މިދިޔަ ޑިސެމްބަރު މަހުން ފެށިގެން އޮސްޓްރޭލިއާގައި 16 އަހަރުން ދަށުގެ ކުދިން ސޯޝަލް މީޑިއާ ބޭނުންކުރުން މަނާކުރުމާ ގުޅިގެން، ދުނިޔޭގެ އެކި ގައުމުތަކުގެ ސަމާލުކަން އެ ގައުމަށް ހުއްޓިއްޖެއެވެ. ސްޕެއިންއާއި މެލޭޝިއާ ފަދަ ގައުމުތަކުން މި ފިޔަވަޅަށް ތާއީދުކޮށް، އެފަދަ ނިންމުންތައް ނިންމުމަށް ޝައުގުވެރިކަން ފާޅުކޮށްފައިވާއިރު، އެމެރިކާގެ ކޯޓުތަކުން ވެސް ވަނީ ޓެކްނޮލޮޖީ ކުންފުނިތަކުން ކުޑަކުދިންގެ ރައްކާތެރިކަމަށް އިހުމާލުވާކަމަށް ނިންމާފައެވެ. https://sun.mv/219817 ބޮޑުވަޒީރު އެންތަނީ އަލްބަނީޒްގެ ސަރުކާރުން މިހާރު ވަނީ މި ގަވާއިދު ތަންފީޒުކުރުން ކުރިއަށްވުރެ ވަރުގަދަކޮށްފައެވެ. ތަޖުރިބާކާރުން ބުނާ ގޮތުގައި އޮސްޓްރޭލިއާގެ މި "އިމްތިހާނަށް" މުޅި ދުނިޔެ ބަލަމުންދާތީ، މިކަމުގައި ސަރުކާރުން ދޫދޭން ބޭނުން ނުވަނީއެވެ. މިދިޔަ ޖެނުއަރީ މަހު ސޯޝަލް މީޑިއާ ކުންފުނިތަކުން ވަނީ އުމުރު ހަމަނުވާ 4.7 މިލިއަން އެކައުންޓް އުވާލާފައިވާ ކަމަށް ބުނެފައެވެ. ނަމަވެސް، ފަހުގެ ރިޕޯޓްތަކުން ދައްކާ ގޮތުގައި ގިނަ އަދަދެއްގެ ކުޑަކުދިން އަދިވެސް ސޯޝަލް މީޑިއާ ބޭނުންކުރަމުންދެއެވެ. އެހެންކަމުން، އޮސްޓްރޭލިއާ ސަރުކާރުން މިހާރު ދަނީ މެޓާ (ފޭސްބުކް އަދި އިންސްޓަގްރާމް)، ޓިކްޓޮކް، ޔޫޓިއުބް އަދި ސްނެޕްޗެޓުން ގާނޫނާ ޚިލާފުވެފައިވޭތޯ ބަލައި ތަހުގީގު ކުރަމުންނެވެ. އީ-ސޭފްޓީ ރެގިއުލޭޓަރުގެ ފުރަތަމަ ރިޕޯޓު ބުނާ ގޮތުން، 16 އަހަރުން ދަށުގެ ކުދިންގެ ބެލެނިވެރިންގެ ތެރެއިން ތިންބައިކުޅަ އެއްބައި ބެލެނިވެރިން ބުނެފައި ވަނީ އެމީހުންގެ ދަރިންގެ އަތުގައި އަދިވެސް މަދުވެގެން އެއް ސޯޝަލް މީޑިއާ އެކައުންޓް އޮވެއެވެ. މީގެ އިތުރުން، އުމުރު ކަށަވަރުކުރުމަށް ހަދާ ޓެސްޓުތަކުން ފެއިލްވުމުން، ތަކުރާރުކޮށް އެ ޓެސްޓު ހަދައިގެން ކުދިން އެކައުންޓް ހުޅުވާކަން ވެސް ވަނީ ފާހަގަކުރެވިފައެވެ. އޮސްޓްރޭލިއާގެ މުވާސަލާތީ ވަޒީރު އަނީކާ ވެލްސް ވިދާޅުވީ މިއީ ބެލެނިވެރިންގެ ނުވަތަ ކުދިންގެ ނާކާމިޔާބީއެއް ނޫން ކަމަށާއި، މިއީ ބޮޑެތި ޓެކްނޮލޮޖީ ކުންފުނިތަކުން ސަރުކާރުގެ ސިޔާސަތުތަކަށް ހުރަސްއެޅުމުގެ ނަތީޖާ ކަމަށެވެ. އޮސްޓްރޭލިއާ ސަރުކާރުން މި ފިޔަވަޅުތައް ވަރުގަދަކުރަން ނިންމި އަނެއް ސަބަބަކީ އެމެރިކާގެ ކޯޓަކުން މިދިޔަ ހަފުތާގައި މެޓާ ކުންފުނި 375 މިލިއަން ޑޮލަރުން ޖޫރިމަނާކުރުމެވެ. އެއީ ކުޑަކުދިންނަށް ގެއްލުންވާ ފަދަ ގޮތަކަށް ޕްލެޓްފޯމްތައް ފަރުމާކޮށްފައިވާތީއެވެ. ތަޖުރިބާކާރުން ދެކޭ ގޮތުގައި، އެމެރިކާގެ ދައުވާތަކުން ސަލާމަތްވުމަށްޓަކައި މި ކުންފުނިތަކުން އެމީހުންގެ އެޕްތަކުގެ ފަރުމާއަށް ބަދަލު ގެނައުމަކީ އެކަށީގެންވާ ކަމެކެވެ. އަދި އޭގެ ސަބަބުން ދުނިޔޭގެ އެހެން ގައުމުތަކުގައި ވެސް ކުޑަކުދިންނަށް ސޯޝަލް މީޑިއާ ބޭނުންކުރުން އުނދަގޫވެގެންދާނެއެވެ. މިދިޔަ ޑިސެމްބަރު މަހު އޮސްޓްރޭލިއާގެ ޕާލަމަންޓުން ފާސްކުރި ތާރީޚީ ގާނޫނެއްގެ ދަށުން، 16 އަހަރުން ދަށުގެ ކުދިން ސޯޝަލް މީޑިއާ ބޭނުންކުރުން ވަނީ މަނާކޮށްފައެވެ. މިއީ ސޯޝަލް މީޑިއާގެ ސަބަބުން ކުރިމަތިވާ ސައިބަ ބުލީކުރުމާއި، ނަފްސާނީ އެކި މައްސަލަތަކުން ކުޑަކުދިން ރައްކާތެރިކުރުމަށް ދުނިޔޭގެ ގައުމަކުން އެޅި މިފަދަ ފުރަތަމަ އަދި އެންމެ ވަރުގަދަ ފިޔަވަޅެވެ. މި ގާނޫނުގެ ދަށުން، ކުޑަކުދިންނަށް އެކައުންޓް ނުހުޅުވޭނެ ގޮތް ހެދުމުގެ ޒިންމާ މެޓާ އަދި ޓިކްޓޮކް ފަދަ ޓެކްނޮލޮޖީ ކުންފުނިތަކުން އުފުލަންޖެހޭއިރު، އެކަން ތަންފީޒު ނުކުރާ ކުންފުނިތައް 49.5 މިލިއަން އޮސްޓްރޭލިއާ ޑޮލަރާ ހަމައަށް ޖޫރިމަނާ ކުރުމުގެ ބާރު އެ ގައުމުގެ ސަރުކާރަށް ލިބިގެންވެއެވެ. މި ފިޔަވަޅަކީ ދުނިޔޭގެ އެހެން ގައުމުތަކުން ވެސް މިހާރު ނަމޫނާއަކަށް ބަލަމުންދާ ނިންމުމެކެވެ.