ވައިޑް-ބޮޑީ މަތިންދާ ބޯޓު ރާއްޖެ ގެނެސް ދަތުރުތައް ފެށުމަށް މިހާރު މަސައްކަތްތައް ކުރައްވަމުން އަންނަ ކަމަށް ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުހައްމަދު އަމީން ވިދާޅުވެއްޖެއެވެ.
ދައުލަތުގެ މީޑިއާއަށް މަޢުލޫމާތު ދެއްވަމުން ވަޒީރު ވިދާޅުވީ ވައިޑް-ބޮޑީ މަތިންދާ ބޯޓުގެ ޝެޑިއުލް ފްލައިޓްތައް މިމަހުގެ 21 ވަނަ ދުވަހު ޗެންޑޫއަށް ފެށުމަށް ހަމަޖެހިފައިވާ ކަމަށެވެ.
"ފުރަތަމަ ޝެޑިއުލް ފްލައިޓް އިނީ މިމަހުގެ 21 ގައި ޗެންޑޫއަށް. މަތިންދާ ބޯޓެއް ގެނެސްފައި ވަގުތުކޮޅެއް ނަގާނެ. އެއީ މީގެ 2 ދުވަސް ކުރީގައި އެހެން ގައުމެއްގައި ރަޖިސްޓްރޭޝަންގައި އޮއްވައި ރީ-ރަޖިސްޓްރީކޮށްފައި މިޤައުމަށް ރަޖިސްޓްރީކުރީ. އަދި މި އޮޕަރޭޓްކުރާ ކްރޫންވެސް އެ ބޯޓުގައި ހަދަންޖެހޭ ޓްރެއިނިންތަކާއި ބައެއް ކަންތައްތައް ހުންނާނެ. އެޑްމިނިސްޓްރޭޓިވްލީ ކުރަންޖެހޭ ކަންތައްތައްވެސް," ވަޒީރު ވިދާޅުވިއެވެ. މި ވައިޑް-ބޮޑީ މަތިންދާ ބޯޓުގައި އިކޮނޮމީ ކްލާސް، ބިޒްނަސް ކްލާސްގެ އިތުރުން ޕްރިމިއަމް ކްލާސް ހިމެނޭ ކަމަށް ވަޒީރު ފާހަގަކުރެއްވިއެވެ. މި ބޯޓުގެ ދަތުރުތައް ޗައިނާގެ 3 ސިޓީއަކަށް ކުރުމަށް ވަނީ ހަމަޖެހިފައެވެ. އެއީ ޝެންހާއި، ޗެންޑޫ އަދި ބެއިޖިންއަށެވެ. މި ޚިދުމަތް ފެށުމާއެކު އަހަރެއްގެ މައްޗަށް 60 ހާސް ފަސިންޖަރުން ރާއްޖެ ގެނެވޭނެކަމަށް ލަފާކުރެވޭ ކަމަށް މޯލްޑިވިއަންއިން ވިދާޅުވެފައިވެއެވެ. މި ހިދުމަތާއެކު ރާއްޖޭގެ ފަތުރުވެރިކަމުގެ ދާއިރާއަށް އިތުރު ކުރިއެރުމެއް ލިބިގެންދާނެ ކަމުގެ އުންމީދުކުރެވެއެވެ. ޚާއްޞަކޮށް ޗައިނާގެ މާކެޓަށް އަމާޒުކޮށްގެން ފެށޭ މި ޚިދުމަތުން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވެ، އިޤްތިޞާދަށް ފައިދާތަކެއް ކުރާނެ ކަމަށް ބެލެވެއެވެ.