ދިވެހިރާއްޖޭގެ ޤައުމީ ޔުނިވާސިޓީ (އެމްއެންޔޫ)އިން ކޯސްތަކާ ގުޅޭ މައުލޫމާތު ދިނުމަށް "ވަން ސްޕޮޓް އެޑްމިޝަން"ގެ ނަމުގައި ބާއްވާ ހަރަކާތް މާދަމާގެ 13:00 އިން 18:00 އަށް ކުރިއަށްދާނެ ކަމަށް ޔުނިވާސިޓީއިން ބުނެފިއެވެ. މީގެ ކުރީން އެ ޔުނިވާސިޓީއިން މި ހަރަކާތް ކުރިއަށް ގެންދިއުމަށް ނިންމާފައި ވަނީ މާދަމާގެ 13:00 އިން ހަވީރު 16:00 އަށެވެ. ނަމަވެސް މި ހަރަކާތުގެ ވަގުތު މިހާރު މި ވަނީ އިތުރުކޮށްފައެވެ. މި ހަރަކާތުގެ ތެރެއިން ޔުނިވާސިޓީގެ ހުރިހާ ފެކަލްޓީއެއް ނުވަތަ ހުރިހާ ސެންޓަރުތަކުގައި ކޯސްތަކާއި ބެހޭ މަޢުލޫމާތު ފޯރުކޮށްދޭނެކަމަށް އެ ޔުނިވާސިޓީއިން ވަނީ ބުނެފައެވެ. މި ހަރަކާތުން ޔުނިވާސިޓީގެ ކޯސްތަކަށް ކުރިމަތިލުމަށް ފޯމު ބަލައިގަތުމާއ،ި އޭލެވެލް އަދި އެހެނިހެން ނަތީޖާތަކަށް ބެލުމަށްފަހު ޝަރުތު ހަމަވާ މީހުން ކޯހަށް ހޮވުނުކަމުގެ ލިޔުން ވަގުތުން ދިނުން ކުރިއަށް ގެންދާނެ ކަމަށް އެ ޔުނިވާސިޓީއިން ވަނީ ބުނެފައެެވެ. އަދި ދަރިވަރުން މި ހަރަކާތަށް ދާއިރު ނަތީޖާ ކަރުދާހާއި އައިޑީކާޑު ގެންދިއުމުން ޔުނިވާސިޓީގެ ކޯސްތަކުގައި ޖާގަ ހުރި މިންވަރަކުން ފުރުސަތު ދޭނެ ކަމަށް އެމްއެންޔޫއިން ވަނީ ބުނެފައެވެ. އެމްއެންޔޫއަކީ ފަންނީ، ޤާބިލް ލެކްޗަރާއިންނާއެކު ތަފާތު އެތައް ދާއިރާ އަކުން ތަޢުލީމާއި ތަމްރީން ޕްރޮގްރާމުތައް ހިންގަމުން އަންނަ ޔުނިވާސިޓީއެކެވެ. އެމްއެންޔޫއިން ތައުލީމު ހާސިލުކުރެވެން ހުރި ދާއިރާތަކުގެ ތެރޭގައި: ޓޫރިޒަމް ހޮސްޕިޓާލިޓީ ކަލިނަރީ އާޓްސް ޖާނަލިޒަމް ޕޮލިޓިކަލް ސައިންސް ބިޒްނަސް އެކައުންޓިން އިކޮނޮމިކްސް ޓީޗިން ނާސިން ސައިކޮލޮޖީ ހެލްތު ސައިންސަސް އާކިޓެކްޗާ އިންޓީރިއާ ޑިޒައިން އިންފޮމޭޝަން ޓެކްނޮލޮޖީ ސިވިލް އިންޖިނިއިރިން ސައެންސް އެންވަޔަރަންމަންޓަލް މެނޭޖްމަންޓް މެރިން ސައިންސް މެރިޓައިމް ސްޓަޑީޒް ޝަރީއާ އެންޑް ލޯ އަދި މެޑިސިން ހިމެނެއެވެ. ޔުނިވާސިޓީގެ ފަންނީ ދާއިރާތަކުގެ ލެކްޗަރާއިން، އެބޭފުޅުންގެ ދާއިރާތަކުން މަތީ ތައުލީމު ހާސިލުކުރުމަށް ހުރި ފުރުސަތުތަކާ ބެހޭ މައުލޫމާތާއި، މަތީ ތައުލީމު ހާސިލުކުރުމަށް ވާންޖެހޭ ތައްޔާރީތަކުގެ މައުލޫމާތު، އިވެންޓުގައި ބައިވެރިވާ މީހުންނާ ހިއްސާކުރައްވާނެ ކަމަށް ވަނީ ބުނެފައެވެ.