ނިޔޯން، ސްވިޒަލެންޑް (އޮގަސްޓް 29) - ޔުއެފާ ޗެމްޕިއަންސް ލީގުގެ ލީގު ބުރުގައި، މި ފަހަރުގެ ޓްރާންސްފާގައި ނަޕޯލީ އަށް ބަދަލުވި ކެވިން ޑި ބްރޭނާ އާއި ރެއާލް މެޑްރިޑާ ގުޅުނު ޓްރެންޓް އަލެކްސަންޑާ އާނޯލްޑް، ކުރީގެ ކްލަބާ ދެކޮޅަށް ކުޅެން ޖެހިއްޖެ އެވެ.
އެ ގޮތުން، ސިޓީ އަށް 10 އަހަރު ކުޅެދީފައި، އިޓަލީގެ ޗެމްޕިއަން، ނަޕޯލީ އަށް ބަދަލުވި ޑި ބްރޭނާ، ކުރީގެ ކްލަބް ސިޓީއާ ދެކޮޅަށް ކުޅޭ މެޗު އޮތީ އެ ޓީމުގެ ދަނޑު، އިއްތިހާދު ސްޓޭޑިއަމްގަ އެވެ. ލިވަޕޫލްގެ އެކަޑަމީން ސީނިއާ ޓީމަށް ޕްރޮމޯޓްވެ، ނުވަ އަހަރު ފުރަތަމަ ޓީމަށް ކުޅުނު އާނޯލްޑް، ރެއާލް ޖޯޒީގައި ލިވަޕޫލްގެ ދަނޑު އެންފީލްޑްގައި ކުޅެން ޖެހޭނެ އެވެ.
އެހެންކަމުން، މި މެޗުތައް ވަނީ މި ކުޅުންތެރިންގެ ކެރިއަރުގައި ވެސް ހާއްސަ މެޗަކަށެވެ. ކްލަބް ލެވަލްގައި ހޯދޭނެ ބޮޑެތި ހުރިހާ ކާމިޔާބެއް ޑި ބްރޭނާ އާއި އާނޯލްޑް ވަނީ ސިޓީ އަދި ލިވަޕޫލްގައި ހުރެ ހޯދައިފަ އެވެ.
ތިރީސް ހަ ޓީމު ވާދަކުރާ ޗެމްޕިއަންސް ލީގުގެ ގްރޫޕް ސްޓޭޖުގައި، އިނގިރޭސި ހަ ޓީމެއް ވާދަކުރެ އެވެ. އެއީ، ލިވަޕޫލާއި ސިޓީގެ އިތުރުން، ނިއުކާސަލް ޔުނައިޓެޑާއި ޓޮޓެންހަމް ހޮޓްސްޕާސް، ޗެލްސީ އަދި އާސެނަލް އެވެ. މީގެ ތެރެއިން، ޓޮޓެންހަމް އާއި ނިއުކާސަލުން ޗެމްޕިއަންސް ލީގުގެ އެންމެ ފަހުގެ ޗެމްޕިއަން، ޕީއެސްޖީއާ ދެކޮޅަށް ކުޅެން ޖެހޭނެ އެވެ. މީގެ ތެރެއިން، ޓޮޓެންހަމް ވަނީ، މި ފަހަރުގެ ޔުއެފާ ސުޕަ ކަޕްގައި ހިތްދަތި ގޮތަކަށް ޕީއެސްޖީ އަތުން ބަލިވެފަ އެެވެ.
މީގެ އިތުރުން، ޕީއެސްޖީން ބާސެލޯނާއާ ކުޅެން ޖެހޭއިރު، ޗެލްސީން ބާސެލޯނާއާ ވެސް ބައްދަލުކުރަން ޖެހޭނެ އެވެ.
ޗެމްޕިއަންސް ލީގުގެ ލީގު ބުރު ފަށާނީ އަންނަ މަހުގެ 16 ގަ އެވެ. އެ ބުރު ނިމޭނީ ޖެނުއަރީ މަހުގެ 28 ވަނަ ދުވަހު އެވެ. މެޗުތަކުގެ ޝެޑިއުލް ކުރިއަށް އޮތް 24 ގަޑިއިރު ތެރޭ ޔުއެފާ އިން އާންމުކުރާނެ އެވެ. މި ފަހަރުގެ ޗެމްޕިއަންސް ލީގުގެ ފައިނަަލް ކުޅޭނީ ހަންގޭރީގެ ބުޑަޕެސްޓުގަ އެވެ.