ރައީސް އޮފީހުން އިއްޔެ އިބްރާހިމް ފައިސަލްގެ ރަސްމީ ދަތުރުތައް ހުއްޓާލުމަށް އަންގައިފިއެވެ. މިއީ ރައީސް ޑރ. މުހައްމަދު މުއިއްޒު އާއި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އާ ދެމެދު އުފެދިފައިވާ ހިތްހަމަނުޖެހުންތަކާ ގުޅިގެންކަމަށް ވެއެވެ.
މި ނޫހަށް ގިނަ މަސްދަރުތަކުން ކަށަވަރުކޮށްދިން ގޮތުގައި، ޓޫރިޒަމް މިނިސްޓަރު އިބްރާހިމް ފައިސަލް ރާވަމުންދިޔަ ބައިނަލްއަޤްވާމީ ދަތުރުތަކުގެ ތެރެއިން އެއްވެސް ދަތުރެއް ކުރިއަށް ގެންދިއުމަށް ހުއްދައެއް ނުދެވޭނެއެވެ.
“މި ނިންމުމަކީ ރައީސް މުއިއްޒު އާއި އަބްދުއްރަހީމްގެ މެދުގައި އުފެދިފައިވާ ޚިލާފުތަކާ ގުޅިގެން ނިންމާފައިވާ ނިންމުމެއް” ކަމަށް ސަރުކާރުގެ އިސް އޮފިޝަލަކު މި ނޫހަށް ހާމަކުރެއްވިއެވެ.
މިއީ މި ދެ ބޭފުޅުންގެ ގުޅުމަށް އަންނަ ފުރަތަމަ ބަދަލެއް ނޫނެވެ. މީގެ ކުރިން ވެސް ދެ ފަރާތުގެ ގުޅުން ރެނދު ބިނދުވެފައިވާކަމުގެ ޚަބަރުތައް ފެތުރުނެވެ. ނަމަވެސް، މިދިޔަ ނޮވެމްބަރުގައި ޕީއެސްއެމްއަށް ދެއްވި އިންޓަވިއުއެއްގައި އަބްދުއްރަހީމް ވިދާޅުވެފައިވަނީ ރައީސްއާ އެކުގައި އޮތް ގުޅުން “ދުވަހަކަށްވުރެ ދުވަހެއް ބަދަހިވަމުން” އަންނަ ކަމަށެވެ.
އޭރު އުފެދުނު އަނެއް ސުވާލަކީ 2028 ގެ ރިޔާސީ އިންތިޚާބުގައި އަބްދުއްރަހީމް ވާދަކުރައްވާނެކަމުގެ އަޑުތަކެވެ. ނަމަވެސް އެމަނިކުފާނު ވަނީ މިކަން ބަހުން ކަނޑައެޅިގެން ދޮގުކުރައްވާފައެވެ. “ދިވެހިރާއްޖޭގެ ވެރިކަމަށް ކުރިމަތިލުމުގެ ވިސްނުމެއް ދުވަހަކުވެސް ނުގެންގުޅެން. އަދި ކުރިއަށް އޮތްތާކުވެސް ނުގެންގުޅޭނަން،” އެމަނިކުފާނު ވިދާޅުވިއެވެ.
ކަން މިހެން އޮތް އިރު 2028ގައި ހޯމް މިނިސްޓަރ އިހްސާން ވަނީ ވެރިކަމަށް ކުރިމަތި ލުމަށް ނިންމާފައެވެ.