ރައްޔިތުންގެ މަޖިލީހުގެ ބައެއް މެންބަރުން ވަަރަށް އަވަހަށް ޖުމްހޫރީ ޕާޓީއާ ގުޅިވަޑައިގަންނަވާނެ ކަމަށާއި އެ މަންޒަރު ވަރަށް އަވަހަށް ފެނިގެންދާނެ ކަމަށް ޖުމްހޫރީ ޕާޓީން ބުނެފި އެވެ.
މ. ކުނޫޒުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވީ ރައްޔިތުންގެ މަޖިލީހުގެ މެންބަރުންގެ އިތުރުން އާންމު ރައްޔިތުންގެ ތެރެއިން އެކި ފަންތީގައި މަަސައްކަތް ކުރައްވާ ފަރާތްތަކުން ވެސް ޖުމްހޫރީ ޕާޓީއާ ގުޅެމުންދާ ކަމަށެވެ.
"މީގެ ތެރޭގައި ޕީއެޗްޑީ ފެންވަރުގެ ބޭފުޅުންނާ މެޑިކަލް ޑޮކްޓަރުންވެސް ހިމެނޭ،" ގާސިމް އިބްރާހިމް ވިދާޅުވި އެވެ.
ނިމިގެންދިޔަ ރިޔާސީ އިންތިހާބާ ދިމާކޮށް ޖުމްހޫރީ ޕާޓީއާ ޕީޕީއެމްއާ ދެމެދު ސޮއިކުރެވުނު ކޯލިޝަން އެއްބަސްވުން ރޫޅާލުމަށް ޖޭޕީގެ ކައުންސިލުން ނިންމާފައިވާ ނިންމުމާ ގުޅޭގޮތުން ވެސް ގާސިމް އިބްރާހިމް މިއަދު ވަނީ ވާހަކަ ދައްކަވާފަ އެވެ.
އެގޮތުން އެމަނިކުފާނު ވިދާޅުވީ ޕީޕީއެމްއާއެކު ހަދާފައިވާ ކޯލިޝަން އެއްބަސްވުން ރޫޅާލުމަށް ޖޭޕީން ނިންމުމާއި ގުޅިގެން ޖޭޕީއަށް ވަނުމަށް އެދޭ މީހުންގެ އަދަދު އިތުރުވެ ޖޭޕީއަށް ލިބޭ ތާއީދު އިތުރުވެފައިވާ ކަމަށެވެ.
ގާސިމް އިބްރާހިމް ވިދާޅުވީ ގާނޫނު އަސާސީއާ ހިލާފަށް މިއަދުގެ ސަރުކާރުން މަސައްކަތް ކުރައްވާ ކަމަށެެވެ. އަދި ގާނޫނު އަސާސީއަށް ބޮޑެތި ބަދަލުތަކެއް ގެނައުމަށްވެސް މިސަރުކާރުން މަސައްކަތް ކުރަމުންދާ ކަމުގައިވެސް ވިދާޅުވި އެވެ. ނަމަވެސް ގާނޫނު އަސާސީގެ ދިފާއުގައި ކުރަންޖެހޭ މަސައްކަތްތައް ކުރިއަށް ގެންދާނެ ކަމަށާއި ޖޭޕީގެ ކައުންސިލުންނާއި ޕީޖީ ގުރޫޕުންވެސް އެ މަސައްކަތް ކުރުމަށް ނިންމާފައިވާ ކަމުގައިވެސް ވިދާޅުވި އެވެ.
"ގާނޫނު އަސާސީއާ ހިލާފަށް ބާރުތަކެއް ހޯދުމަށް މަސައްކަތް ކުރާނަމަ އެތެރޭގައި ތިއްބަސް ބޭރުގައި ތިއްބަސް އަޅުގަނޑުމެންނަކަށް އެއްޗެއް ނުބުނެއެއް ނުތިބެވޭނެ،" ގާސިމް އިބްރާހީމް ވިދާޅުވި އެވެ.
އެމަނިކުފާނު ވިދާޅުވީ ގާނޫނު އަސާސީއާ ހިލާފަށް އަދި ގާނޫނުތަކާއި ހިލާފަށް މިސަރުކާރުން ކޮށްފައިވާ އަދި ކުރަމުންދާ ކަންކަމާއި ގުޅިގެން އެކަންކަން ރަނގަޅުކުރުމަށް މީގެ ކުރިން ސަރުކާރުގައި އެދިފައިވާ ކަމަށެވެ. ނަމަވެސް އެކަންކަމަށް އިޖާބަދީފައި ނުވާ ކަމަށް ދޭހަވާ ގޮތަށް ގާސިމް ވާހަކަ ދެއްކެވި އެވެ. އަދި ޖޭޕީގެ މަޖިލިސް ދެ މެންބަރަކު އެހެން ޕާޓީއަކަށް ސޮއިކުރައްވާ ކަަމަށް ދެކެވޭ ވާހަކަތަަކަކީ ފަތުރާ ޕްރޮޕެގަންޑާއެއް ކަމުގައިވެސް ވިދާޅުވި އެވެ.
ނޫސްވެރިންގެ މިބައްދަލުވުމުގައި ޖޭޕީގެ ނައިބް ލީޑަރު އަމީން އިބްރާހިމް ވެސް ވަނީ ޖޭޕީގެ މަޖިލިސް ދެ މެންބަރަކު ޕީޕީއެމަށް މިރޭ ސޮއިކުރައްވާނެ ކަމަށް ބުނެ ދެކެވޭ ވާހަކަތަކަށް ރައްދުދެއްވާފަ އެވެ. އެގޮތުން އަމީން ވިދާޅުވީ ޖޭޕީން ޕީޕީއެމަށް ސޮއިކުރައްވާނެ މަޖިލިސް މެންބަރަކު މިހާރު ޖޭޕީގެ ނުހުންނަވާނެ ކަމަށެވެ. ނަމަވެސް ގާސިމް ވިދާޅުވި ފަދައިން އަމީން ވެސް ވިދާޅުވީ ޖޭޕީއަށް ސޮއިކުރައްވާނެ މަޖިލިސް މެންބަރުން އެބަތިއްބެވި ކަމަށާއި އެކަން ފެނިގެންދާނެ ކަމަށެެވެ.
ކުނޫޒުގައި މިއަދު އޮތް ރަސްމިއްޔާތުގައި ބައެއް ބޭފުޅުުން ވަނީ ޖޭޕީއަށް ސޮއިކުރައްވާފަ އެވެ. އެގޮތުން ނިމިގެންދިޔަ ރައްޔިތުންގެ މަޖިލީހުގައި ދުވާފަރު ދާއިރާގެ މެންބަރު ކަން ކުރައްވާފައިވާ ޒުބައިރު މުހައްމަދާއި އޭޑީކޭގައި މަސައްކަތް ކުރައްވާ މެޑިކަލް ޑޮކްޓަރަކާއި އަދި ކުރީގެ ބައެއް ކައުންސިލަރުންނާއި ބައެއް ވިޔަފާރިވެރިންނާ އަދިވެސް އެހެން ބައެއް ފަރާތްތަކުންވެސް ޖޭޕީއަށް ސޮއިކުރައްވާފަ އެވެ.