ގދ މަޑަވެލިން ކަރަންޓު ކެނޑޭތާ ދެ މަސްވެއްޖެ ކަމަށާއި، އަދިވެސް އެ މައްސަލަައަށް ދާއިމީ ހައްލެއް ނުލިބޭކަމަށް މަޑަވެލީ ކައުންސިލުން ބުނެފި އެވެ.
ވީނިއުސްއާއި ވާހަކަ ދައްކަވަމުން މަޑަވެލީ ކައުންސިލްގެ ރައީސް ޝާހިދު އަހުމަދު ވިދާޅުވީ، ކޮންމެ ދުވަހަކުވެސް ދެތިން ފަހަރަށް ރަށުގެ ބޮޑު ބަޔަކުން ކަރަންޓު ކެނޑެމުންދާ ކަމަށާއި މިގޮތަށް ކަރަންޓް މައްސަލަ ދިމާވަމުންއަންނަތާ ދެ މަސް ވެއްޖެކަމަށެވެ.
ޝާހިދު ވިދާޅުވި ރައްޔިތުންގެ އެތައް ޝަކުވާއަކާއެކު އެކިފަހަރުމަތިން މި މައްސަލަ ފެނަކައަށް ހުށައެޅި ނަމަވެސް، މިއަދާ ހަމައަށްވެސް ހައްލެއް ލިބިފައި ނުވާ ކަމަށެވެ. އަދި ވިދާޅުވީ ކުރިއަށް އޮތީ ރަމަޟާން މަސް ކަމަށާއި، މިހެން ކަރަންޓު ކެނޑެން ވެއްޖެނަމަ މިކަމުގެ އެތައް ތަކުލީފެއް ރައްޔިތުން އުފުލަންޖެހޭނެ ކަމަށެވެ. މަޑަވެލިން ކަރަންޓު ކެނޑެނީ ކަރަންޓުދޭނެ ކެޕޭސިޓީ އިންޖީނުގެ ގޭގައި ނެތިގެން ކަމަށާއި، މިހާރު މުޅި ރަށަށް ކަރަންޓުދެނީ ދެ ޖަނަރޭޓަރު ބޭނުން ކޮށްގެން ކަމަށްވެސް އޭނާ ވިދާޅުވިއެވެ.