އިނގިރޭސި ޕްރިމިއާ ލީގުގެ ކުރީގައި އޮތް ދެ ޓީމު ކަމުގައިވާ ލިވަޕޫލް އާއި ނޮޓިންހަމް ފޮރެސްޓް ބައްދަލުކުރި މެޗު 1-1 ގެ ނަތީޖާއަކުން ދެ ޓީމު އެއްވަރުވެއްޖެ އެވެ.
ނޮޓިންހަމް ފޮރެސްޓްގެ ދަ ސިޓީ ގްރައުންޑުގައި ތިރީސް ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގެ އަށްވަނަ މިނިޓުގައި ނޮޓިންހަމް ފޮރެސްޓްގެ ކްރިސް ވުޑް ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ.
ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެން ގޮސްފައިވާ މި މެޗުގައި ލިވަޕޫލް އަށް އެއްވަރުކޮށްދިން ލަނޑު މެޗުގެ 66 ވަނަ މިނިޓުގައި އެ ޓީމަށް ކާމިޔާބު ކޮށްދީފައިވަނީ ބަދަލު ކުޅުންތެރިއެއްގެ ގޮތުގައި ދެވަނަ ހާފުގައި ކުޅެން އެރި ޑިއެގޯ ޖޮޓާ އެވެ. އޭނާ މި ލަނޑު ޖަހާފައިވަނީ ކުޅެން އެރިތާ އެންމެ 22 ސިކުންތުގެ ތެރޭގަ އެވެ.
ޖޮޓާ ކުޅެން އެރުވުމާއެކު ލިވަޕޫލްގެ ހަމަލަތައް ވަނީ އިތުރަށް ވަރުގަދަ ވެގެންގޮސްފަ އެވެ. ލިވަޕޫލް އިން އުފެއްދި ގިނަ ހަމަލަތަކެއް ދިފާއު ކުރުމުގައި ނޮޓިންހަމް ފޮރެސްޓްގެ ކީޕަރު މެޓްސް ސެލްސް ވަނީ މުހިންމު ދައުރެއް އަދާކޮށްފަ އެވެ.
މި ސީޒަނުގައި ޕްރިމިއާ ލީގުގައި ލިވަޕޫލް މިހާތަނަށް ކުޅުނު މެޗުތަކުގެ ތެރެއިން ބަލިވެފައިވަނީ ނޮޓިންހަމް ފޮރެސްޓް އާއި ދެކޮޅަށް އަމިއްލަ ދަނޑުގައި ކުޅުނު މެޗުން އެކަންޏެވެ.
ތާވަލުގެ އެއްވަނައިގައި އޮތް ލިވަޕޫލް އަށް 47 ޕޮއިންޓް ލިބިފައިވާއިރު ދެވަނައިގައި އޮތް ނޮޓިންހަމް ފޮރެސްޓަށް އެއް މެޗު އިތުރަށް ކުޅެގެން ލިބިފައިވަނީ 41 ޕޮއިންޓެވެ.