ސުވާލު. ދިމާވާ ކުދިކުދި ކަންކަމާ ގުޅިގެން އަނބިމީހާއާ ދިމާއަށް މިވެނި ކަމެއް ނުވަތަ އެވެނި ކަމެއް ކޮށްފިއްޔާ ތީ މަގޭ އަތްނބެއް ނޫނޭ ކިޔާ ގޮވުމަކީ ކޮންކަހަލަ ކަމެއްތޯ؟  
ޖަވާބު. އާދެ! ކުރިން ވެސް ދެންނެވި ފަދައިން އިސްލާމްދީނުގައި ވަރަށް ބޮޑަށް ބާރުއަޅުއްވައިފައިވަނީ ކައިވެނި ދެމެހެއްޓުމަށް. އެހެންވީމާ ރުޅިއަންނަ ކޮންމެ ވަގުތެއްގައި، ހިތްހަމަނުޖެހޭ ކޮންމެ ވަގުތެއްގައި ވަރިއާ އަޅުވައިފައި ކަންތައްތައް ކިޔުމަކީ (ބަސްބުނުމަކީ) އެއީ ވަރަށް ނުރައްކާތެރި ކަމެއް. ހަޤީޤަތުގައި އެ ގޮތަށް ވަރިއާ އަޅުވައިފައި ކަންތައްތައް ކިޔަނީ ކޮންމެހެން ވަރިކުރަން ބޭނުންވެގެނެއް ވެސް ނޫން. އެހެން ނަމަވެސް ހަމަ އަނބިމީހާއަށް ބިރުދައްކައިލަން ނުވަތަ އައިސްފައި ހުންނަ ރުޅިއެއްގައި ވަރުގަދަ ބަހެއް ބުނެލުމުގެ ގޮތުން އެކަހަލަ އެއްޗެހި ބުނަނީ. ދެން އެހެން ނަމަވެސް މި އޮންނަ ގޮތަކީ، ވަރީގެ ލަފުޒު ބޭނުންކޮށްފި ކަމަށް ވަނީނަމަ، އެއީކީ އޭނަގެ ނިޔަތަކަށް ނުވަތަ އޭނާގެ ހިތުގައި އޮތީ ވަރިކުރުންތޯ ނުވަތަ ނޫންތޯ އެޔެއް ބަލާކަށް ނުޖެހޭ. ވަރީގެ ޞަރީޙަ ލަފުޒު އަތުވެއްޖެ ކަމަށް ވަނީނަމަ، އެ ހިސާބުން ވަރިވާނެ. 
އެހެންވީމާ މިވެނި ކަމެއް ވެއްޖިއްޔާ ނުވަތަ މިވެނިކަމެއް ކޮށްފިއްޔާ ތިއީ މަގޭ އަތްނބެއް ނޫނޭ ބުނެފައި އޮއްވައި، އޭނާ އެ ކަމެއް ކޮށްފިކަމަށް ވަނީނަމަ، ނުވަތަ އެ ކަމެއް ވެއްޖެ ކަމަށް ވަނީނަމަ، އެ ހިސާބުން ދެ މީހުންގެ ކައިވެނި ރޫޅިގެންދާނެ. ވަރަށް ގިނަ ފަހަރަށް އެ ގޮތަށް ކައިވެނި ރޫޅިގެން ދިޔައީމަ ބޭފުޅުން ހަމަ ގުޅުއްވައިފައި ވިދާޅުވޭ، ޝެއިޚު އަޅުގަނޑު އެއްގޮތަކަށް ވެސް ވަރިކުރުމުގެ ނިޔަތުގައި ބުނި އެއްޗެއް ނޫނޭ. އަޅުގަނޑު ހަމަ އައިސްފައި ހުރި ރުޅީގައި ބުނެވުނު އެއްޗެކޭ.  
އެހެން ނަމަވެސް ރުޅިއައި ކަމުގައިވީ ނަމަވެސް ވަރީގެ ލަފުޒު އަނގައިން، ދުލުން ބޭރުނުކޮށް ވޭތޯ ބަލަންޖެހޭނެ. އާދެ! މީގެ މިސާލަކީ އަޅުގަނޑުމެން ސަމާސައަކަށް ވެސް ނުވަތަ އަޅުގަނޑުމެން މީހަކަށް ބިރުދެއްކުމުގެ ގޮތުން ވިޔަސް، އެހެން ކަމެއްގެ ގޮތުން ވިޔަސް، މީހެއް ގައިގައި ވަޅިން ޖެހީ. ވަޅިން ޖެހީމާ ކޮންމެ ގޮތެއް ވިޔަސް ވަޅިއަކީ އެއީ ތޫނު އެއްޗެއް ވީމާ އެއިން ޖެހީމާ ކަނޑައިގެން ދާނެ ނުވަތަ ހަލާކުވާނެ. އެ ގޮތަށް ވަރީގެ ލަފުޒު ބޭނުންކުރީމަ ހަމަ ކައިވެނީގެ އެ ފަށް ކެނޑިގެންދާނެ. އެހެންވީމަ އެ ކަމަށް ހަމަ ރައްކާތެރިވާންޖެހޭނެ.  
ދެން މީގަ އަދި އެއް ތަންކޮޅެއް އެބައޮތް. މިވެނިކަމެއް ކޮށްފި ކަމަށް ވަނީނަމަ، ނުވަތަ މިވެނި ކަމެއް ވެއްޖެ ނަމަ، ތިމަންނާގެ އަތްނބެއް ނޫނޭ ބުނެފައި، އެ ކަމެއް ވުމުގެ ކުރިން ނުވަތަ އަނބިމީހާ އެ ކަމެއް ކުރުމުގެ ކުރިން ބަސް އަނބުރައި ގެނައުމުގެ ބާރު ފިރިމީހާއަށް ލިބިގެންވޭ. އެހެންވީމާ މިސާލަކަށް ބުނެވިދާނެ މިވެނި ތަނަކަށް ގޮސްފި ކަމަށް ވަނީނަމަ، ތިމަންނާގެ އަތްނބެއް ނޫނޭ. އެ ތަނަކަށް އަނބިމީހާ ދިއުމުގެ ކުރިން ފިރިމީހައަށް ބުނެވިދާނެ ތިމަންނާ ކުރިން އެ ބުނި ބަސް ގެނެސް، އަނބުރައި ގެނެސްފީމޭ އެހެންވީމާ އެ ތަނަށް ދިޔަ ކަމުގައިވީ ނަމަވެސް ވަރިއެއް ނުވާނޭ. ހަމަ ތިމަންނާގެ އަތްނބެކޭ. އެހެން އެ ގޮތަށް ބުނެފި ކަމަށް ވަނީނަމަ، ވަރިއެއް ނުވާނެ.  
އެހެން ނަމަވެސް އެ ކަން ވުމަށް ފަހުގައި ދެން ބަސް އަނބުރައި ގެނައުމުގެ ފުރުސަތެއް ނޯންނާނެ. އެ ގޮތަށް އެ ކަން، މިވެނި ތަނަކަށް ގޮސްފި ކަމަށް ވަނީނަމަ، ނުވަތަ މިވެނި ކަމެއް ވެއްޖެ ކަމަށް ވަނީނަމަ، ނުވަތަ މިވެނި ކަމެއް ކޮށްފި ކަމަށް ވަނީނަމަ، ތިމަންނާގެ އަތްނބެއް ނޫނޭ ބުނެފައި އޮއްވައި އެ ގޮތަށް އެ ކަމެއް ވެއްޖެ ނަމަ، ނުވަތަ އަނބިމީހާ އެ ގޮތަށް އެ ކަން ކޮށްފި ކަމަށް ވަނީނަމަ، އެ ހިސާބުން ދެ މީހުންގެ ކައިވެނި ރޫޅިގެންދާނެ. ވަﷲ އަޢުލަމް.
 
- ޑރ. މުޙައްމަދު އިޔާޟް ޢަބްދުއްލަޠީފް