އިރާނާއި އިޒްރޭލު އަދި އެމެރިކާއާ ދެމެދު ކުރިއަށްދާ ހަމަނުޖެހުންތައް އިތުރަށް ވަރުގަދަވަމުންދާ ދަނޑިވަޅެއްގައި، އެމެރިކާއިން ހުށަހެޅި އެއްވެސް ޝަރުތަކާ ނުލާ އަމާންދިނުމުގެ ހުށަހެޅުމަށް އިރާނުގެ ރައީސް މަސްއޫދު ޕެޒެޝްކިއަން މިއަދު އިންކާރު ކުރައްވައިފި އެވެ.
އޭނާ ވިދާޅުވީ އެއީ އެމެރިކާއިން ދެކޭ 'ހިޔާލީ ހުވަފެނެއް' ކަމަށާއި އެކަން ދުވަހަކު ވެސް ފުރިހަމަ ނުވާނެ ކަމަށެވެ.
ދައުލަތުގެ ޓީވީ މެދުވެރިކޮށް ދެއްވި ބަޔާނެއްގައި، އަވަށްޓެރި ގައުމުތަކަށް އިރާނުން ދިން ހަމަލާތަކަށް ރައީސް ޕެޒެޝްކިއަން ވަނީ މައާފަށް އެދިވަޑައިގެންފަ އެވެ. އަދި އެފަދަ ހަމަލާތައް ހުއްޓާލާނެ ކަމަށް ވިދާޅުވެ، އެއީ އަސްކަރިއްޔާގެ ތެރޭގައި މުއާސަލާތީ ގޮތުން އެރި އޮޅުމެއްގެ ސަބަބުން ހިނގި ކަމެއް ކަމަށް ފާހަގަކުރެއްވި އެވެ.
މި ބަޔާން ދެއްވާފައިވަނީ ރޭ ފަތިހު ބަހްރޭން، ސައުދީ އަރަބިއްޔާ އަދި ޔުނައިޓެޑް އަރަބް އެމިރޭޓްސް ހިމެނޭހެން ގަލްފުގެ ބައެއް ގައުމުތަކަށް އިރާނުން މިސައިލް ހަމަލާތަކެއް ދީފައިވާ ދަނޑިވަޅެއްގަ އެވެ. ހަމަ އެއާ އެކު، އެމެރިކާ އާއި އިޒްރޭލުން ގެންދަނީ އިރާނުގެ އެކި އަމާޒުތަކަށް ވައިގެ މަގުން ހަމަލާދެމުންނެވެ.
އެސޯސިއޭޓެޑް ޕްރެސް އިން އާންމުކުރި ވީޑިއޯތަކުން ފެންނަ ގޮތުގައި، އިޒްރޭލުން އިރާނަށް ދެމުންދާ ވަރުގަދަ ހަމަލާތަކާ ގުޅިގެން ތެހެރާންގެ ހުޅަނގު ސަރަހައްދުން ބޮޑެތި ގޮވުންތަކުގެ އަޑު އިވި، ދުން އަރަމުންދެ އެވެ.
މީގެ އިތުރުން، އިރާނުން ފޮނުވާލި މިސައިލްތަކުގެ ސަބަބުން ގުދުސްގައި ވެސް ވަނީ ނުރައްކަލުގެ ރަނގަބީލު ޖަހާފަ އެވެ.
މި ހަމަލާތަކާ ގުޅިގެން އިޒްރޭލުގެ ރައްޔިތުން ރައްކާތެރި ބަންކަރުތަކަށް ވަދެފައިވާއިރު، މިހާތަނަށް އެއްވެސް މީހަކަށް ގެއްލުމެއް ލިބިފައިވާ ކަމުގެ ރިޕޯޓެއް ލިބިފައެއް ނުވެ އެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ އިރާނުން އެއްވެސް ޝަރުތަކާ ނުލާ އަމާންދީފި ނަމަ މެނުވީ މަޝްވަރާ ނުކުރައްވާނެ ކަމަށް އިއްޔެ ވިދާޅުވެފަ އެވެ. މި ދަނޑިވަޅުގައި އެމެރިކާއިން ވަނީ އިޒްރޭލަށް 151 މިލިއަން ޑޮލަރުގެ ހަތިޔާރު ވިއްކުމަށް ހުއްދަ ދީފަ އެވެ. އަދި ކުރިއަށް އޮތް ތަނުގައި މިއަށް ވުރެ ވަރުގަދަ ހަމަލާތަކެއް ދީފާނެ ކަމުގެ އިންޒާރު ވެސް އެމެރިކާގެ އޮފިޝަލުން ވަނީ ދެއްވާފަ އެވެ.
އދ.އަށް ކަނޑައަޅާފައި ހުންނަ އިރާނުގެ ސަފީރު ވިދާޅުވީ، ގައުމުގެ ދިފާއުގައި އަޅަންޖެހޭ ހުރިހާ ފިޔަވަޅެއް އެ ގައުމުން އަޅާނެ ކަމަށެވެ.
އިރާނުގެ އަސްކަރީ މަރުކަޒުތަކަށާއި ވެރިންނަށް އަދި ނިއުކްލިއާ ޕްރޮގްރާމަށް އަމާޒުކޮށް އެމެރިކާ އާއި އިޒްރޭލުން މެދުނުކެނޑި ހަމަލާދެމުންދާއިރު، މި ހަމަނުޖެހުންތަކަށް ދެވަނަ ހަފްތާއެއް ފެށިގެންދާއިރު ވެސް މައްސަލައަށް ދާއިމީ ހައްލެއް ފެންނާކަށް ނެތެވެ.