ އަހަރުގެ އޭޕްރީލް 22 ގަ އެވެ.ޕީޕީއެމްގެ މެމްބަރުންގެ އަދަދު 41 އަރާފައިވާއިރު، އިދިކޮޅު އެމްޑީޕީގެ މެމްބަރުންގެ އަދަދު ވަނީ 24 ވެއްޓިފަ އެވެ.