މިދިޔަ ސަރުކާރުން ހުޅުމާލެއިން ދޫކުރި 180 ވަރަކަށް ބިން ދޫކޮށްފައި ވަނީ ފެނާއި ނަރުދަމާ އަދި ކަރަންޓު ނެޓްވޯކަށް އަރާގޮތަށް ކަމަށް އާބަންކޯގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ފަޒުލް ވިދާޅުވީ ދީފައިވާ އެއްވެސް ގޯއްޗެއް އަތު ނުލާނެ ކަމަށާއި ލިބިފައި ހުރި ތަނަކުން އެހެން ތަނަކަށް ރައްޔިތުން ބަދަލުވެސް ނުކުރައްވާނެ ކަމަށެވެ. އެހެންނަމަވެސް ގޯތި ލިބުނު މީހަކު އެދިގެން އެގޮތަށް ބަދަލުކޮށްދިނުމަކީ ކޮށްދެވިދާނެ ކަމަށް ފަޒުލް ވިދާޅުވިއެވެ.
ފަޒުލް ވިދާޅުވީ ބައެއް ދިމަދިމާ ގާތްގަނޑަކަށް 180 ވަރަކަށް ބިން ދޫކޮށްފައިވަނީ ފެނާއި ނަރުދަމާ އަދި ކަރަންޓު ނޫނީ އާބަންކޯގެ ނެޓްވޯކަށް ގޮތަށް ކަމަށާއި އެ އަރާ ގެތަކުގައި އިންފާރު ރާނާ ދިނުމުގެ ފުރުސަތު ދަތިވާ ކަމަށެވެ. އެހެންނަމަވެސް އެކަމަށް ހައްލު ގެނެސްދެއްވާނެ ކަމަށް ފަޒުލް ވިދާޅުވިއެވެ.
ފަޒުލް އިތުރަށް ވިދާޅުވީ މި ކަހަލަ މައްސަލަތަކެއް އެބަހުރި ކަމަށާއި އެ ކަންކަން ހައްލު ކުރުމަށްޓަކައި މަސައްކަތް ކުރަމުންދާ ކަމަށެވެ.
ސަރުކާރުގެ ބިންވެރިޔާ ސްކީމްގެ ދަށުން މާލޭގެ ރައްޔިތުންނަށް ދޫކުރާ ގޯތިތަކުގެ ދާއިމީ ލިސްޓް އާންމު ކުރި އިރު، ގޯތި ލިބުމަށް ޝަރުތު ހަމަވާ 19،631 މީހުން ތިބިއިރު އޭގެތެރެއިން 18،948 ފަރާތަކަށް ވަނީ ގޯތިދީފައެވެ. އޭގެ ތެރެއިން ގުޅިފަޅުން 2،218 ގޯތި ދޫކޮށްފައިވާއިރު ހުޅުމާލެއިން 1،351 ގޯއްޗާއި ގިރާވަރުފަޅުން 5،432 ގޯތި ވަނީ ދޫކޮށްފައެވެ.