އައްޑު އަށް ކަރަންޓްގެ ހިދުމަތް ދެމުން އަންނަ ފެނަކަ ކޯޕަރޭޝަނަށް ވުރެ އަގު ހެޔޮކޮށް، މި ސިޓީ އަށް ކަރަންޓް ދޭނެ ބަޔަކު ހޯދަން އިއުލާން ކުރަން އައްޑޫ ސިޓީ ކައުންސިލުން ނިންމައިފި އެވެ. މިދިޔަ މަހުން ފެށިގެން ވިޔަފާރިކުރާ ތަންތަނުގެ ކަރަންޓް ފީއަށް ގެނައި ބަދަލާއެކު ވިޔަފާވެރިންގެ ކަންބޮޑުވުންތަކާ ގުޅިގެން މި މައްސަލަ ވަނީ މިއަދު އޮތް ކައުންސިލްގެ ބައްދަލުވުމަށް ކުއްލި މައްސަލައެއްގެ ގޮތުގައި ހުށަހަޅައިފަ އެެވެ. މޭޔަރު އަބްދުﷲ ސޯދިގް (ސޯބެ) މިރޭ "ހަވީރަ"ށް ވިދާޅުވީ ކަރަންޓްގެ ހިދުމަތަކީ ލާމަރުކަޒީ ގާނޫނުން ކައުންސިލަށް ލާޒިމްކޮށްފައިވާ ކަމެއް ކަމަށެވެ. އެހެންވެ އެ ގާނޫނުގެ ދަށުން އައްޑުއަށް ކަރަންޓް ދޭނެ ފަރާތެއް ހޯދަން އިއުލާން ކުރެވޭނެ ކަމަށް އޭނާ ވިދާޅުވި އެވެ. އެހެން ނަމަވެސް ގާނޫނުން ކައުންސިލަށް ލާޒިމް ކުރާ ކަންކަން ވެސް ސަރުކާރުން ނިގުޅައިގަނެ، އެ ގާނޫނުގެ ބާރު ކަނޑުވާލަމުންދާ ކަމަށް މޭޔަރު ތުހުމަތު ކުރެއްވި އެވެ. އޭނާ ވިދާޅުވި ގޮތުގައި ފެނަކައިން ހިދުމަތް ދޭން އުޅެނީ ރައްޔިތުންނަށް ކުޅަދާނަވާ ވަރުގެ އަގެއް ނަގައިގެނެއް ނޫނެވެ. އެހެންވެ މިއީ ވަރަށް ސީރިއަސް މައްސަލައެއް ކަމަށް މޭޔަރު ވިދާޅުވި އެވެ. ފެނަކަ އަށް ރައްޔިތުން އަތްފޯރާ އަގެއްގައު ހިދުމަތް ނުދެވޭ ކަމަށް ވަންޏާ ހުއްޓާލަންވީ. އަޅުގަނޑުމެން މި ތިބީ އެކަން ކުރެވޭ ވަރުގެ ބަޔަކު ހޯދައިގެން މިކަން ކުރަން ތައްޔާރަށް. ކަރަންޓަކީ ވަރަށް އަސާސީ ހިދުމަތެއް. އެއްްވެސް ރައްޔިތަކު އެ ހިދުމަތުން މަހުރޫނު ނުވާނެ ގޮތަަކަށް، ހެޔޮ އަގެއްގައި ހިދުމަތް ލިބެން ޖެހޭނެ.--މޭޔަރު ސޯބެ ވިދާޅުވީ ފެނަކައިން އައްޑުއަށް ކަރަންޓްގެ ހިދުމަތް ދެނީ، އެ ކުންފުނިން މާ ބޮޑު އިންވެސްޓެއް ކޮށްގެން ނޫން ކަމަށެވެ. އޭގެ ބަދަލުގައި އިންޖީނުގެތަކާއި އެކަމަށް ބޭނުންވާ ހުރިހާ ވަސީލަތްތަކެއް އައްޑޫގައި ގާއިމް ކޮށްފައި ހުރުމުން، އޭގެ ނާޖާއިޒް ފައިދާ އެ ކުންފުނިން ނަގަނީ ކަމަށް އޭނާ ވިދާޅުވި އެވެ. "އައްޑު އަކީ ކަރަންޓްގެ ހިދުމަތުން ބޮޑު ފައިދާއެއް ލިބޭ ތަނެއް. މިތަނަށް ލިބޭ ފައިދާއިން ފެނަކައިގެ ދަށުގައި ހުރި ހުރިހާ އިންޖީނު ގެތަކަށް ހިންގަން އުޅުމުން އައްޑޫގެ ކަރަންޓްގެ ހާލަތު މި އޮތީ ބޮއްސުން ލައިގެން ގޮސްފައި،" މޭޔަރު ވިދާޅުވި އެވެ. "މިތަނުގައި ގާއިމު ކުރެވިފައި މި ހުރި ވަސީލަތްތަކާ އެކު ފެނަކަ އިން ހިދުމަތް ދޭ ވަރަށް ވުރެ މާ ރަނގަޅަށް އެހެން ބަޔަކަށް ވެސް ހިދުމަތް ދެވޭނެ. މިތަނަކީ ހުރިހާ ފެސިލިޓީއެއް ގާއިމު ކުރެވިފައި ހުރި ތަނެއް." ކައުންސިލްގެ މިއަދުގެ ބައްދަލުވުމުގައި ނިންމާފައި ވަނީ ފެނަކައިން މިހާރު އައްޑޫގައި ހިންގާ އިންޖީނުތައް ވެސް ކައުންސިލްގެ ދަށަށް ގެނައުމަށެވެ. އަދި އެ ކުންފުންޏަށް ދޫކޮށްފައިވާ ބިންތަކުން ކުލި ވެސް ނަގާ ގޮތަށް ވަނީ ނިންމައިފަ އެވެ. ސޯބެ ވިދާޅުވީ ވިޔަފާވެރިކުރާ ތަންތަނުގެ ކަރަންޓް ބިލް ބޮޑުވުމާ ގުޅިގެން، ވިޔަފާރިވެރިން ތިބީ ވަރަށް ބޮޑު ކަންބޮޑުވުމެއްގެ ތެރޭގައި ކަމަށެވެ. އެހެންވެ މިދިޔަ މަހު ބޮޑު ކުރި ބިލް ނުދެއްކުމަށް ވިޔަފާވެރިންނަށް އެންގުމަށް ވެސް ކައުންސިލްގެ ބައްދަލުވުމުގައި ނިންމާފައިވެ އެވެ. އައްޑޫ މޭޔަރު ސޯބެ: އޭނާ ވިދާޅުވީ ފެނަކަ އަށް ވުރެ އަގު ހެޔޮކޮށް އައްޑު އަށް ކަރަންޓް ދޭނެ ބަޔަކު ހޯދޭނެ ކަމަށް. ފައިލް ފޮޓޯ އަދި އެކަމާ ގުޅިގެން، ފެނަކަ އިން އަޅައިފާނެ ފިޔަވަޅަކާ ދޭތެރޭ ގޮތެއް ހޯދުމުގެ ގޮތުން ކަރަންޓް ބިލްގެ މައްސަލަ ކޯޓާ ހަމައަށް ވެސް ގެންދަން ވަނީ ނިންމައިފަ އެވެ. ސޯބެ ވިދާޅުވީ ވިޔަފާރިތަކުގެ ކަރަންޓް ބިލް ބޮޑުވީ ސަބްސިޑީ ހުއްޓާލުމުން ކަމަށް ބުނެ ހަގީގަތް އޮޅުވާލަން މަސައްކަތް ކުރަމުންދާ ކަމަށެވެ. "އެއް އިރެއްްގައި ވެސް އައްޑޫގެ ވިޔަފާވެރިންނަކަށް ސަބްސިޑީއެއް ނުދޭ. މި ކުރި ކަމަކީ ހަގީގަތުގައި ފެނަަކައިން ވިޔަފާރިތަކުގެ ކަރަންޓުން ނަގާ ރޭޓް ބޮޑު ކުރީ. އެކަން ކޮށްފައިވަނީ ސީީދާ އެ ކުންފުނީގެ މެނޭޖިން ޑިރެކްޓަރު މުހައްމަދު ނިމާލް އަޑީގައި ހުންނަވައިގެން، ބޯޑުގެ މެމްބަރުންނަށް ވެސް ނޭނގި،" މޭޔަރު ވިދާޅުވި އެވެ.