ކޮތަރަށް ކާން ދިނުން މަނާ ކުރިނަމަވެސް، ކޮންމެ ދުވަހަކު ހެނދުނާއި ހަވީރު ޖުމްހޫރީ މައިދާނަށް ވަޑައިގެން ކޮތަރުތަކަށް ކާންދެއްވާނެ ކަމަށް ތިމާވެއްޓަށް ގިނަ ހިދުމަތްތަކެއް ކުރައްވަމުން ގެންދަވާ މުހައްމަދު ޒާހިރު (މީމު ޒަވިޔަނި) ވިދާޅުވެއްޖެއެވެ.
ރާއްޖޭގެ ބައެއް މީޑިޔާތަކަށް މައުލޫމާތުދެއްވަމުން ޒާހިރު ވިދާޅުވީ، ކޮތަރަކީ ﷲ ލެއްވި މަޚްލޫގަކަށް ވާއިރު ކޮތަރަށް ކާން ނުދީ މަރާލުމަކީ ކުރަން ހެޔޮވާވަރުގެ ކަމެއް ނޫން ކަަމަށެވެ.
ކޮތަރަށް ކާންދިނުން ކޮންމެ ފަރާތަކުން މަނާކުރި ނަމަވެސް އެކަން ނުހުއްޓާނެ ކަމަށާއި، އެގޮތުން ކޮންމެ ދުވަހަކު ހެނދުނާއި ހަވީރު ކޮތަރަށް ކާން ދިނުމަށް އޭނާ ޖުމްހޫރީ މައިދާނަށް ވަޑައިގަންނަވާނެ ކަމަށްވެސް ޒާހިރު ވިދާޅުވިއެވެ.
އެންވަޔަރަމެންޓް މިނިސްޓްރީގެ ޑިރެކްޓަރު މަގާމުގައި ހުންނެވި ޒާހިރު ވަނީ، ކޮތަރުތައް އެހެން ސަރަހައްދަކަށް ބަދަލުކުރުމަށް ހައުސިންގް މިނިސްޓްރީން ނިންމާފައިވާ ނިންމުމާ ގުޅޭގޮތުން ވެސް ވާހަކަދައްކާފައެވެ. އެގޮތުން ޒާހިރު ވިދާޅުވީ، އެއީ ދާއިމީ ގޮތެއްގައި ކުރެވޭނެ ކަމެއް ނޫންކަމަށާއި، ކޮތަރަކީ "ނެވިގޭޝަން ރަނގަޅު އެއްޗެއް" ކަމުން އެތަކެތި އަނބުރާ ޖުމްހޫރީ މައިދާނަށް އަންނާނެ ކަމަށެވެ.
ޒާހިރުއަކީ ތިމާވެށި ދާއިރާއަށް މީހުން ހޭލުންތެރިކޮށް ތިމާވެށީގެ މައްސަލަތަކުގައި ވަރަށް ކުރީއްސުރެން ފެށިގެން ވެސް އަޑުއުފުލަމުން ގެންދަވާ ބޭފުޅެކެވެ.
ޖުމްހޫރީ މައިދާނުގައި ތިބި ކޮތަރުތަކަށް ކާން ނުދޭން ހައުސިންގް މިނިސްޓްރީން ނިންމުމާ ގުޅިގެން އާއްމުންގެ ގިނަ ބައެއްގެ ފާޑުކިޔުން ދަނީ އެކަމަށް އަމާޒުވަމުންނެވެ.