އައިޖީއެމްއެޗްގައި މަސައްކަތް ކުރަމުންދިޔަ ފިލިޕީންސްގެ ނަރުހެއް ކަމަށްވާ މޭރީ ގްރޭސްގެ މަރުގެ މައްސަލައިގައި ދައުވާލިބޭ އޭނާގެ ފިރިމީހާ މާވިން ވާގަސްގެ ދިފާއުގައި ހެކިބަސްދޭން އޭނާގެ ރައްޓެހިންނަށް ދިން ފުރުސަތުގައި ދެވަނަ ފަހަރަށްވެސް ނައުމުން، އެ މީހުންގެ ހެކިބަހާ ނުލައި މައްސަލަ ކުރިއަށް ގެންދަން ނިންމައި މައްސަލައިގެ ހެކިބަސް ނެގުން ނިންމާލައިފިއެވެ. މޭރީ މަރާލި މައްސަލައިގައި މާވިންގެ މައްޗަށް، އެނގިހުރެ މީހަކު މެރުމުގެ ދައުވާ ދައުލަތުންވަނީ އުފުލައިފައެވެ. އަދި މާވިންއާ ލޯބީގެ ގޮތުން ގުޅިގެން އުޅުނު ދިވެހި ނަރުސް، ހަލީމަތު ލަމްހާގެ މައްޗަށް ވެސް އެކަމުގައި ބައިވެރިވުމުގެ ދައުވާ ދައުލަތުން ކުރެއެވެ. މާވިން އާއި ލަމްހާގެ ޝަރީއަތް ވަކިވަކިން ކުރިއަށް ގެންދާއިރު، މާވިންގެ ދިފާއުގައި އޭނާވަނީ، ރާއްޖޭގައި ދިރިއުޅޭ ފިލިޕީންސްގެ ފަސް މީހަކު ހެކިވެރިންގެ ގޮތުގައި ކޯޓަށް ހުށަހަޅާފައެވެ. https://sun.mv/213497 އެކަމަކު މާވިންގެ "ގުޑް ކެރެކްޓާ" ކިޔައިންދޭން ކޯޓަށް އައީ އެންމެ މީހެކެވެ. ދެން ތިބި މީހުން ގެންނަން ދެވަނަ ފުރުސަތެއް ދިނުމުން ވެސް އެ މީހުން ކޯޓަށް ނައުމުން ކޯޓުން އެންމެ ފަހުން ނިންމީ އެ މީހުންގެ ހެކިބަސް ދެން ނުނެގުމަށެވެ. މައުލޫމާތު ލިބިފައިވާ ގޮތުގައި މާވިންގެ ރައްޓެހިން ކޯޓަށް ހާޒިރުކުރުމުގެ ކަންކަން ކުރަމުންދަނީ މާވިންގެ މަންމައެވެ. މާވިންގެ މަންމަ އެ މީހުން ހާޒިރުކުރެވޭތޯ ވަރަށް މަސައްކަތް ކުރިނަމަވެސް އެމީހުން އެއްވެސްގޮތަކަށް ފޯނަށް ޖަވާބުނުދޭ ކަމަށްވެއެވެ. މއ. އުދުހޭކޮކާގޭގެ ފުރަތަމަ ފަންގިފިލާގައި ދިރިއުޅެމުން އައި މޭރީގެ ބޮލާއި ކަރަށް ހަމަލާދީގެންނާއި ނޭވާ ހާސްކޮށްލައިގެން، މަރާލާފައިވަނީ 19 އޮކްޓޫބަރު 2021 ގައެވެ. މާވިންގެ މައްޗަށް އަދި އޭނާގެ ދިވެހި ލޯބިވެރިޔާ ލަމްހާގެ މައްޗަށް އުފުލާފައިވާ ދައުވާތައް ސާބިތުވެއްޖެ ނަމަ ދެ މީހުންނަށް ވެސް މަދުވެގެން 10 އަހަރުގެ ޖަލު ހުކުމެއް އަންނާނެއެވެ.