ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހުމަދު ނާޒިމްގެ މައްޗަށް ދައުލަތުން އުފުލި، މަކަރާއި ހީލަތް ހެދުމުގެ ދައުވާގެ މައްސަލަތަކުގެ އަޑުއެހުންތައް މިއަދު ސުޕްރީމް ކޯޓުން ނިންމައިފި އެވެ.
ރައްޔިތުންގެ މަޖިލީހުގެ ކުރީގެ ނައިބު ރައީސް، ނާޒިމްގެ މައްޗަށް ދައުލަތުން ދައުވާ އުފުލާފައި ވަނީ، އޭނާ ހިއްސާވާ ނަމީރާ ކުންފުނިން އޮޅުވާލައިގެން ލިޔެކިޔުންތަކެއް ހުށަހަޅައިގެން، ސަރުކާރުގެ ހަތަރު މަޝްރޫއުއެއް ކާމިޔާބުކުރި ކަމަށް ބުނެ އެވެ.
ސުޕްރީމް ކޯޓަށް އެ މައްސަލަތައް ހުށަހެޅީ، ނާޒިމްގެ މައްޗަށް އެކަނި އެ ދައުވާ ނުކުރެވޭނެ ކަމަށް ކްރިމިނަލް ކޯޓުން ނިންމާފައިވާ ހުކުމަށް، ހައި ކޯޓުން ތާއީދުކޮށްފައި ވަނިކޮށެވެ. ދައުލަތުން ސުޕްރީމް ކޯޓުގައި އެދެނީ، ހައި ކޯޓުގެ ނިންމުން ބާތިލްކޮށް، ނާޒިމްގެ މައްޗަށް އެ ދައުވާ ކުރެވިދާނެ ކަމަށް ކަނޑައަޅައި ދިނުމަށެވެ.
މި މައްސަލައިގައި އެންމެ ފަހުން ބޭއްވުނު ޝަރީޢަތުގައި ބެންޗުން ވިދާޅުވީ އިތުރު ކަމެއް ސާފުކުރަން ނެތް ނަމަ ހުކުމް އިއްވާނެ ކަމަށެވެ. އަދި މި މައްސަަލައިގެ ޚުލާސާ ބަޔާންވެސް މިހާރު ވަނީ ނަގާފައެވެ.
އެގޮތުން މިއަދުގެ ޝަރީއަތުގައި ފަނޑިޔާރުންގެ ބެންޗުން ވިދާޅުވީ މިއަދުގެ ޝަރީއަތަކީ ބެންޗުން ސާފު ކުރަން ހުރި ބައެއް މައުލޫމާތު ސާފު ކުރުމަށް ބޭއްވި ޝަރީއަތެއް ކަމަށެވެ. މިއަދުގެ ޝަރީއަތުގައި ފަނޑިޔާރުންގެ ބެންޗުން ވަނީ މައްސަލައިގެ ތަހުގީގު ރިޕޯޓުތަކާއި، ނާޒިމްގެ މައްޗަށް ދައުވާ ސާބިތު ކުރުމަށް ކްރިމިނަލް ކޯޓަށް ދައުލަތުން ހުށަހެޅި ހެކިންގެ ބަޔާންތަށް ހޯދާފަ އެވެ.
ބެންޗުން ވަނީ މި މައްސަލަތަކާއި ނާޒިމްއާއި ހުރި ގުޅުމަކީ ކޮބާތޯ ދައުލަތާ ސުވާލުކޮށްފަ އެވެ. ދައުލަތުން ބުނެފައިވަނީ މި މައްސަލާގައި ނާޒިމްގެ ކުންފުނީގެ މުވައްޒަފުންނާއި ވަސީލަތްތަށް ބޭނުންކޮށްފައިވާތީ މެނޭޖިން ޑިރެކްޓަރުގެ ހައިސިއްޔަތުން ނާޒިމް ޒިންމާ އުފުއްލަވަން ޖެހޭނެ ކަމަށެވެ. އަދި މި މައްސަލާގައި ނާޒިމްގެ ނަމީރާ އިންޖިނިއަރިންގެ މުވައްޒިފުން ދީފައިވާ ބަޔާންތަކުގައިވެސް ހިމެނެނީ ނާޒިމްގެ ނަން ކަމަށް ދައުލަތުން ވަނީ ބުނެފަ އެވެ.
މިއަދު ބޭއްވި ޝަރީއަތުގެ މަޖިލީހުގައި ދައުލަތުގެ ވަކީލުންގެ ވާހަކަ ތަކަށް ރައްދު ދެއްވަމުން ނާޒިމް ވިދާޅުވީ އޭނާގެ މައްޗަށް އުފުލިފައިވާ ދައުވާތަކަކީ ސިޔާސީ ގޮތުން ހަލަބޮލި ދުވަސްވަރެއްގައި ސިޔާސީ ބަޔަކު އުފުލާފައިވާ ދައުވާތަކެއް ކަަމަށެވެ. އެގޮތުން އެ މައްސަލަތަށް އެންމެ ފުރަތަމަ ފެންމަތި ކުރީ ރިޔާސީ ކޮމިޝަނުން ކަމަށާއި، މި މައްސަލާގައި އޭނާއާއި ދެކޮޅަށް ހެކިބަސްދިން އޭނާގެ ކުންފުނީގެ މުވައްޒިފުންނަށް ސިޔާސީ އިސް މަގާމުތަކެއް ދެއްވާފައިވާ ކަމަށްވެސް ނާޒިމް ވިދާޅުވި އެވެ.
ސުޕްރީމް ކޯޓުގެ ހުރިހާ ފަނޑިޔާރުން އެއްކޮށް ބައްލަވާ މައްސަލަތަކުގެ އަޑުއެހުންތައް ނިންމާލައްވަމުން ބެންޗުން ވިދާޅުވީ އެ މައްސަލައިގައި އިތުރު ކަމެއް ސާފު ކުރަން ނުޖެހޭ ނަމަ ދެން އޮންނާނީ ހުކުމް އިއްވާ މަޖިލިސް ކަމަށެވެ.
ނާޒިމަކީ ސަރުކާރު ހިންގާ މައި ޕާޓީ، ޕީޕީއެމްގެ ޕާލިމެންޓްރީ ގުރޫޕުގެ މެމްބަރެއް ކަމަށް ވިޔަސް، ރައީސް އަބްދުﷲ ޔާމީނަށް ވެރިކަން ލިބިވަޑައިގެންނެވި ފަހުން، އެ ޕާޓީގެ ހަރަކާތްތަކުގައި އޭނާ އަމަލީ ގޮތުން ނޫޅުއްވަ އެވެ. ނާޒިމަކީ ކުރިން ރައީސް ޔާމީންގެ ވަރަށް އަރިސް ބޭފުޅެކެވެ.