ގައުމީ ބިން ފޮތިފޮތިވާ ފަދަ މޭރުކަމުން ވާހަކަ ދެއްކުމަކީ އެއްވެސް މީހަކު ކޮށްގެންވާނެ ކަމެއް ނޫންކަމަށް ކުރީގެ ރައީސް މައުމޫނު އަބްދުލް ގައްޔޫމު ވިދާޅުވެއްޖެ އެވެ.
ރައީސް މައުމޫނު މިއަދު ކުރެއްވި ޓުވީޓެއްގައި ވިދާޅުވީ ސިޔާސީ ބޭނުމަށްވެސް ދައްކައިގެން ނުވާނެ ވާހަކަ ހުންނާނެ ކަމަށާ، ގައުމީ ބިމުގެ ވަހުދަކީ ގައުމުގެ ސިޔާދަތުގެ ވަރަށް މުހިންމު ބައެއް ކަމަށެވެ. އެހެން ކަމުން ގައުމީ ބިން ފޮތިފޮތިވާ ފަދަ މަފުހޫމަކަށް ތާއީދު ލިބޭ މޭރުމަކުން ވާހަކަ ދެއްކުމަކީ އެއްވެސް މީހަކު ކޮށްގެން ވާނެ ކަމެއް ނޫން ކަމަށް މައުމޫނު ވިދާޅުވި އެވެ.
Twitter Embeded
ރައީސް މައުމޫނު މި ފަދަ މޭރުމަކުން ވާހަކަ ދައްކަވާފައިވަނީ ކޮން ކަމަކާއި ގުޅުވައިގެން ކަމެއް ވިދާޅުވެފައެއް ނުވެ އެވެ. އަދި ޓުވީޓުގައި ރައްދު ދެއްވާފައި ވަނީ ކޮން ބޭފުޅަކަށް ކަމެއްވެސް ވިދާޅުވެފައެއް ނުވެ އެވެ.
މައުމޫނު މިފަދަ މޭރުމަކުން ޓުވީޓު ކުރެއްވި އިރު ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަނީ ރާއްޖޭގައި އެންމެ ފުރަތަމަ އުފެދުނު ޖުމްހޫރީ ވެރިކަމަކީ ދެކުނުގައި އުފެއްދި ސުވަދީވްގެ ވެރިކަން ކަމަށް ވިދާޅުވެ ވާހަކަ ދައްކަވައިފަ އެވެ. ނަޝީދު މިފަދައިން ވިދާޅުވީ ޖުމްހޫރީ ދުވަހުގެ މުނާސަބަތުގައި ބޭއްވި ހަފްލާއެއްގައި ވާހަކަ ދައްކަވަމުންނެވެ.