ކުރިއަށް އޮތް ލޯކަލް ކައުންސިލް އިންތިޚާބާ ދިމާކޮށް، ފުލުހުންގެ މުސާރަ ބޮޑުކުރީ ކަމަށް ބުނެ ދެކެވޭ ވާހަކަތައް ފުލުހުން މިއަދު ދޮގުކޮށްފިއެވެ. ސޯޝަލް މީޑިއާގައި ވަނީ ކުރިއަށް އޮތް ލޯކަލް ކައުންސިލް އިންތިޚާބާ ދިމާކޮށް، ފުލުހުންގެ މުސާރަ ބޮޑުކުރީ ކަމަށް ބުނެ އަޑުފެތުރިފައެވެ. އެކަމާ ގުޅިގެން ފުލުހުންގެ އެސިސްޓެންޓް ކޮމިޝަނަރު އަދި ތަރުޖަމާނު އަހުމަދު ޝިފާން ވިދާޅުވި ގޮތުގައި މި މަހުގެ އެއްވަނަ ދުވަހުގެ ނިޔަލަށް ދައުލަތުގެ ޕޭ ފްރޭމްވޯކަށް ފުލުހުން ބަދަލުވިތާ ދެ އަހަރު ވަނީ ފުރިފައެވެ. އެހެންކަމުން އެ ފްރޭމްވޯކުގައިވާ ގޮތުގެ މަތިން، އެ ދުވަހުން ފެށިގެން ފުލުހުންގެ މަގާމުގެ އެލަވަންސް ދެވަނަ ހަރުފަތަށް ވަނީ ބަދަލުކޮށްފައި ކަމަށް ޝިފާން ވިދާޅުވިއެވެ. އަދި އެ އެލަވަންސަކީ ޕޭ ފްރޭމްވޯކަށް އަމަލުކުރަން ފެށި ހިސާބުން ފެށިގެން ދެ އަހަރު ހަމަވުމުން ދިނުމަށް ކުރިން ވެސް ފާސްކޮށް، ފުލުހުންނަށް ދިނުމަށް ހަމަޖެހިފައިވާ އެލަވަންސެއް ކަމަށް ޝިފާން ވިދާޅުވިއެވެ. ޝިފާން ވިދާޅުވި ގޮތުގައި މި ބަދަލު ގެނެސްފައި ވަނީ، ޕޭ ފްރޭމްވޯކްގައި ފާސްކުރެވިފައިވާ ގޮތަށް، އެ ފުލުހަކު ހުރި ރޭންކާއި ގްރޭޑުގައި ދެ އަހަރުވެ، މަސައްކަތުގެ ފެންވަރު ބަލާ ނިޒާމުން ވިދިވިދިގެން ދެ އަހަރު ދުވަހު އެވަރެޖްކޮށް 75 އިންސައްތައަށްވުރެ މަތިން މާކްސް ލިބިފައިވާ ފުލުހުންނަށެވެ. https://x.com/Shifan4040/status/2038972004830003458 މީގެ ދެ އަހަރުކުރިން، 2024 ވަނަ އަހަރުގެ މާޗު ފަހު ފުލުހުން ހާމަކުރި ގޮތުގައި ފުލުހުންގެ މުސާރައިގެ އޮނިގަނޑު މާޗު މަހުގެ އެކަކުން ފެށިގެން އޮތީ ބަދަލުކޮށްފައެވެ. އެހެންކަމުން އެ މަހުން ފެށިގެން ފުލުހުންގެ މުސާރަތައް އޮތީީ 35 ޕަސެންޓު ބޮޑުކޮށްފައެވެ. މިއީ 2009 ވަނަ އަހަރުގެ ފަހުން އަސާސީ މުސާރާއާއެކު ފުލުހުންގެ މުސާރަ ބޮޑު ކުރެވުނު ފުރަތަމަ ފަހަރެވެ. https://sun.mv/190009 ފާހަގަކޮށްލެވޭ ގޮތުގައި މުވައްޒަފުންނަށް ކުރާ ހޭދަ މިދިޔަ އަހަރު 7.5 އިންސައްތަ އިތުރުވެފައި ވަނީ ޕޭ ހާމަނައިޒޭޝަންގެ ތެރެއިން ފުލުހުންނާއި ސިފައިން މުސާރައަށް ގެނެސްފައިވާ ބަދަލުތަކާ ހެދި ކަމަށް ފިނޭންސް މިނިސްޓްރީން މިދިޔަ އަހަރު ބުނެފައިވެއެވެ.