ތަފާތު އެކިއެކި ޙާލަތްތަކުން މިސާލު ދައްކަވަމުން މިއަދުގެ ޚުޠުބާގައިވަނީ ތަފާތު އެކިއެކި އުކުޅުތަކާއި މަކަރުވެރިކަމާއި އޮޅުވާލުމުގެ ތެރެއިން ބޭންކް އެކައުންޓުތަކުގައި ހުންނަ ފައިސާ ވަގަށްނެގުމާއި ފޭރުމާއި ކުރެވޭ އެކިއެކި މުޢާމަލާތްތަކުގައިވެސް އަމިއްލަ ފައިދާއަށް ނުޙައްޤުން ފައިސާ ހޯދަމުންދާކަން ފާހަގަ ކުރައްވާފައެވެ. މިކަމުގެ ނަތީޖާ ހިތިކަމާއި އެކަމުގެ އަސަރު ހަމައެކަނި ކުރަނީ ވަކިވަކި ފަރުދުންނަށް ނޫންކަމާއި މުޅި މުޖުތަމަޢުއަށްވެސް އޭގެ އަސަރު ކުރަމުންދާ ކަމުގައިވެސް ހަނދާން ކޮށްދެއްވާ، އެފަދަ ކަންކަމުން ދުރުހެލިވުމަށް ބުނެދެއްވާ، ނަސޭޙަތްތެރިވެ ވަޑައިގެންފައެވެ. މުޖުތަމަޢުތައް ނެތިކޮށްލާ، ފަސާދަކުރަނިވި އެއްވަބާއަކީ ވައްކަމާއި ނުހަމަގޮތުގައި ފައިސާ ހޯދުންކަމާއި އެލިބޭ އުފަލަކީ ވަގުތީ އުފަލެއް ކަމުގައިވެސްވަނީ ފާހަގަ ކުރައްވާފައެވެ. އެގޮތުން ނަބަވީ ބަސްފުޅުތަކާއި އިލާޙީ ވަޙީ ބަސްފުޅުތަކުގެ އަލީގައިވަނީ ވައްކަމާއި ފޭރުމާއި ނުޙައްޤުން މުދާހޯދުމުގެ ނުބައިކަން ބަޔާންކޮށްދެއްވާފައެވެ. އެގޮތުން " ފާފަވެރިގޮތުގައި މުދަލެއްހޯދުމަށްފަހު އެއިން ރަޙިމުގެ ގުޅުން ޤާއިމްކުރި ކަމުގައިވިޔަސް، ނުވަތަ ޞަދަޤާތްދިން ކަމުގައިވިޔަސް، ނުވަތަ ﷲ ގެ މަގުގައި ހޭދަކުރިކަމުގައިވިޔަސް، އެހުރިހާ މުދަލެއް ޖަމާކުރެވޭނެއެވެ. އަދި އެމުދާލާއިއެކު އޭނާ ނަރަކައަށް އެއްލާލެވޭނެ" ކަމުގައި ނަބަވީ ބަސްފުޅުތަކުން ކަށަވަރުވާކަމުގައިވެސް ވަނީ ބުނެދެއްވާފައެވެ.ލޮބުވެތި ކިޔުންތެރިން. ވައްކަމަކީ ޙައްދު ކަނޑައެޅިފައިވާ ނުބައިކަން ބޮޑު ފާފައެކެވެ. ވައްކަން ކޮށްގެންނާއި ރިބާގެ މުޢާމަލާތްތަކުގެ ތެރެއިންނާއި ރިޝްވަތާއި އޮޅުވާލުމާއި ފޭރުމުގެ ތެރެއިންނާއި ދީނުގައި ޙަރާމްކުރައްވާފައިވާ ގޮތްގޮތުން ހޯދާ ފައިސާއާއި މުދާވެރިކަމަކީ ތިބާއަށާއި ތިބާގެ ދަރިފަސްކޮޅަށްވެސް ވާ ނުބާ ވަބާއަކަށް ވެދާނެކަމުގައި ބިރުވެތިވެ އެފަދަ ކަންކަމާއި ދުވަހަކުވެސް ކައިރިނުވަމާ ހިނގާށެވެ. އެހެނީ، އެފަދަ ފާފަތަކަކީ ތިބާގެ ހެޔޮ ޢަމަލުތައް ނެތިކޮށްލާ ކަމެކެވެ.