މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮންޕެނީ، އެމްޓީސީސީން މުޅި ރާއްޖޭގައި 59 މަޝްރޫޢެއްގެ މަސައްކަތްކުރަމުން އަންނަކަމަށް އެކުންފުނިން ހާމަކުރައްވައިފިއެވެ.
އެމްޓީސީސީން ކުރަމުން އަންނަ މަސައްކަތްތަކާ އެކުންފުންޏާ ހަވާލުކޮށްފައިވާ މަޝްރޫޢުތަކުގެ ތަފްސީލު ހިމަނައިގެން "އެމްޓީސީސީ ޕްރޮޖެކްޓްސް"ގެ ނަމުގައި ވެބްސައިޓެއް ވަނީ ތަޢާރަފްކޮށްފައެވެ. އެކުންފުނިން ހިންގާ މަޝްރޫޢުތަކުގެ ތަފްސީލު މި ވެބްސައިޓުން ބެލޭނެއެވެ. އަދި ރަށްރަށުގައި ހިންގާ މަޝްރޫޢުތަކާ ގުޅޭ ބައެއް މަޢުލޫމާތުތަކާއި އެ މަޝްރޫޢުތަކުގެ މަސައްކަތް ގޮސްފައިވާ ހިސާބުވެސް ބަލާލެވެއެވެ. އެގޮތުން މަޝްރޫޢުގެ ބާވަތާއި ސްކޯޕާއި އަގު އަދި ނިމިފައިވާ ޕަސެންޓު އެނގެން ހުންނާނެކަމަށް އެމްޓީސީސީން ވިދާޅުވިއެވެ.
އެމްޓީސީސީ ޕްރޮޖެކްޓްސް ވެބްސައިޓުގައި ޢާންމުކޮށްފައިވާ މަޢުލޫމާތަށް ބަލާއިރު، އެމްޓީސީސީއާ 152 މަޝްރޫޢެއް ހިންގުމަށް ހަވާލުކޮށްފައިވެއެވެ. އޭގެ ތެރެއިން މަސައްކަތް މިހާރު ހިނގަމުންދަނީ 59 މަޝްރޫޢެއްގެއެވެ. އަދި އެކި ސަބަބުތަކާހުރެ ހުއްޓިފައިވާ 48 މަޝްރޫޢަކާއި ނުފަށާ 45 މަޝްރޫޢެއްވާކަމަށް ވެބްސައިޓުގައިވާ މަޢުލޫމާތުގައިވެއެވެ.
އެމްޓީސީސީން ވިދާޅުވީ މި ވެބްސައިޓު އުފައްދާފައިވަނީ އެމްޓީސީސީގެ މެނޭޖިންގ ޑިރެކްޓަރ އަޙްމަދު ސަޢުދީގެ އިސްނެންގެވުމާއި އިރުޝާދުގެ ދަށުން ކަމަށެވެ. އަދި މިފަދަ ވެބްސައިޓެއް ހެދުމުގެ މަޤްޞަދަކީ އެމްޓީސީސީން ރާއްޖޭގެ އެކި ކަންކޮޅުތަކުގައި ހިންގާ މަޝްރޫޢުތަކު އެންމެ ފަހުގެ މަޢުލޫމާތު ދިވެހި ރައްޔިތުންނަށް ދެފުށް ފެންނަ ގޮތަށް ފަސޭހައިން ބެލޭނެ ގޮތް ހެދުމެވެ.
ނިމުނު ސަރުކާރުން އެމްޓީސީސީއާ ގިނަ މަޝްރޫޢުތަކެއް ހަވާލުކޮށްފައިވީނަމަވެސް ސަރުކާރު ބަދަލުވީއިރު މީގެ ތެރެއިން 50 މަޝްރޫޢެއްގެ މަސައްކަތް ސަރުކާރު ބަދަލުވިއިރުވެސް ނުފަށާކަމަށް ސަރުކާރުންވަނީ ވިދާޅުވެފައެވެ. އަދި މީގެ ތެރެއިން ބައެއް މަޝްރޫޢުތަކުގެ ޢަމަލީ މަސައްކަތް މިސަރުކާރުން މިހާރުވަނީ ފަށާފައެވެ.
އެމްޓީސީސީން ވިދާޅުވީ މި ވެބްސައިޓު އުފައްދާފައިވަނީ އެމްޓީސީސީގެ މެނޭޖިންގ ޑިރެކްޓަރ އަޙްމަދު ސަޢުދީގެ އިސްނެންގެވުމާއި އިރުޝާދުގެ ދަށުން ކަމަށެވެ. މިފަދަ ވެބްސައިޓެއް ހެދުމުގެ މަޤްޞަދަކީ އެމްޓީސީސީން ރާއްޖޭގެ އެކި ކަންކޮޅުތަކުގައި ހިންގާ މަޝްރޫޢުތަކު އެންމެ ފަހުގެ މަޢުލޫމާތު ދިވެހި ރައްޔިތުންނަށް ދެފުށް ފެންނަ ގޮތަށް ފަސޭހައިން ބެލޭނެ ގޮތް ހެދުމެވެ.
އެމްޓީސީސީއަކީ ރާއްޖޭގެ ރަށްރަށުގައި ޢުމްރާނީ ތަރައްޤީއާ ގުޅުންހުރި ގިނަ މަޝްރޫޢުތަކެއް ހިންގަމުންދާ ކުންފުންޏެކެވެ.