އެމެރިކާގެ އުތުރާއި މެދުތެރޭގެ ސަރަޙައްދުތަކަށް މިހާރު ކުރިމަތިވެފައިވާ ފިނީގެ ތޫފާނުގައި އެ ޤައުމުގެ ހުޅަނގުގައި އޮންނަ ކެލިފޯނިޔާއަށް ބޯކޮށް ސްނޯ ފައިބާ، ބޮޑު ސަރަޙައްދަކުން ކަރަންޓުގެ ޚިދުމަތް މެދުކެނޑިއްޖެއެވެ. ކެލިފޯނިޔާގެ ލޮސް އެންޖެލެސްގައި ކަރަންޓުގެ ޚިދުމަތް މެދުކެނޑިފައިވާ ގޭބީސީތަކާއި ވިޔަފާރިތަކުގެ ޢަދަދު 85,000 އަށް އަރާ ކަމުގައި އޮފިޝަލުން ވިދާޅުވެއެވެ.
މި ތޫފާނާ ގުޅިގެން ބައެއް ސަރަޙައްދުތަކަށް ބޯކޮށް ސްނޯ ފައިބަމުންދާއިރު، އެހެން ސަރަޙައްދުތަކަށް ދަނީ ބޯކޮށް ވާރޭ ވެހެމުންނެވެ. އަދި، ބައެއް ހިސާބުތަކަށް ގަނޑުފެނުގެ ވާރޭ ވެހެމުންދާ ކަމުގައި ވެސް އޮފިޝަލުން ވިދާޅުވެއެވެ. މޫސުން ގޯސްވުމާ ގުޅިގެން އެމެރިކާގެ ގިނަ ސަރަޙައްދުތަކެއްގެ މައި ހައިވޭތައް ވަނީ ބަންދުކޮށްފައެވެ.
މީގެ ތެރޭގައި ލޮސް އެންޖެލެސްއިން އުތުރަށް ދަތުރުކުރަން އޮންނަ އިންޓަރސްޓޭޓް 5 ހިމެނެއެވެ. ބައެއް ސަރަޙައްދުތަކުގެ މަގުތައް ބަންދުކޮށްފައި ވަނީ ބޯކޮށް ވާރޭވެހި، ފެންބޮޑުވުމާ ގުޅިގެން ކަމުގައި ކެލިފޯނީޔާގެ ޑިޕާޓްމަންޓް އޮފް ޓްރާންސްޕޯޓޭޝަންއިން ބުނެއެވެ. ޢަދި، ކަރަންޓުގެ ޚިދުމަތް މެދުކެނޑިފައިވާ ސަރަޙައްދުތަކަށް އެ ޚިދުމަތް އަލުން ގުޅައިދިނުމަށް އޮފިޝަލުން ދަނީ މަސައްކަތް ކުރަމުންނެވެ.
ފިނީގެ ތޫފާނާ އެކު ކެލިފޯނިޔާގެ އުތުރުގައިވާ ސެން ފްރެންސިސްކޯގެ ފިނިހޫނުމިން ރެކޯޑް މިންވަރަކަށް ދަށަށް ދާނެ ކަމުގައި ވެސް އެ ޤައުމުގެ މޫސުމާ ބެހޭ އިދާރާއިން ހާމަކުރެއެވެ. އަދި، އެ ސްޓޭޓްގެ ވެރިރަށް ސެކްރެމެންޓޯގައި ދަތުރުފަތުރު ކުރުމަކީ ރައްކާތެރި ކަމެއް ނޫން ކަމުގައި ވސް އެ އިދާރާއިން ވަނީ ބުނެފައެވެ.
މި ތޫފާނާ އެކު ކެލިފޯނިޔާގެ ސަރަޙައްދުތަކަށް ގަޑިއަކު 80 ކިލޯމީޓަރުގެ ބާރުމިނުގައި ވައިޖެހެމުންދާއިރު، ޢާންމުން ޒިޔާރަތްކުރާ ޕާކުތަކާއި އެ ފަދަ އެހެނިހެން ތަންތަން ވަނީ ބަންދުކޮށްފައެވެ. މީގެ ތެރޭގައި ޔޮސެމިޓީ ނޭޝަނަލް ޕާކު ވެސް ހިމެނެއެވެ. އަދި، ކުރިއަށް އޮތް ދުވަސްތަކުގައި ވެސް ކެލިފޯނިޔާގެ ސަރަޙައްދުތަކަށް ސްނޯއާއި، ބޯ ވާރެޔާއި، ގަނޑުފެނުގެ ވާރޭ ވެހޭނެ ކަމަށް މޫސުމާ ބެހޭ އިދާރާއިން އިންޒާރު ކުރެއެވެ.