ސެންޓާ އެންޓަޕްރައިޒަސްއިން ޑިޕާޓްމަންޓް އޮފް މެޑިކަލް ސާވިސަސްއާ ދެކޮޅަށް ސިވިލް ކޯޓަށް މައްސަލައެއް ހުށަހަޅައިގެން، އެ ކުންފުންޏަށް 32 މިލިއަން ރުފިޔާ ދައްކަން ކުރި ހުކުމުގައި ކޯޓަށް ހުށަހެޅި އެއް އިންވޮއިސްއަކީ ވަގު އިންވޮއިސްއެއް ކަމަށް އަދަދު އަށް މައުލޫމާތު ލިބިއްޖެ އެވެ.
ވަގު އިންވޮއިސްގެ ކަންތައް ފަޅާއެރީ، ޑިޕާޓްމަންޓް އޮފް މެޑިކަލް ސާވިސަސްއިން ސެންޓާ އެންޓަޕްރައިޒަސްއަށް ދައްކަން ޖެހޭ ފައިސާގެ މައްސަލަތަކާ ގުޅިގެން އޮޑިޓާ ޖެނެރަލް އޮފީހުން ކުރަމުންދާ ހާއްސަ އޮޑިޓުގެ ތެރެެއިންނެވެ.
އޮޑިޓާ ޖެނެރަލް އޮފީހުގެ އެ އޮޑިޓާ ގުޅިގެން މި ނޫހަށް މައުލޫމާތު ދިން މަސްދަރުތަކުން ބުނި ގޮތުގައި، ވަގު އިންވޮއިސްއަކީ 2006 ވަނަ އަހަރުގެ ތާރީހެއްގައި، މެޑިކަލް ކޮންސިއުމުބަލް އެތެރެކުރާ ދިވެހި ކުންފުންޏަކުން ސެންޓަ އެންޓަޕްރައިޒަސް އަށް 12.4 މިލިއަން ރުފިޔާގެ މުދާ ކްރެޑިޓަށް ދޫކޮށްފައިވާ ކަމަށް ބުނެ ހުށަހެޅި އިންވޮއިސްއެކެވެ.
ނަމަވެސް މި ނޫހަށް ކަށަވަރުވެފައިވާ ގޮތުގައި މި އިންވޮއިސްއަކީ އެ ކުންފުނީގެ ސައްހަ އިންވޮއިސްއެއް ނޫނެވެ. އެ ވަގު އިންވޮއިސްގައި ހިންގި ކަމަށް ބުނާ މުއާމަލާތަކީ އެއްވެސް އިރެއްގައި އެ ކުންފުނިން އެއްވެސް ބަޔަކާ އެކީ ހިންގާފައިވާ މުއާމަލާތެއް ވެސް ނޫނެވެ.
ވަގު އިންވޮއިސްގައި ބޭނުންކޮށްފައިވާ ލެޓާހެޑާއި ބިސްމީގެ އިތުރުން އެ ލެޓާހެޑުގެ ތިރީގައި ކުންފުނީގެ މައުލޫމާތު ހިމެނޭ ބައި ވެސް ނެތެވެ. އަދި އެ ބުނާ އިންވޮއިސްގައި ކޮންޓެކްޓެއްގެ ގޮތުގައި ޖަހާފައި ވަނީ އެއްވެސް އިރެއްގައި އެ ކުންފުނީގެ އިންވޮއިސްތަކާއި ވިިޔަފާރީގެ މަސައްކަތް ކުރި މުވައްޒަފެއް ނޫންކަން މި ނޫހަށް މަސްދަރުތަކުން ކަށަވަރުކޮށް ދިނެވެ.
އެ ވަގު ބުނާ އިންވޮއިސްގެ ބޭނުންކޮށްގެން ސެންޓާ އެންޓަޕްރައިޒަސްއިން މަސައްކަތް ކޮށްފައި ވަނީ، އޭގައި ހިމެނޭ މުދަލަކީ އެ ކުންފުންޏަށް ކްރެޑިޓުގައި ދޫކުރި މުދާ ކަމަށް ދައްކާށެވެ. ނަމަވެސް 12 މިލިއަން ރުފިޔާގެ މުދާ ކްރެޑިޓަށް ދޫކުރުމުގެ ކެޕޭސިޓީ މުދާ ދޫކުރި ކަމަށް ބުނެފައިވާ ކުންފުނީގައި ނެތް ކަމަށް އެ ކުންފުނިން އޮޑިޓު އޮފީހަށް އަންގާފައިވެ އެވެ.
އިންވޮއިސްގައި ހުރި ބައެއް ސާމާނަކީ އެ ކުންފުނިން ވިއްކާ މުދަލެއް ވެސް ނޫން ކަމަށް އެ ކުންފުނިން އޮޑިޓަރުންނަށް މައުލޫމާތު ދީފައިވެ އެވެ.
މި މައްސަލައިގައި ސިވިލް ކޯޓުން ކޮށްފައިވާ ހުކުމުގައި ހުރި މައުލޫމާތަށް ބަލާއިރު، ސެންޓާ އެންޓަޕްރައިޒަސްއިން މައްސަލަ ހުށަހެޅީ ފައިސާ ނުލިބިވާ ދެ އިންވޮއިސްއަކާ ގުޅިގެން އެ އިންވޮއިސްތަކަށް ލިބެން ޖެހޭ 32 މިލިއަން ރުފިޔާ ހޯދުމަށާއި ފައިސާ ދައްކާފައި ނުވާތީ ޖޫރިމަނާގެ ގޮތުގައި 51 މިލިއަން ރުފިޔާ ހޯދުމަށެވެ.
މި ދައުވާ ސާބިތުކުރަން ސެންޓާ އެންޓަޕްރައިޒަސްއިން ހުށަހެޅި ލިޔުންތަކުގެ ތެރޭގައި 12.4 މިލިއަން ރުފިޔާގެ ވަގު އިންވޮއިސްއެއް ހިމެނެ އެވެ.
ދައުލަތުން މި މައްސަލައިގައި ވަކާލާތު ކުރީ، މި ހިދުމަތަކީ އެއްވެސް އިރެއްގައި ސެންޓާ އެންޓަޕްރައިޒަސްއިން ހޯދާފައިވާ ހިދުމަތެއް ނޫން ކަމަށާއި ހުށަހަޅާފައިވާ ލިޔެކިޔުންތަކުން އެކަން ސާބިތުނުވާ ކަމަށެވެ. އަދި މި މުއާމަލާތްތަކާ ގުޅޭ އެއްބަސްވުމެއް ވެސް ވެފައި ނުވާ ކަމަށް ބުނެ މައްސަލަ ބޭރުކޮށްލަން ކޯޓުގައި އެދުނެވެ.
ސެންޓާ އެންޓަޕްރައިޒަސްއިން މި މައްސަލަ ސާބިތުކުރަން ހުށަހެޅި ލިޔުންތަކުގެ ތެރެއިން، މައްސަލަ އެކޮޅަށް ނިމުނު މުހިންމު އެއް ލިޔުމަކީ ޑިޕާޓްމަންޓް އޮފް މެޑިކަލް ސާވިސަސްއިން ފޮނުވާފައިވާ ސިޓީއެކެވެ. މި ސިޓީގައި ވަނީ އެ ކުންފުންޏަށް ބީލަން އެވޯޑު ކުރެވިފައިވާ ކަމާއި، އެ ކުންފުނިން ފޮނުވާފައިވާ ކޯޓޭޝަންގައި ހިމެނޭ މުދާ ފޯރުކޮށްދިނުމުން އެ ޑިޕާޓްމަންޓުން ފައިސާ ދޭނެ ކަމަށެވެ.
މައްސަލަ ސެންޓާ އެންޓަޕްރައިޒަސް ކޮޅަށް ނިންމަމުން ސިވިލް ކޯޓުގެ ގާޒީ ފާހަގަކުރި ގޮތުގައި، މި މުއާމަލާތުގައި ހިމެނޭ ދެ އިންވޮއިސްގައިވާ މުދާ ފޯރުކޮށްދީފައިވާކަން ހުށަހެޅި ހެކިތަކުން ސާބިތުވާ ކަމަށެވެ. އެއް އިންވޮއިސްގެ އަގަކީ 26 މިލިއަން ރުފިޔާ އެވެ. އަނެއް އިންވޮއިސްގެ އަގަކީ 6 މިލިއަން ރުފިޔާ އެވެ.
މިކަން ސާބިތުވާ ކަމަށް ކޯޓުން ކަނޑައެޅީ "މުދަލަށް އޯޑަރުކުރާ ފޯމް" އާއި "ޑެލިވަރީ ނޯޓު" ތަކަށް ރިއާޔަތްކޮށެވެ. ސެންޓަ އެންޓަޕްރައިޒަސްއިން ހުށަހެޅި މި ދެ ލިޔުމުގައި ވެސް ޑިޕާޓްމަންޓް އޮފް މެޑިކަލް ސާވިސަސްގެ ސިއްކަ ޖަހާފައިވެ އެވެ.
އޭގެ އިތުރުން ފިނޭންސް މިނިސްޓްރީން ވަނީ މި މުދާތައް ލިބިފައިވާ ކަމަށް ބަޔާންކޮށް، އެ ފައިސާ ދެއްކުމަށް ޑިޕާޓްމަންޓް އޮފް މެޑިކަލް ސާވިސަސްއަށް ސިޓީއަކުން އަންގާފަ އެވެ.
މި މައްސަލައިގައި ކޯޓުން ހުކުމް ކުރީ، ފެބްރުއަރީ 10، އިން ފެށިގެން 30 ދުވަހުގެ ތެރޭގައި ސިވިލް ކޯޓަށް މި ފައިސާ ދައްކައި ހަލާސްކުރުމަށެވެ. ނަމަވެސް ދައުލަތުން ވަނީ މި މައްސަލަ ހައި ކޯޓުގައި އިސްތިއުނާފުކޮށްފަ އެވެ. ހައި ކޯޓުގެ ރަޖިސްޓްރީން ދައްކާ ގޮތުގައި މައްސަލަ ބަލައިގަތުމާ މެދު އެ ކޯޓުން އަދި ގޮތެއް ނުނިންމަ އެވެ.