އެސްޓީއޯ ޕީޕަލްސް ޗޮއިސް (އެސްޓީއޯ)ގެ އައު ފިހާރައެއް ހުޅުމާލެ ފޭސް 1 ގައި ރޭ ހުޅުވައިފި އެވެ.ރީތިގަސް މަގުން ރެއިން ކޮރަލް ރެޒިޑެންސް އިމާރާތުގައި ހަދާފައިވާ މި ފިހާރަ ހުޅުއްވައި ދެއްވީ އިކޮނޮމިކް މިނިސްޓަރު މުހައްމަދު ސައީދު އެވެ. އެސްޓިއޯ އިން ބުނީ މި ފިހާރައަކީ، ރަމަޟާން މަހާއި ގުޅިގެން ހުޅުވި ފިހާރައެއް ކަމުގައި ވީނަމަވެސް، ކުރިއަށް އޮތްތަނުގައި މި ފިހާރާގެ ޚިދުމަތް އާއްމުންނަށް ލިބޭނެ ކަމަށެވެ. ރާއްޖޭގެ ރައްޔިތުންނަށް އަސާސީ ކާބޯތަކެތި ހެޔޮ އަގުގައި ފޯރުކޮށްދިނުމަށްޓަކައި އެސްޓީއޯ އިން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން އެސްޓީއޯގެ އައުޓްލެޓްތައް އިތުރުކުރުމަށް ކުރަމުންދާ މަސައްކަތްތައް ފާހަގަކޮށްލަންޖެހެ އެވެ. ގްރޭޓަރ މާލެ ސަރަހައްދުގައި ގާއިމްކުރެވިފައިވާ ހަ އައުޓްލެޓުގެ އިތުރުން އަތޮޅުތެރޭގައި އެސްޓީއޯގެ 13 އައުޓްލެޓެއް ގާއިމްކޮށްފައިވެ އެވެ.