ކުރީގެ ރައީސް މައުމޫން އަބްދުލް ގައްޔޫމް އުފެއްދެވުމަށް މަސައްކަތްކުރައްވާ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގައި ހިޔާލު ތަފާތުވުންތަކެއް އުފެދިފައިވާ ކަމަށް ބައެއް މީޑިއާތަކުން ވާހަކަ ދައްކަމުންދިޔަ ނަމަވެސް އެފަދަ އެއްވެސް ހިޔާލު ތަފާތުވުމެއް ނެތް ކަމަށް އެ ޕާޓީގައި އިސްކޮށް ހަރަކާތްތެރިވެ ވަޑައިގަންނަވާ ޑީއާރުޕީގެ ކުރީގެ ޑެޕިއުޓީ ލީޑަރު އުމަރު ނަސީރު އިއްޔެ ވިދާޅުވެއްޖެ އެވެ.
ޕީޕީއެމްގެ ވަގުތީ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އުމަރު ވިދާޅުވީ އެ ޕާޓީގައި ހިޔާލު ތަފާތުވުންތަކެއް އުފެދިފައިވާ ކަމަށް ޕީޕީއެމްގެ އިސްބޭފުޅަކާ ހަވާލާދެއްވައި ބައެއް މީޑިއާތަކުން ގެނެސްދިން ނަމަވެސް އެއީ އެއްވެސް ހަގީގަތެއް އެކުލެވޭ ވާހަކަތަކެއް ނޫން ކަމަށެވެ. އަދި އެފަދަ ވާހަކަ ދައްކާ މީހަކު ކެރިގެން ކުރިމައްޗަށް ނުކުތުމަށް އޭނާ ގޮވާލެއްވި އެވެ.
"އެއީ ކަނޑައެޅިގެން ދޮގެއް. މި ޕާޓީގައި އެއްވެސް ހިޔާލުތަފާތުވުމެއް ނެތް. އަދި ވަރަށް ބާރު ސްޕީޑެއްގައި ވަރަށް ގިނަ މެމްބަރުން މި ޕާޓީ އަށް ސޮއިކުރަމުންދަނީ،" އުމަރު ވިދާޅުވި އެވެ.
އޭނާ ވިދާޅުވީ އެ ޕާޓީއާ ބެހޭ ގޮތުން އެފަދަ ހަބަރުތައް ފަތުރަނީ އެތައް ބަޔަކު ޕީޕީއެމްއާ ގުޅެމުންދާތީ އެކަން ހުއްޓުވުމުގެ ގޮތުން ކަމަށެވެ. އަދި އެ ޕާޓީއަކީ އެންމެ މެމްބަރުން ގިނަ އިދިކޮޅު ޕާޓީ އަށް ވަރަށް އަވަހަށް ވެގެންދާނެ ކަމަށް ވެސް އުމަރު ވިދާޅުވި އެވެ.
އޭނާ ވިދާޅުވީ އެ ޕާޓީގެ އަސާސީ ގަވައިދު އެކުލަވާލައި ހިޔާލު ހޯދުމަށް ހަމައެކަނި ޕާޓީގެ މެމްބަރުންނަށް ހުޅުވާލައިގެން ބާއްވާ ބައްދަލުވުމެއް އަންނަ ބުރާސްފަތި ދުވަހުގެ ރޭ ދަރުބާރުގޭގައި އޮންނާނެ ކަމަށެވެ.
އެ ނޫސް ކޮންފަރެންސްގައި ވާހަކަދައްވަމުން އެ ޕާޓީގެ މެމްބަރު ޑރ. ސައުދު މުހައްމަދު ވިދާޅުވީ ސަރުކާރު ހިތްހުއްޓޭ މިންވަރަށް އެ ޕާޓީ އަށް މީހުން ސޮއިކުރަމުންދާ ކަމަށެވެ. އަދި އަދަދު ހާމަނުކުރި ނަމަވެސް މިހާރު ވެސް ވަރަށް ގިނަ ފޯމްތައް ލިބެމުންދާ ކަމަށް ވެސް އޭނާ ވިދާޅުވި އެވެ.
ޑރ. ސައުދު ވިދާޅުވީ ޕާޓީގެ މެމްބަރުންގެ ފޯމް އިލެކްޝަންސް އަށް ހުށަހެޅުމަށް 24 ގަޑިއިރު ޑާޓާ ޕްރޮސެސްކުރުމުގެ މަސައްކަތްކުރަމުން އަންނަ ކަމަށެވެ.
ޕީޕީއެމް އުފެއްދުމުގެ ހުއްދަ އަށް އެދި އިލެކްޝަންސް ކޮމިޝަނަށް ހުށަހެޅި ދުވަހު 3،600 އަށް ވުރެ ގިނަ ފޯމް ހުށަހަޅާފައިވާ ކަމަށް އެ ޕާޓީން ކުރިން ބުނެފައިވެ އެވެ.