އީރާނާ އެކު "ރަނގަޅު ވާހަކަތަކެއް" ދެކެވެމުން އަންނަ ކަމަށާއި، ދެ ގައުމުގެ ދެމެދުގައި އުފެދިފައިވާ ނުތަނަވަސްކަމަށް ހައްލެއް ހޯދުމަށް ޑީލެއް ހެދުމުގެ ފުރުސަތު އެބައޮތް ކަމަށް އެމެރިކާގެ ރައީސް ޑޮނާލްޑް ޓްރަމްޕް އަނެއްކާ ވެސް ބުނެފިއެވެ. ނަމަވެސް މަޝްވަރާތައް ނާކާމިޔާބުވެއްޖެ ނަމަ އެމެރިކާގެ ހަމަލާތައް އަލުން ފަށާނެ ކަމުގެ އިންޒާރުވެސް ޓްރަމްޕް ވަނީ ދީފައެވެ.
ޓްރަމްޕް މިހެން ބުނީ އެއަރ ފޯސް ވަން މަތީގައި ނޫސްވެރިންނާ ވާހަކަ ދައްކަމުންނެވެ. ޓްރަމްޕް ފާހަގަކުރި ގޮތުގައި އީރާނުން މަޝްވަރާ ކުރަން ބޭނުންވަނީ އެމެރިކާއިން ދެމުންދާ ވަރުގަދަ ހަމަލާތަކުގެ ސަބަބުންނެވެ.
އެމެރިކާއިން އީރާނަށް ދެމުންދިޔަ ހަމަލާތައް ކުއްލިއަކަށް ހުއްޓާލީ ފަސް މަސް ދުވަހަށް ދެމިގެންދިޔަ ހަނގުރާމައިގެ ތެރެއިން، ދެ ހަފްތާ ވަންދެން ބޮމުގެ ހަމަލާތައް ދިނުމަށް ފަހުއެވެ. ނަމަވެސް ޓްރަމްޕްގެ އުއްމީދީ ވާހަކަތަކާ ޚިލާފަށް، ތެހެރާނުން ވަނީ މި ހުއްޓާލުން ޓެސްޓް ކުރާފަދަ ގޮތަކަށް އަމަލު ކޮށްފައެވެ. އެގޮތުން ސައުދީ އަރަބިއްޔާ، ޖޯޑަން އަދި އިރާގުން ވަނީ ހޯމަ ދުވަހު ޑްރޯން ހަމަލާތަކެއް ރިޕޯޓް ކޮށްފައެވެ.
އީރާނުގެ ޚާރިޖިއްޔާ ތަރުޖަމާން އިސްމާއިލް ބަގާއީ ބުނި ގޮތުގައި، ދެ ފަރާތުގެ ދެމެދުގައި މެދުވެރިން މެދުވެރިކޮށް މެސެޖުތައް ބަދަލު ކުރަމުންދިޔަ ނަމަވެސް، އީރާނުން އަމިއްލައަށް އިސްނަގައިގެން މަޝްވަރާއަށް އެދުނު ކަމަށް ބުނާ ޚަބަރުތަކަކީ ހަގީގަތެއް ނެތް ވާހަކަތަކެކެވެ. ބަގާއީ ބުނީ އީރާނުން ޑިޕްލޮމެސީ ދޫކޮށްނުލާ ކަމަށާއި، ނަމަވެސް އަމިއްލައަށް އެދިގެން މަޝްވަރާ ކުރުމަކީ އީރާނުގެ "ލޭގައިވާ ކަމެއް ނޫން" ކަމަށެވެ.
​މި ހަމަލާތަކުގެ ތެރެއިން، ސައުދީ އަރަބިއްޔާގެ ޕެޓްރޯލިއަމް ވަސީލަތްތަކަށް އަމާޒުކޮށް އިރާގުގައި ތިބި އީރާނަށް ތާއީދު ކުރާ ގުރޫޕްތަކުން ފޮނުވި ޑްރޯންތައް، ވެރިރަށް ރިޔާޒް ސަރަހައްދު ހިމެނޭ ގޮތަށް ވައްޓާލާފައިވާ ކަމަށް ސައުދީން ވަނީ ބުނެފައެވެ. އަދި މިކަމަށް ޖަވާބު ދިނުމުގެ ހައްގު ރައްކާތެރިކުރާނެ ކަމަށް ވެސް ސައުދީން ބުނެއެވެ. ހަމައެއާއެކު، އީރާނުގެ ތާއީދު ލިބޭ ޔަމަންގެ ހޫތީން ވަނީ ސައުދީގެ ޑްރޯންތައް ޔަމަންގެ ވައިގެ ސަރަހައްދަށް ވަނުމާ ގުޅިގެން، 1,200 ކިލޯމީޓަރު ދިގު އީސްޓް-ވެސްޓް ޕައިޕްލައިނަށް ހަމަލާދީފައިވާ ކަމަށް ބުނެފައެވެ.
​މި ހުރިހާ މައްސަލަތަކެއް ހިނގަމުންދާއިރުވެސް، ދުނިޔޭގެ އެނަރޖީ އުފުލާ މައި މަގު ކަމަށްވާ ހޯރމުޒް ކަނޑުއޮޅި އަދިވެސް އޮތީ އެމީހުންގެ ކޮންޓްރޯލްގެ ދަށުގައި ކަމަށް އީރާނުން ވަނީ ބުނެފައެވެ. ނަމަވެސް އެމެރިކާގެ ރައީސް ޓްރަމްޕް ބޭނުންވަނީ އެ ކަނޑުއޮޅިން އުޅަނދުފަހަރަށް މިނިވަންކަމާއެކު ދަތުރު ކުރެވޭނެ ގޮތް ހަމަޖެއްސުމަށެވެ. އީރާނުގެ ސްޓޭޓް މީޑިއާއިން ބުނި ގޮތުގައި، ހޯމަ ދުވަހުގެ ހެނދުނު އެ ގައުމުގެ ހުއްދައާ ނުލައި ހޯރމުޒް ކަނޑުއޮޅިން ދަތުރުކުރަން އުޅުނު 6 އުޅަނދެއް ވަނީ އަނބުރާ ފޮނުވާލާފައެވެ. އީރާނުން ގަބޫލުކުރާ ގޮތުގައި އެ ކަނޑުއޮޅީގެ ކޮންޓްރޯލް އޮތީ އެމީހުންގެ އަތްމަތީގައި ކަމަށްވާތީ، އެ ސަރަހައްދުން ދަތުރުކުރާ އުޅަނދުތަކުން ފީ ނެގުމަށްވެސް އެގައުމުން އަންނަނީ ވިސްނަމުންނެވެ.
އެމެރިކާއިން ދިން 13 ރޭގެ ވަރުގަދަ ބޮމުގެ ހަމަލާތައް ހުއްޓާލުމާއި ޓްރަމްޕްގެ ވާހަކަތަކާ ގުޅިގެން ދުނިޔޭގެ ބާޒާރުގައި ތެލުގެ އަގު ވަނީ ވަރަށް ބޮޑަށް ވެއްޓިފައެވެ. މިދިޔަ ހަފްތާގައި ސޫޕަރ ކްރޫޑް ތެލުގެ ބެރެލެއްގެ އަގު 100 ޑޮލަރަށް މަތިވެފައި ވަނިކޮށް، ބްރެންޓް ކްރޫޑްގެ އަގު ހޯމަ ދުވަހު ވަނީ 8.2 އިންސައްތަ ވެއްޓި، 89 ޑޮލަރަށް ވުރެ ދަށަށް ގޮސްފައެވެ.
​އެމެރިކާގެ އޮފިޝަލަކު ހާމަކުރެއްވި ގޮތުގައި ޓްރަމްޕް ހަމަލާތައް ހުއްޓާލީ އަސްކަރީ ލަފާގެ މަތިންނެވެ. ކޮމާންޑަރުން ލަފާދީފައި ވަނީ ހަމަލާދޭނެ އަމާޒުތައް ހުސްވަމުންދާ ކަމަށާއި، ޖޮއިންޓް ޗީފްސް އޮފް ސްޓާފްގެ ޗެއަރމަން ޖެނެރަލް ޑޭން ކެއިން ވަނީ ހަތިޔާރުގެ ސްޓޮކް މަދުވަމުންދާތީ ކަންބޮޑުވުން ފާޅުކުރައްވާފައެވެ. ނަމަވެސް ޓްރަމްޕް ވަނީ ހަތިޔާރުގެ ދަތިކަމެއް ނެތް ކަމަށާއި، ޔުކްރެއިނަށް ފޮނުވުމުން ދަތިވި ސްޓޮކް އަލުން ފުރިހަމަކުރަމުންދާ ކަމަށް ބުނެފައެވެ.
މިދިޔަ ދެ ހަފްތާގެ ހަމަލާތަކުގައި އީރާނުން ގިނަ ބަޔަކު މަރުވެ، އެގައުމުގެ ދެކުނުގެ ބްރިޖްތަކާއި ޓަނަލްތައް ވަނީ ހަލާކުވެފައެވެ. އަދި އީރާނުން ދިން ޖަވާބީ ހަމަލާތަކުގައި އެމެރިކާގެ 4 ސިފައިން މަރުވެފައިވާ ކަމަށް ރިޕޯޓްތައް ބުނެއެވެ.
​އެމެރިކާއާއި އީރާނުން ވަނީ ޖޫން މަހުން އޯގަސްޓް މަހުގެ ނިޔަލަށް ނިއުކްލިއަރ މައްސަލަ ހިމެނޭ ގޮތަށް މައިގަނޑު މައްސަލަތައް ހައްލުކުރުމަށް މަޝްވަރާކުރުމުގެ ފްރޭމްވޯކް އެއްބަސްވުމަކަށް އައިސްފައެވެ. ނަމަވެސް ހޯރމުޒް ކަނޑުއޮޅީގެ މައްސަލާގައި ދެ ފަރާތުގެ މެދުގައި ބޮޑެތި ޚިލާފުތަކެއް އެބަހުރިއެވެ.
އެމެރިކާއިން ބުނަނީ އެ ކަނޑުއޮޅިއަކީ މިނިވަން ދަތުރުފަތުރަށް ހުޅުވާލެވިފައިވާ ތަނަކަށް ހަދަންޖެހޭ ކަމަށެވެ. ނަމަވެސް އީރާނުން ބުނަމުންދަނީ އެ އެއްބަސްވުމުގެ ދަށުން އެ ކަނޑުއޮޅި ބެލެހެއްޓުމުގެ ފުރިހަމަ ބާރު އެމީހުންނަށް ލިބިގެންވާ ކަމަށެވެ.